?Yumi Tokbaot Wanem Long Ol Magasin?

Wajtaoa Okt. 1

“Yumi mas gat fasin no fraet blong yumi save fesem ol traem long laef blong yumi. ?Be yumi nidim wanem blong gohed blong holem fasin ya blong no fraet? [Letem man i ansa.] ?Yu yu agri se trufala bilif long God i save halpem yumi blong holem fasin ya blong no fraet? [Ridim Ol Sam 27⁠:14 mo openem magasin long pej 26.] Magasin ya i eksplenem olsem wanem yumi save putum tingting blong yumi i stap strong long Jeova mo gat fasin ya blong no fraet.”

Wekap! Okt./Dis. (Bislama)

“Yumi evriwan i bin lusum wan man we yumi laekem hem tumas long ded. ?Yu ting se yumi save mekem sam samting blong givhan long olgeta ya we oli ded finis? [Letem man i ansa.] Magasin ya i soemaot ansa we Baebol i givim long kwestin ya. Mo tu hem i tokbaot wan promes we i save mekem yumi haremgud.” Ridim Jon 5⁠:​28, 29. Afta, soem haf blong magasin we i stat long pej 22.

Wajtaoa Nov. 1

“Long taem blong yumi i gat plante defdefren tingting long saed blong fasin blong tijimgud pikinini. ?Yu ting se i gat wan rod blong ol papa mama oli save faenem advaes we oli save trastem? [Letem man i ansa. Biaen ridim Ol Sam 32⁠:⁠8.] Magasin ya i talemaot ol advaes blong Baebol we i save givhan bigwan blong tijimgud pikinini.”

Wekap! Nov. (Franis/Inglis)

“?Olsem wanem? ?Yu yu tingbaot samtaem se, sipos i gat wan God we i lavem yumi, mo we i gat stret fasin mo olgeta paoa, from wanem i gat plante man we oli safa? [Letem man i ansa.] Makem ol tok long vas ya we i soem from wanem i gat fasin safa. [Ridim 1 Jon 5⁠:19.] Magasin ya i yusum ol tok blong Baebol blong eksplenem wanem samting God i stap mekem blong finisim fasin safa.”