Gat Gudhan Blong Mekem Man i Tingting Gud

1. ?Bambae yumi lukluk long wanem stori blong Baebol, mo from wanem?

¹ Long Ol Wok 13⁠:​16-41, yumi ridim wan tok we Pol i givim long haos prea blong Antiok, long Pisidia. Hemia i olsem wan gudfala eksampol long yumi, olsem wanem blong mekem man i tingting gud. Pol i tingbaot ol samting we i kamaot long laef blong olgeta we oli lesin long hem, mo tingting blong olgeta, ale hem i mekem tok blong hem i laenap gud wetem olgeta. Taem yumi lukluk long stori ya, yumi mas tingbaot olsem wanem yumi save mekem sem samting long wok blong prij.

2. ?Yumi lanem wanem samting long fasin blong Pol blong statem tok blong hem?

² Faenem Wan Poen We Yutufala i Agri Long Hem: Bigfala tingting long tok blong Pol, hemia impoten wok we Jisas i mekem blong givhan long stamba tingting blong God i kamtru. Be hem i no statem tok blong hem wetem poen ya. Defren olgeta, hem i tokbaot wan samting we hem wetem ol man Jiu we oli stap lesin, oli agri long hem, hemia histri blong ol man Isrel. (Wok 13⁠:​16-22) Long sem fasin, yumi save pulum ol man blong oli lesin sipos yumi faenem wan poen we oli agri long hem. Yumi save mekem olsem sipos yumi askem ol gudfala kwestin blong pulum olgeta blong oli talemaot tingting blong olgeta, mo sipos yumi lesingud taem oli toktok blong luksave wanem samting we oli ting se i rili impoten.

3. ?Wanem samting i mekem se i had long olgeta we oli lesin long Pol, blong oli bilif se Jisas nao i Mesaea ya we God i promes blong sanem?

³ Taem Pol i stap tokbaot histri blong ol man Isrel, hem i mekem olgeta oli tingtingbak long promes blong God, se wan man long laen blong Deved bambae i sevem ol man. Be plante man Jiu oli stap wet long wan strong man blong faet, we bambae i brekem paoa we Rom i gat long olgeta, mo i mekem se neson ya i gat moa paoa i bitim ol narafala neson. Oli savegud se ol lida blong skul blong ol man Jiu long Jerusalem oli agensem Jisas, mo oli putum hem long han blong ol haeman blong Rom blong oli kilim hem i ded. ?Olsem wanem Pol i save pulum olgeta blong oli bilif se hemia nao Mesaea we God i promes blong sanem?

4. ?Olsem wanem Pol i pulum ol man Jiu blong oli tingting gud?

⁴ Jenisim Toktok Blong Yu: Pol i kasem save long tingting blong olgeta we oli lesin long hem, taswe hem i yusum Baebol blong storian wetem olgeta long ol samting we oli agri long hem finis. Olsem nao, hem i tokbaot Jisas se hem i pikinini blong Deved, mo se Jon Baptaes, we ol man oli tingbaot hem olsem wan profet blong God, i talemaot se Jisas i hu. (Wok 13⁠:​23-25) Pol i soemaot se taem ol lida blong skul oli sakemaot Jisas mo oli jajem hem se i mas ded, oli “mekem ol tok blong ol profet ya oli kamtru.” (Wok 13⁠:​26-28) Mo tu, Pol i eksplenem se samfala oli luk stret long ae blong olgeta se Jisas i girap bakegen long ded, nao hem i pulum tingting blong olgeta i go long ol tok blong Baebol we oli savegud long hem, hemia ol tok we Jisas i mekem i kamtru taem hem i girap bakegen.​—⁠Wok 13⁠:​29-37.

5. (a) ?Olsem wanem Pol i jenisim toktok blong hem taem hem i stap prij long ol man Gris? (b) ?Olsem wanem yumi save folem eksampol blong Pol taem yumi prij long ol man long ples blong yumi?

⁵ Long wan narafala taem, Pol i stap toktok long ol man Gris long Atens. Long taem ya, hem i jenisim toktok blong hem. (Wok 17⁠:​22-31) Be bigfala tingting long ol tok blong hem i stap sem mak nomo. Mo long tufala taem ya evriwan, ol tok blong hem i karem gudfala frut. (Wok 13⁠:​42, 43; 17⁠:34) Long sem fasin, tede yumi save karem gudfala frut long wok blong prij, sipos yumi faenem wan poen we ol man oli agri long hem, mo sipos yumi jenisim toktok blong yumi blong mekem i laenap wetem laef mo tingting blong olgeta.