Program Blong Famle—Ol Miting Blong Kongregesen
1 Sipos yu yu wan Kristin papa no mama, yu wantem se ol pikinini blong yu oli gruap we oli lavem Jeova mo oli mekem wok blong hem, mo biaen, oli kasem laef we i no save finis long niufala wol ya we God i promes long hem. ?Olsem wanem yu save givhan long olgeta blong oli putum wosip blong Jeova long fasples long laef blong olgeta? Wan bigfala rod blong mekem olsem, hemia tru long eksampol blong yu. (Prov. 20:7) Wan sista i tingbaot eksampol we Kristin mama blong hem i soemaot, i se: “Mifala i neva gat kwestin long tingting blong mifala se bambae mifala i go long miting no nogat.” Fasin blong mama ya i stap strong oltaem long tingting blong gel blong hem.
2 ?Olsem wanem? ?Famle blong yu i kasem save from wanem yufala i mas go long ol miting blong kongregesen? Tijing we yumi kasem long ol miting ya i givim paoa long yumi blong gohed blong mekem wok blong God, mo taem yumi joen wetem ol brata blong yumi, hemia i rili leftemap tingting blong yumi. (Aes. 54:13; Rom. 1:11, 12) Be faswan risen blong ol miting ya, hemia blong yumi presem Jeova “long fes blong olgeta man blong [hem].” (Sam 26:12) Ol Kristin miting oli givim janis long yumi blong soemaot lav blong yumi long Jeova mo wosipim hem.
3 “Lukaot Gud”: Sipos yumi gat tangkiu from ol tabu miting, bambae yumi “lukaot gud” se yumi no tekem fasin ya blong mestem sam miting blong mekem samting we i no impoten. (Efes. 5:15, 16; Hib. 10:24, 25) Taem yu mekem program blong famle blong yu, i gud we fastaem yu raetemdaon taem blong ol miting blong kongregesen. Biaen, yu mas lukaot gud blong no letem wan narafala samting i tekem ples blong ol miting ya. Meksua se fasin blong joen long ol miting i kam wan impoten samting long famle blong yu.
4 Ol stori blong ol brata blong yumi we oli winim ol defren trabol we i blokem olgeta blong joen long ol miting mo ol asembli, oli tajem hat blong yumi. Nating se maet yu no fesem ol trabol olsem long laef blong yu, be i klia se yu tu yu mas fesem traem. Oltaem Setan i stap mekem se i moa had long ol man blong Jeova blong oli wosipim hem. Be, yu mas save se ol pikinini blong yu bambae oli makem strong tingting blong yu blong mekem famle i joen oltaem long ol miting blong kongregesen. Yes, sipos yu mekem olsem, yu save givim wan presen long saed blong spirit long olgeta we bambae oli no save fogetem.