Statem Baebol Stadi Long Doa Blong Ol Man Mo Long Telefon
1, 2. ?Olsem wanem yumi save jenisim fasin blong yumi, blong yumi save mekem Baebol stadi long ol man we oli bisi?
1 Tede ol man oli bisi. Be plante oli intres long ol samting long saed blong spirit. ?Olsem wanem yumi save givhan long olgeta blong oli kasem ol samting we oli nidim long saed blong spirit? (Mat. 5:3) Plante pablisa oli mekem stadi long ol man long doa blong olgeta nomo no long telefon. ?Yu yu save yusum rod ya blong mekem moa long wok blong prij?
2 Blong statem ol Baebol stadi, evri taem we yumi faenem man yumi mas rere blong soemaot olsem wanem blong mekem Baebol stadi. ?Olsem wanem mo weples yumi save mekem olsem?
3. ?From wanem i gud blong soemaot olsem wanem blong stadi Baebol long faswan taem we yumi prij long ol man, mo olsem wanem yumi save mekem samting ya?
3 Long Doa Blong Ol Man: Taem yu mitim wan man we i glad blong storian long saed blong Baebol, yu save openem buk i go long haf we yu rere long hem finis, olsem faswan haf blong lesen 1 long buklet ya Wanem. Ale, ridim haf ya, askem kwestin, mo tokbaot wan no tu vas blong Baebol we oli stap. Plante taem, yu save mekem samting ya long faef no ten minit nomo, taem yu stanap long doa blong man. Sipos man ya i glad long storian ya, mekem plan wetem hem blong kambak bakegen blong tokbaot wan no tu haf we oli kam biaen.—Sam advaes blong askem stret long man blong hem i stadi, i stap long Kingdom Wok Blong Yumi blong Jenuware 2002, pej 6.
4. ?Olsem wanem yu save statem wan stadi long doa blong man taem yu gobak blong visitim hem?
4 Yu save yusum sem rod ya blong stadi Baebol taem yu gobak blong visitim ol man. Olsem nao, yu save soemaot buklet ya Wanem, lesen 2, haf 1-2, mo tokbaot nem blong God. Long nekis visit, yu save yusum haf 3-4 blong tokbaot wanem samting Baebol i talem long saed blong ol fasin blong Jeova. Long nekis visit bakegen, yu save storian long haf 5-6 mo pija long pej 5, blong soemaot olsem wanem fasin blong stadi long Baebol i givhan long yumi blong kasem save long Jeova. Yu save tokbaot olgeta samting ya taem yu stap stanap long doa blong man nomo.
5, 6. (a) ?From wanem sam man oli laekem moa blong yusum telefon blong stadi Baebol? (b) ?Wanem rod we yumi save folem blong askem man blong yusum telefon blong stadi?
5 Long Telefon: Sam man oli glad moa blong yusum telefon blong mekem stadi, i bitim we oli stadi stret long fored blong wan pablisa. Tingbaot stori ya: Wan sista i stap prij long ol haos wanwan, nao hem i mitim wan yangfala woman we i wan mama. Woman ya i gat wan wok we i karem bighaf blong taem blong hem. Taswe sista ya i no save faenem hem bakegen long haos blong hem. Ale, hem i tingbaot se hem i save traem toktok long hem long telefon. Yangfala woman ya i eksplenem se hem i no rili gat taem blong tokbaot Baebol. Sista ya i talem se: “Long 10 no 15 minit, yu save lanem ol niufala samting, nating sipos yumitu storian long telefon nomo.” Yangfala woman ya i ansa se: “!Sipos yumitu storian long telefon, ale mi agri!” Nao tufala i gohed evri taem blong yusum telefon blong mekem stadi.
6 ?Olsem wanem? ?Yu ting se samfala we yu stap go visitim olgeta bambae oli agri blong yusum telefon blong stadi? Yu save mekem olsem sista ya i bin mekem, sipos no, yu save talem se: “Sipos yu wantem, yumitu save yusum telefon blong storian long saed blong Baebol. ?Rod ya i moagud long yu?” Taem yumi jenisim program mo fasin blong prij blong mekem i laenap wetem laef blong ol narafala we oli wantem stadi Baebol, yumi save givhan long olgeta blong “faenem save blong God.”—Prov. 2:5, NW; 1 Kor. 9:23.