Kipimgud

Givhan Long Ol Baebol Stadi Blong Oli Gohed Gud

Long pepa ya, i gat ol impoten poen we oli bin kamaot long ol Kingdom Wok Blong Yumi, long ol haf ya ‘Givhan Long Ol Baebol Stadi Blong Oli Gohed Gud.’ Yumi evriwan i mas kipimgud pepa ya, blong yumi save lukluk bakegen taem yumi mekem Baebol stadi. Mo tu, brata we i lidim miting blong prij i save yusum ol poen ya, mo elda we i lukaot long wok blong prij i save yusum pepa ya blong mekem tok, taem hem i visitim ol buk stadi.

Haf 1: ?Wetaem Yumi Save Raetem Wan Baebol Stadi Long Ripot Blong Yumi?

Sipos oltaem yu visitim wan man we i intres blong storian long Baebol, mo yu folem ol save long wan buk we yumi yusum blong stadi, nating sipos storian i sot nomo, be hemia wan Baebol stadi. Sipos yu soem long hem olsem wanem blong mekem Baebol stadi, mo afta long samting ya yu mekem stadi tu taem wetem hem, mo sipos i luk olsem se man ya bambae i gohed blong mekem stadi, ale, yu save raetem Baebol stadi ya long ripot blong yu.​—⁠km 7/04 pej 1.

Ol Buk We i Gud Blong Yusum Blong Stadi

◼ ?Wanem Samting We God i Wantem Yumi Blong Mekem?

◼ Save Blong Lidim Yu Long Laef We i No Save Finis

◼ Wosipim Trufala God

◼ Yumi save yusum buklet ya, !Yu Save Kam Fren Blong God! blong stadi wetem ol man we oli no skulgud mo we oli no save rid gud.

Haf 2: Reregud Bifo We Yu Mekem Stadi

Yumi mas givimaot save long fasin we i kasem hat blong studen. Blong mekem olsemia, yumi mas reregud mo tingbaot wanem bambae i givhan long man ya we yumi mekem stadi long hem.​—⁠km 8/04 pej 1.

Olsem Wanem Blong Reregud

◼ Lukluk nem blong japta, ol smol stamba tok, mo ol pija long japta no lesen we bambae yutufala i stadi long hem.

◼ Faenem ansa blong olgeta kwestin we oli stap, mo putum laen aninit long ol impoten wod nomo we oli soemaot ansa.

◼ Jusum sam vas we bambae yutufala i save ridim long stadi. Raetem ol smosmol not long saed blong pej long buk blong yu.

◼ Mekem rere wan sot tingtingbak long ol impoten poen.

Mekem Save i Laenap Wetem Studen

◼ Prea long Jeova long saed blong studen blong yu mo wanem samting we hem i nidim blong i save gohed gud.

◼ Tingbaot ol poen we maet hem i faenem i had blong kasem save long olgeta no bilif long olgeta.

◼ Tingting long kwestin ya: ?Studen ya i mas kasem save long wanem samting mo kamgud moa long wanem samting, blong hem i save gohed gud long saed blong spirit? ?Olsem wanem mi save kasem hat blong hem?

◼ Blong givhan long studen blong kasem mining blong sam poen no vas, i gud blong mekem rere wan pijatok, sam tok blong eksplenem, no sam kwestin.

Haf 3: Yusum Gud Baebol

Taem yumi mekem ol Baebol stadi, mak blong yumi i blong ‘pulum ol man oli kam man blong Jisas.’ Yumi mekem olsem taem yumi halpem olgeta blong oli kasem save long ol tijing blong Baebol mo blong oli mekem i wok long laef blong olgeta. (Mat. 28⁠:​19, 20; 1 Tes. 2⁠:13) Taswe, taem yumi mekem stadi, yumi mas yusum Baebol oltaem.​—⁠km 11/04 pej 4.

Yusum Baebol Blong Tijim Olgeta

◼ Soemaot long studen olsem wanem blong faenem ol vas long prapa Baebol blong hem.

◼ Faenem mo tokbaot ol vas we oli pruvum se bilif blong yumi i stanap long Baebol.

◼ Yusum ol kwestin. I moagud blong askem studen blong eksplenem ol vas blong Baebol long yu, i bitim we yu yu eksplenem long hem.

◼ Mekem i klia mo isi blong kasem save. Yu no mas traem blong eksplenem evri smosmol poen long wan vas. Yu mas yusum olgeta nomo we yu nidim blong makem poen we yu stap tokbaot.

◼ Soem olsem wanem blong mekem save i wok. Halpem studen blong luksave olsem wanem ol vas blong Baebol oli save wok long laef blong hem.

Haf 4: Trenem Studen Blong i Mekem Rere Stadi Blong Hem

Studen we i tekem taem blong ridim ol haf long stadi, i makem ol ansa, mo i tingbaot olsem wanem blong yusum prapa tok blong hem blong ansa, bambae i gohed kwik long saed blong spirit. Taswe, afta we yu statem wan Baebol stadi, yu wetem studen, yutufala i mas mekem rere wan stadi tugeta, blong yu soemaot long hem olsem wanem blong rere. Long bighaf blong ol studen, i gud blong mekem rere wan ful japta no wan ful stadi wetem olgeta.​—⁠km 12/04 pej 1.

Makem Ansa Mo Raetem Not

◼ Eksplenem olsem wanem blong faenem ol stret ansa long ol kwestin long buk.

◼ Soemaot buk blong yu long studen, blong hem i luk olsem wanem yu yu putum laen aninit long ol stamba wod nomo no ol stamba tingting.

◼ Halpem studen blong kasem save se ol wanwan vas we oli stap, oli joen wetem ol wanwan poen long haf ya we yutufala i stap rerem. Soem long hem olsem wanem blong raetem ol smosmol not long saed blong pej long buk blong hem.

Lukluk Ol Bigfala Poen Mo Tingtingbak

◼ Eksplenem long studen se bifo we hem i mekem rere stadi blong hem, hem i mas lukluk nem blong japta, ol smol stamba tok, mo ol pija.

◼ Talem long studen se afta we hem i mekem rere stadi blong hem, i gud sipos hem i tekem smol taem blong tingtingbak long ol bigfala poen long stadi.

Haf 5: Jusumaot Hamas Haf Blong Stadi Long Hem

Blong skelem se bambae yutufala i mekem hamas haf long wan stadi, yu mas tingbaot hamas save we yu mo studen blong yu yutufala i gat, fasin blong yutufala, mo ol narafala wok we yutufala i mas mekem long laef blong yutufala.​—⁠km 1/05 pej 1.

Bildimap Strong Bilif

◼ I moa impoten we yumi givhan long studen blong kasem save gud long Tok blong God, i bitim we yumi hareap blong kavremap plante paragraf long wan stadi.

◼ Spenem naf taem wetem studen blong hem i kasem save mo akseptem ol samting we hem i lanem.

◼ Tekem taem blong pulum tingting blong studen i go long ol stamba vas we oli sapotem ol tijing we hem i stap lanem.

No Slo Tumas Long Stadi

◼ Sipos wan studen i laekem blong storian long ol samting long laef blong hem, yutufala i save tokbaot ol samting ya afta we stadi i finis.

◼ Yu no mas toktok bitim mak long taem blong stadi. Yu no mas tokbaot plante tumas poen no ekspiriens, from we samting ya i save mekem se studen i no kasem klia ol stamba tijing blong Baebol.

Haf 6: Taem Studen i Askem Wan Kwestin

Afta we man i kasem save long fasin blong mekem Baebol stadi, i moagud blong tokbaot ol tijing blong Baebol folem wan stret oda, i bitim we yu tokbaot wan poen ale yu jam i go long narawan. Long fasin ya, yu givhan long studen blong kasem stret save we i olsem wan gudfala fandesen blong bilif blong hem, mo blong i gohed long saed blong spirit.​—⁠km 2/05 pej 6.

Gat Fasin Luksave

◼ Yu save ansa wantaem nomo sipos kwestin ya i joen wetem poen we yutufala i stap stadi long hem.

◼ Sipos kwestin ya i no joen wetem stadi no i nidim we yu lukaot moa save long hem fastaem, yutufala i save tokbaot kwestin ya long wan narafala taem. I gud blong raetemdaon ol kwestin olsem.

◼ Sipos studen i faenem i had blong agri wetem wan tijing, i gud blong givim moa save long hem long saed ya.

◼ Sipos studen ya i no agri yet, lego kwestin ya i stap fastaem mo gohed long stadi.

Gat Tingting Daon

◼ Sipos yu no savegud ansa blong wan kwestin, yu no mas talem prapa tingting blong yu.

◼ Tijim studen sloslo blong hem wan i lukaotem ol save.

Haf 7: Mekem Prea Long Taem Blong Stadi

I nidim blesing blong Jeova blong ol Baebol studen oli save gohed long saed blong spirit. Taswe, i stret nomo blong mekem wan prea long stat mo long en blong stadi.​—⁠km 3/05 pej 4.

Olsem Wanem Yumi Save Stat Blong Mekem Prea Long Wan Stadi

◼ Taem yu stat blong stadi wetem olgeta we oli laekem Baebol finis, long faswan stadi nomo yu save mekem prea.

◼ Wetem ol narafala, maet yu mas traem luksave stret taem blong stat blong mekem prea.

◼ Yu save yusum Ol Sam 25⁠:​4, 5 mo 1 Jon 5⁠:14 blong givhan long studen blong kasem save from wanem yutufala i mas prea.

◼ Yu save yusum Jon 15⁠:16 blong eksplenem se i impoten blong prea long Jeova tru long Jisas Kraes.

Yumi Tokbaot Wanem Long Prea

◼ I stret blong yu presem Jeova olsem Stamba blong ol tijing we yutufala i stadi long hem.

◼ Yu save talem ol tok we i soemaot se yu rili intres long studen ya.

◼ Yu save talem tangkiu from ogenaesesen we Jeova i stap yusum.

◼ Yu save askem long Jeova blong i blesem ol traehad we studen ya i mekem blong folem ol samting we hem i lanem.

Haf 8: Lidim Ol Studen Oli Go Long Ogenaesesen

Taem yu mekem Baebol stadi, mak blong yu i no jes blong tijim studen long ol tijing blong Baebol nomo, be i blong givhan long hem tu blong i joen long Kristin kongregesen. Evri wik, tekem sam minit long stadi blong tokbaot wan poen long saed blong ogenaesesen blong Jeova.​—⁠km 4/05 pej 6.

Ol Miting Blong Kongregesen

◼ Tokbaot ol wanwan miting blong kongregesen. Long faswan stadi nomo, yu save invaetem olgeta blong oli kam long miting.

◼ Tokbaot ol bigfala poen we oli kamaot long ol miting.

◼ Taem Memoriol, asembli, mo spesel wik, oli stap kam klosap, tekem taem blong eksplenem gud ol miting ya long fasin we i mekem se bambae studen i glad blong stap long ol spesel taem ya.

◼ Yusum ol pija we oli stap long ol buk blong yumi blong givhan long olgeta blong luk wanem i stap hapen long ol miting.

◼ Leftemap tingting blong olgeta blong oli ridim buklet ya Ol Witnes Blong Jeova​—⁠Oli Joengud Blong Mekem Wok Blong God Long Olgeta Ples Blong Wol.

Yusum Ol Vidio Kaset Blong Pulum Studen Blong Tinghae Long Ogenaesesen

◼ Jehovah’s Witnesses​—⁠The Organization Behind the Name

◼ Our Whole Association of Brothers

◼ United by Divine Teaching

◼ To the Ends of the Earth

Haf 9: Mekem Ol Studen Oli Rere Blong Tekem Janis Blong Prij

Taem ol Baebol studen oli stat blong bilivim ol samting we oli stap lanem, bambae oli wantem talemaot ol save ya.​—⁠km 5/05 pej 1.

Leftemap Tingting Blong Olgeta Blong Oli Prij

◼ ?I gat sam fren mo famle we hem i save askem olgeta blong oli joen long stadi?

◼ ?I gat sam fren blong hem long wok, long skul, mo sam narafala bakegen, we oli bin soemaot se oli intres long gud nius?

Trenem Olgeta Blong Oli Talemaot Bilif Blong Olgeta

◼ Wanwan taem long stadi, yu save askem long studen se, “?Bambae yu yusum Baebol olsem wanem blong eksplenem tijing ya long famle blong yu?”

◼ Halpem studen blong kasem save se i mas gat respek mo kaen fasin, taem hem i tokbaot Jeova mo stamba tingting blong hem long ol narafala.

◼ Ol studen oli save yusum buklet ya, Ol Witnes Blong Jeova​—⁠Oli Joengud Blong Mekem Wok Blong God Long Olgeta Ples Blong Wol, blong givhan long ol fren mo famle blong oli kasem save long bilif mo wok blong yumi we i stanap long Baebol.

Haf 10: Trenem Ol Studen Long Wok Blong Prij

Taem ol elda oli talem se wan Baebol studen i naf blong kam pablisa we i no baptaes, studen ya i save joen wetem kongregesen blong prij.​—⁠km 6/05 pej 1.

Tija Mo Studen Tufala i Mekem Rere Tugeta

◼ Soem long niufala pablisa ya weples hem i save faenem ol fastok blong prij.

◼ Givhan long hem blong jusum wan fastok we i isi mo i stret long ples blong yufala.

◼ Leftemap tingting blong hem blong yusum Baebol long wok blong prij.

◼ Mekem pleplei fastaem wetem studen. Soem long hem olsem wanem blong ansa wetem kaen fasin long ol toktok we ol man oli stap talem oltaem blong blokem yumi.

Prij Tugeta

◼ Letem studen i wajem olsem wanem yu yu toktok folem pleplei we yutufala i bin rere long hem.

◼ Tingbaot fasin blong studen mo samting we hem i naf blong mekem. Samtaem, maet i moa gud sipos hem i jes toktok smol nomo, ale yu nao yu gohed blong toktok.

◼ Givhan long niufala pablisa blong i gat wan program blong joen oltaem long wok blong prij.

Haf 11: Halpem Ol Studen Blong Mekem Ol Visit

Yumi mekem rod blong visitim man bakegen, long faswan taem we yumi prij long hem. Leftemap tingting blong studen, blong i rili intres long olgeta we hem i prij long olgeta. Sloslo, trenem hem blong pulum ol man blong oli talemaot tingting blong olgeta, trenem hem blong lesin long olgeta, mo blong makem ol samting we oli wari long hem.​—⁠km 7/05 pej 1.

Mekem Rere Blong Gobak

◼ Tokbaot ol samting we i bin hapen long faswan taem we studen i storian wetem man, mo halpem hem blong jusum wan poen we i laenap wetem intres blong man.

◼ Mekem rere wan smol storian wetem studen, yusum wan vas blong Baebol mo wan haf insaed long wan buk blong stadi.

◼ Mekem rere wan kwestin we hem i save askem long en blong storian.

Tinghevi Long Ol Visit

◼ Leftemap tingting blong studen, blong hem i gobak kwiktaem long ol man we oli soem intres.

◼ Halpem studen blong kasem save se hem i nidim strong tingting blong gobak plante taem, blong traem faenem ol man we oli no stap.

◼ Soem long niufala pablisa olsem wanem blong mekem plan wetem man blong haos blong gobak, mo givhan long hem blong kasem save se hem i mas holem promes ya blong hem.

Haf 12: Halpem Ol Studen Blong Oli Statem Mo Mekem Ol Baebol Stadi

I impoten tumas we yu soemaot gudfala eksampol long wok blong prij, olsem Jisas i bin mekem. Taem studen i lukluk eksampol blong yu long wok blong prij, bambae hem i kasem save se yumi gobak blong luk ol man, blong yumi statem Baebol stadi wetem olgeta.​—⁠km 8/05 pej 1.

Askem Man Blong Stadi

◼ Eksplenem long studen se i no nid blong eksplenem evri smosmol samting long saed blong stadi.

◼ Plante taem i moagud blong yusum wan no tu haf blong wan buk blong stadi, blong soemaot olsem wanem blong stadi.

◼ Tingtingbak mo mekem pleplei folem wan long ol fastok blong statem Baebol stadi.​—⁠km 8/05 pej 8; km 1/02 pej 6.

Trenem Studen Blong i Tijim Narafala

◼ Leftemap tingting blong studen blong joen long Tiokratik Skul.

◼ Askem long niufala pablisa ya blong i joen long sam Baebol stadi wetem yu. Maet hem i save mekem wan smol haf long ol stadi ya tu.