Skul We i Givhan Long Yumi Blong Wokem Ol Save We Yumi Lanem
1 Taem yumi tokbaot ol haf we oli stap long Program blong Tiokratik Skul blong 2006, yumi mas traehad blong mekem se ol tijing ya blong Baebol oli givhan long yumi. Yumi mekem olsem taem yumi joenem olgeta wetem tabu wok we yumi stap mekem mo wetem evridei laef blong yumi. Yumi mas gat strong tingting blong mekem ol samting we yumi lanem i wok.—Jon 13:17; Fil. 4:9.
2 Givim Ol Ansa: Long program blong yia 2006, oli ademap wan moa minit blong kongregesen i save talem sam bigfala poen long Baebol riding. Hemia i min se brata we i mas mekem haf ya i mas lukaot gud blong no bitim taem blong hem. Hem i mas mekem tok blong hem long faef minit nomo, be i no long sikis minit. Olgeta we oli ansa tu oli mas lukaot gud long saed blong taem. Sipos oli tingting gud fastaem, oli save givim ansa we i tekem 30 seken nomo blong tokbaot wan gudfala poen. Olsem nao, bambae i gat taem blong ten man oli save givim gudfala ansa long faef minit ya.
3 Ol Tok We i Tijim Man: Ol bigfala poen long Baebol riding mo Fasin blong Toktok, oli mas soemaot olsem wanem blong yusum ol save ya long wok blong prij mo long evridei laef blong yumi. Brata we i mekem tufala haf ya i mas pulum olgeta long kongregesen blong oli wantem tekem aksen. Be hem i mas mekem moa yet. Hem i mas talemaot stret se oli mas mekem wanem, soem olsem wanem blong mekem, mo soemaot olsem wanem samting ya i save givhan long olgeta. Hem i save talem se: “Folem vas ya, yumi mas mekem olsem,” no “Yumi save yusum ol vas ya long wok blong prij olsem.” Ol elda mo ol man blong givhan oli save samting we i stap hapen long ples blong olgeta, taswe oli mas traehad blong soemaot klia olsem wanem blong mekem ol save ya i wok.
4 Wan gudfala rod blong pulum ol man blong oli mekem save blong olgeta i wok, hemia blong tokbaot sam eksampol long Baebol. Afta we brata i tokbaot wan stori long Baebol, hem i save talem se: “Samting ya i save hapen long yu tu.” Brata ya i mas meksua se stori blong Baebol we hem i yusum olsem eksampol, i mas laenap wetem ol vas raonabaot long hem, wetem Baebol, mo wetem ol buk blong ‘slef we i stret mo waes.’—Mat. 24:45, NW.
5 Man we i waes, hem i naf blong yusum gud save blong hem, mo hem i kasem save long evri haf blong wan bisnes. Yes, ‘waes hem i nambawan samting.’ (Prov. 4:7) Taem yumi stap gohed blong kasem waes tru long Tiokratik Skul, i gud yumi lanem tu blong givimaot waes ya long ol narafala.