‘Yufala i Mas Lavem Hae God’
Bambae Yumi Tingbaot Ded Blong Jisas Long Eprel 4
1 Plante yia bifo, taem Yukren i stap aninit long Komunis gavman, ol man blong gavman oli stap wajem evri samting we ol brata oli stap mekem. Oli mekem samting ya moa taem dei blong Memoriol i kam klosap, from we oli wantem faenem ples we ol brata bambae oli holem miting ya. Samting ya i mekem i hadwok long ol brata from we ol man blong gavman oli save wik we miting blong Memoriol bambae i stap long hem. ?Ale ol brata oli mekem wanem? Long haos blong wan sista i gat wan rum aninit long graon, we rum ya i gat wota long hem oltaem. Wota ya i dip kasem ni blong man. Neva ol man blong gavman bambae oli ting se ol man oli save hivap long ples ya we wota i stap long hem. Taswe ol brata oli nilim ol plang tugeta olsem wan platfom antap long wota ya. Nao kongregesen blong olgeta oli glad tumas blong mekem miting blong Memoriol tugeta long smol rum ya, nating se siling i daon mo oli no save stanap stret.
2 Strong tingting we ol brata blong yumi long Yukren oli soem blong obei long oda ya blong tingbaot ded blong Jisas, i rili soemaot lav we oli gat long God. (Luk 22:19; 1 Jon 5:3) Eni taem we yumi fesem sam traem long laef blong yumi, i gud yumi tingbaot ol stori olsem mo mekem tingting blong yumi i strong blong kam long Lodsapa long Eprel 4. Taem yumi mekem olsem, yumi soem se filing blong yumi i sem mak long man we i raetem Sam ya se: “Yufala we tingting blong yufala i stap strong long Hae God, yufala i mas lavem hem.”—Sam 31:23.
3 Halpem Ol Narafala Blong Oli Lavem God: Lav we yumi gat long God i pusum yumi blong singaot narafala i kam joen long miting ya wetem yumi. Pepa we i stap insaed long Kingdom Wok blong Februari, i leftemap tingting blong yumi evriwan blong mekem wan lis blong nem blong olgeta man we yumi wantem invaetem olgeta oli kam long Memoriol. ?Yu yu invaetem finis olgeta man ya long lis blong yu? Tektaem blong eksplenem gud mining blong miting ya. Bambae yu givhan long olgeta blong kam sipos yu tingbaot blong talem bakegen long olgeta wanem dei mo taem blong Memoriol ya blong oli no fogetem, mo sipos yu naf, yu save mekem plan blong kam from olgeta.
4 Long taem blong miting ya, traem bes blong yu blong welkamem evriwan we yu yu bin invaetem olgeta, mo traem mekem se oli no fraet. ?Olsem wanem yu save halpem olgeta blong oli lavem Jeova? Stap rere blong ansarem eni kwestin we oli gat. Maet yu save askem olgeta sipos oli wantem stadi Baebol. Singaot olgeta oli kam long ol narafala miting blong kongregesen. Ol elda bambae oli traem bes blong olgeta blong halpem ol Kristin we oli no moa prij, be oli kam long Memoriol ya. Oli save mekem plan blong visitim olgeta mo leftemap tingting blong olgeta blong oli kam strong bakegen, maet oli save yusum sam tingting we oli bin kamaot long tok blong Memoriol ya.—Rom 5:6-8.
5 Lav Blong Yumi Long Jeova i Mas Gru: Taem yumi tingting dip long presen ya ransom, samting ya i save mekem we lav blong yumi long Jeova mo Pikinini blong hem i save kam dip moa. (2 Kor. 5:14, 15) Wan sista we i neva mestem ol miting blong Memoriol i talem tok ya: “Naoia mifala i wantem tumas blong stap long miting blong Memoriol. Evri yia miting ya i kam impoten moa long tingting blong mifala. Mi rimemba se, twanti yia bifo, mi stap long haos blong ded mo mi stap lukluk gudfala papa blong mi we i ledaon i stap, long taem ya nao mi rili filim bigfala tangkiu long hat blong mi from ransom. Bifo long ded blong papa, ransom i olsem wan tijing nomo we mi lanem. !Mi savegud ol vas we oli tokbaot ransom mo mi save olsem wanem blong eksplenem olgeta! Be taem ded i kasem famle blong mi, long taem ya nomo hat blong mi i glad we i glad tumas long olgeta gudgudfala samting ya we ransom bambae i karem i kam long yumi. Ransom ya i wan samting we i sas tumas.”—Jon 5:28, 29.
6 Taem ol dei oli pas mo dei blong Memoriol i stap kam klosap, i gud yu tektaem blong rerem hat blong yu from miting ya. (2 Kron. 19:3) Tingting dip long Baebol riding we i laenap wetem Memoriol ya, olsem i stap long Ridimgud Ol Tok Blong Baebol Evri Dei mo long 2004 Calendar. Sam famle oli laekem blong ridim bakegen ol japta ya 112-116 long buk ya Man We i Hae Moa taem oli mekem famle stadi blong olgeta. Sam narafala oli mekem sam risej long ol narafala buk we slef we i stret mo waes i givim. (Mat. 24:45-47) Mo yumi evriwan i save prea long Jeova wetem fulhat blong yumi long saed blong ransom ya. (Sam 50:14, 23) Yes long spesel taem ya we i klosap long Memoriol, i gud yumi gohed blong tingbaot lav we Jeova i gat long yumi, mo i gud yumi traem faenem sam rod blong soemaot lav ya we yumi gat long hem.—Mak 12:30; 1 Jon 4:10.