Program Blong Nekis Spesel Dei Asembli
God i wokem ae blong yumi long fasin we i nambawan tumas. (Sam 139:14) Be ae i no save lukluk evri samting wantaem, hem i naf blong lukluk wan samting fastaem afta narawan. Samting ya i tru long saed blong prapa ae blong yumi mo ae blong yumi long saed blong spirit tu. Sipos yumi wantem se ae blong yumi long saed blong spirit i klia gud, yumi mas tingting nomo blong mekem ol samting we God i wantem. !Taem yumi tingbaot ol pleplei we oli stap kam moa plante long wol blong Setan, i stret nomo we stamba tok blong spesel dei asembli blong sevis yia 2006 hemia, “Mekem Ae Blong Yu i Klia Gud”!—Mat. 6:22, NTB.
?Wanem samting yumi save mekem blong Jeova i blesem yumi? (Prov. 10:22) Haf ya “Kasem Blesing From We Ae Blong Yu i Klia Gud” bambae i tokbaot kwestin ya. Bambae oli askem kwestin long sam brata mo sista, mo ol ansa blong olgeta bambae oli soemaot olsem wanem yumi save kasem gudfala frut taem yumi folem ol rul blong Baebol long laef blong yumi. Faswan tok blong brata we i visitim yumi hemia, “Long Wol Ya We i Rabis, Yu Mas Mekem Ae Blong Yu i Klia Gud Oltaem.” Bambae tok ya i givim woning long yumi long ol samting we oli save mekem laef blong yumi i fasfas, nao sloslo yumi no moa strong long saed blong spirit. Bambae yumi lanem tu wanem samting yumi mas mekem blong “jusumaot gudfala samting.”—Luk 10:42.
?Olsem wanem ol papa mama mo ol narafala, oli save leftemap tingting blong ol yangfala Kristin, blong oli putum ol samting long saed blong spirit i stap long fasples long laef blong olgeta? Long tufala haf ya, “Ol Papa Mama We Oli Sutum Ara Blong Olgeta i Go Stret Long Mak” mo “Ol Yangfala We Oli Traehad Blong Kasem Ol Mak Long Saed Blong Spirit,” bambae sam papa mama mo sam yangfala oli tokbaot impoten kwestin ya. (Sam 127:4) Laswan tok blong elda we i visitim yumi, i tokbaot olsem wanem yumi wanwan, famle blong yumi, mo kongregesen blong yumi, i save gohed wetem ogenaesesen blong Jeova.
Nomata sipos yumi jes save trutok nomo no yumi stap mekem wok blong Jeova plante yia finis, i impoten we yumi ‘mekem ae blong yumi i klia gud.’ Program blong spesel dei asembli bambae i givhan long yumi blong mekem samting ya.