?Bambae Yu Mekem Wanem Long Laef Blong Yu?
1 Samtaem ol man oli askem long ol pikinini se: “?Taem yu kam bigwan, yu yu wantem mekem wanem?” ?Olsem wanem? ?Taem yu yu wan smol boe, yu bin talem se yu wantem kam wan kaoboe? ?Wan man blong kilim faea? ?Wan seket elda? ?Taem yu yu wan smol gel, yu bin talem se yu wantem kam wan woman blong singsing? ?Wan nes? ?Wan misinari? Naoia yu yu bigman finis mo yu mas askem narafala kwestin ya: ‘?Bambae mi mekem wanem long laef blong mi?’ ?Yu yu rere blong tekem desisen blong yu?
2 Blong givhan long yu blong tekem beswan desisen, ogenaesesen blong Jeova i wokem DVD ya Young People Ask—What Will I Do With My Life? Plis yu wajem DVD ya, mo tingting gud long evri haf we i stap insaed, hemia drama, samfala we oli ansa long kwestin, mo sam narafala haf bakegen. Long bokis ya “Main Menu,” yu save luk ol defren haf we oli stap insaed long DVD ya.
3 Drama: Taem yu stap wajem drama, traem ansa long ol kwestin ya: (1) Kristin Grik haf blong Baebol i tokbaot Timoti. ?Wanem samting long laef blong hem we i semak long laef blong Andre? (Wok 16:1; 1 Tim. 4:8; 2 Tim. 1:5) (2) ?Olsem wanem oli traem fosem Andre blong i kam nambawan man blong resis, mo hu i fosem hem? (3) ?Hu i gat paoa long Timoti mo Andre, nao tufala i tekem gudfala desisen, mo oli gat paoa long tufala olsem wanem? (2 Tim. 1:1-4; 3:14, 15) (4) ?Olsem wanem tok we i stap long Matiu 6:24 mo Filipae 3:8 i gat paoa long Andre, mo olsem wanem i save gat paoa long yu?
4 Sam Haf We Oli Jusum: Afta we yu wajem fulwan drama ya, lukluk bakegen ol haf ya, mo ansa long ol kwestin ya. “Pol Mo Timoti”: ?Wanem laswan advaes we Pol i talem long Timoti? (2 Tim. 4:5) “Givim Bes Blong Yu Long Jeova”: ?Wanem ol mak we yu yu traehad blong kasem long saed blong wok blong God? “Tekem Saed Blong Jeova”: ?Olsem wanem yumi save faenem trufala glad? “Advaes Blong Bubu Woman”: ?From wanem i rong blong wantem kam wan impoten man long wol ya blong Setan? (Mat. 4:9) “No Tingtingbak Wetem Sore”: ?Wanem samting we yu faenemaot se i save givhan long yu blong kasem glad long laef blong yu?—Prov. 10:22.
5 Samfala We Oli Ansa Long Kwestin: ?Taem yu stap wajem wanwan long ol haf ya, wanem samting we yu luk se yu save mekem blong givim bes blong yu long Jeova? (1) “?Givim Ful Laef Blong Yu Long God, No Yusum Laef Blong Yu Blong Ronem Ol Samting We Oli Blong Lus Nomo?” (1 Jon 2:17); (2) “Lanem Blong Haremgud Long Wok Blong Prij.” (Sam 27:14); mo (3) “Wan Doa We i Open Blong Mekem Wok Blong God.”—Mat. 6:33.
6 Tingtingbak: ?Yu yu save ansa? (1) ?Wanem wok we brata ya mo sista ya i wantem kasem, mo from wanem? (2) ?Tufala i wingud long wok ya? (3) ?Wetaem tingting blong tufala i jenis? (2 Kor. 5:15) (4) ?Wanem ol tiokratik wok we i tekem ples blong narafala wok blong tufala, mo from wanem tufala i harem se tufala i no save mekem tufala wok wantaem? (5) ?Tufala i sore from we tufala i bin jenisim ol mak we tufala i traehad blong kasem? (6) ?Wanem toktok blong tufala we i pulum yu blong tingbaot, rod we yu mas jusum long laef blong yu?
7 Sam Narafala We Oli Ansa Long Kwestin: ?Long haf ya we oli ansa long kwestin, wanem samting we yu lanem we i save mekem se yu joen moa long wok blong Jeova? (1) “Stadi Wanwan i Impoten,” (2) “Ol Narafala Rod Blong Prij,” (3) “Wok Long Betel,” (4) “Trening Long Gilead Blong Kam Misinari,” mo (5) “Ministeriol Trening Skul.” Lukluk bakegen “Index Blong Ol Buk Mo Magasin We Oli Tokbaot Ol Save Ya,” mo ridim ol haf we yu yu intres moa long olgeta.
8 ?Olsem wanem? ?Yu yu save finis wanem samting we bambae yu mekem long laef blong yu? Pol i pulum tingting blong Timoti i se: “Yu mas mekem ol wok ya, mo yu mas putum tingting blong yu i stap strong blong mekem olgeta samting ya, blong bambae olgeta man oli save luk we yu stap gohed gud long laef blong yu mo long wok blong yu.” (1 Tim. 4:15) Mifala i pulum tingting blong yu blong mekem sem samting we yu luk mo harem long DVD ya. Askem long Jeova blong i givhan long yu blong yu tekem wan waes desisen we i save givim trufala glad long yu, i save mekem yu yu haremgud long laef naoia, mo i save givim wan gudfala fiuja we i hapi.
[Bokis blong pija long pej 6]
MAIN MENU
Play Drama
Scenes (11 haf)
Interviews
Play All
Sections (3 haf)
Looking Back
Supplementary Material
Supplementary Interviews
Index to Published Information on Related Subjects
Subtitles
Hearing Impaired
None
Blong gotru long ol defren menu, prestem ol baten ya Next ▶,◀ Back, mo Main Menu.