Ol Blesing Long Wok Blong Paenia
1, 2. ?Wanem ol blesing we yumi save kasem long wok blong paenia, mo from wanem?
1 Wan paenia i talem se: “Mi save se i no gat wan narafala wok we i save mekem mi mi haremgud moa, i winim wok ya blong talemaot trutok long ol man.” Wan narafala paenia i talem se: “Long en blong dei, mi slip gud mo hat blong mi i fulap long glad.” Tufala paenia ya i talemaot tingting blong olgeta brata mo sista long evri ples, we oli bin kasem ol blesing long wok blong paenia.—Prov. 10:22.
2 Taem yumi givhan long ol man blong kasem save long Tok blong God we i save sevem laef blong olgeta, yumi rili haremgud. (Wok 20:35; 1 Tes. 2:19, 20) Wan brata we i paenia blong longtaem finis i talem se: “Taem mi luk olsem wanem Tok blong God i gat paoa blong pulum ol man blong jenisim laef blong olgeta, samting ya i mekem mi mi glad mo i mekem bilif blong mi i kam strong moa.” Yes, taem ol paenia oli glad blong givhan long ol man mo mekem ol Baebol stadi, oli stap long rod blong kasem ol blesing ya.
3, 4. ?Olsem wanem wok blong paenia i tijim yumi blong dipen long Jeova, mo olsem wanem samting ya i givhan long yumi blong kam bigman long saed blong spirit?
3 Dipen Long Jeova: Taem ol paenia oli dipen evri dei long tabu spirit blong halpem olgeta long wok blong prij, samting ya i givhan long olgeta blong wokem ‘ol frut blong tabu spirit,’ mo i protektem olgeta tu. (Gal. 5:16, 22, 23, NW ) Mo tu, from we ol paenia oli yusum Tok blong God oltaem, plante long olgeta oli gat gudhan blong yusum Baebol blong pruvum trutok long ol man mo blong leftemap tingting blong olgeta. (2 Tim. 2:15) Wan brata we i paenia blong plante yia i talem se: “Wok blong paenia i givhan long mi blong kasem dip save long Baebol. Mo mi bin yusum save ya blong halpem plante man blong oli save Jeova mo ol tingting we hem i gat long saed blong fiuja.” !Hemia i wan bigfala blesing!
4 Ol fultaem paenia oli mas dipen long Jeova long plante samting. Taem oli luk olsem wanem hem i blesem ol traehad blong olgeta blong kasem ol samting we oli nidim blong laef, samting ya i mekem bilif blong olgeta i strong moa. Wan fultaem paenia we i gat 72 yia mo i bin paenia blong 55 yia, i talem se: “Jeova i neva bin mekem mi mi harem nogud.” Mo from we ol paenia oli no gat plante tumas samting, oli no tingting tumas long ol trabol blong laef. ?Yu yu ting se fasin blong laef blong olgeta i gud?—Mat. 6:22; Hib. 13:5, 6.
5. ?Olsem wanem wok blong paenia i save givhan long yumi blong kam klosap long Jeova?
5 Kam Klosap Long God: Fasin fren we yumi gat wetem Jeova i sas moa i bitim ol narafala samting we yumi gat. (Sam 63:3) Taem lav blong Jeova i pusum yumi blong joen fulwan long wok blong prij, yumi fren moa wetem hem. (Jem. 4:8) Wan paenia we i bin mekem wok ya blong 18 yia, i talem se: “Wok blong paenia i givim janis long yumi blong ‘traem trastem Jeova mo faenemaot we hem i gud.’ Evri dei, yumi save kam klosap moa long Man ya we i Wokem yumi.”—Sam 34:8, NW.
6. ?Ol paenia oli mas gat wanem samting, mo hu bakegen oli kasem blesing from wok blong olgeta?
6 Blong paenia, i nidim we ol samting i stret long laef blong yumi. Be antap long hemia, ol paenia oli nidim bilif we i strong, trufala lav long God mo long ol man raonabaot long olgeta, mo oli mas rere blong lego sam samting we olgeta nomo oli wantem. (Mat. 16:24; 17:20; 22:37-39) Be, fes blong ol paenia we i glad tumas i soemaot se ol samting we oli lego, oli nating nomo taem yumi skelem wetem fulap blesing we oli kasem long wok blong paenia. (Mal. 3:10) I no ol paenia nomo we oli kasem ol blesing ya, be ol famle blong olgeta mo kongregesen tu i kasem bigfala blesing from nambawan tingting mo fasin blong ol paenia.—Fil. 4:23.