Jeova i Stap Givhan Long Olgeta We Oli Trastem Hem
1 Plante man oli ting se oli mas gat mane, paoa, mo gudhan blong mekem samting, nao oli save karem frut long laef blong olgeta. (Sam 12:4; 33:16, 17; 49:6) Be, Baebol i promes se ol man we oli onagud long Jeova mo trastem hem, ‘hem i stap givhan long olgeta, i stap lukaot gud long olgeta.’ (Sam 115:11) Bambae yumi tokbaot tu haf blong laef blong yumi we yumi mas trastem Jeova long hem.
2 Long Kristin Wok: Taem yumi gat wan tok blong givim long kongregesen no yumi tijim narafala long wok blong prij, yumi mas dipen long God. Tingbaot eksampol blong Jisas. Nating se hem i Pikinini blong God, be hem i no trastem prapa waes mo save blong hem, nogat. Hem i dipen fulwan long Papa blong hem long heven. (Jon 12:49; 14:10) !Yumi nidim moa blong mekem samting ya! (Prov. 3:5-7) Ol smosmol traehad blong yumi oli save givim ona long Jeova mo halpem ol narafala, sipos yumi mekem olgeta nomo long paoa blong Jeova.—Sam 127:1, 2.
3 Yumi soem se yumi dipen long Jeova taem yumi askem long hem long prea blong i lidim yumi mo givim tabu spirit blong halpem yumi. (Sam 105:4; Luk 11:13) Mo tu, yumi soem se yumi trastem God taem yumi yusum Tok blong hem Baebol, blong tijim ol man. Tok blong Baebol nomo i gat paoa blong tajem hat blong ol man mo jenisim laef blong olgeta. (Hib. 4:12) Taem yumi ‘givhan long ol man long paoa we God i givim long yumi,’ yumi leftemap nem blong Jeova.—1 Pita 4:11.
4 Blong Winim Ol Trabol: Yumi mas lukluk i go long Jeova blong i givhan long yumi taem yumi kasem trabol mo traem. (Sam 46:1) Maet bos blong yumi i no wantem givim spel long yumi blong go long wan asembli. Maet wan trabol i kasem yumi long famle. Ale, yumi soem se yumi trastem Jeova taem yumi prea long hem wetem fulhat blong yumi, mo taem yumi folem ol advaes we hem i givim tru long Tok blong hem mo ogenaesesen blong hem. (Sam 62:8; 119:143, 173) Ol man blong Jeova we oli mekem olsemia, oli luksave se Jeova i halpem olgeta long laef blong olgeta.—Sam 37:5; 118:13, 16.
5 Jeova i mekem promes ya se: “Man we i trastem mi, mo i putum tingting blong hem i stap strong long mi, mi bambae mi blesem hem.” (Jer. 17:7) !Yumi mas soem se yumi trastem Jeova long evri samting we yumi mekem!—Sam 146:5.