‘Olgeta We Oli Kasem Traem Be Oli Stanap Strong Oli Save Haremgud’
1 Evri Kristin i mas kasem traem. (2 Tim. 3:12) Maet oli sik, oli gat ol trabol long saed blong mane, ol man oli agensem olgeta no oli kasem traem long plante narafala samting bakegen. Ol traem we Setan i mekem long yumi oli blong mekem se yumi no moa wok strong, yumi no moa stap joen tumas long Kristin wok blong prij no maet yumi stop fulwan long wok blong God. (Job 1:9-11) ?Olsem wanem fasin blong stanap strong taem i gat traem i save mekem man i harem gud?—2 Pita 2:9.
2 Rere From Ol Traem: Jeova i givim Tok blong hem we i trutok, long yumi, mo insaed long Baebol i gat ol stori blong laef blong Jisas mo ol tijing blong hem. Taem yumi harem ol tok blong Jisas mo mekem ol samting we hem i talem, yumi stap putum wan strong fandesen we i mekem yumi rere from ol traem. (Luk 6:47-49) Yumi save kasem paoa tu long ol Kristin brata mo sista blong yumi, ol miting blong kongregesen mo ol buk we oli stanap long Baebol we slef we i stret mo waes i givim long yumi. Yumi lukluk i go long God oltaem tru long prea we i olsem wan presen we God i givim.—Mat. 6:13.
3 Jeova i givim wan hop long yumi tu. Taem yumi bildimap wan strong bilif long ol promes blong Jeova, hop blong yumi i kam olsem ‘wan angka we i holem laef blong yumi, we i fas strong, i no save muf.’ (Hib. 6:19) Long taem we oli raetem Baebol, nating se weta i gud, ol sip oli no save aot long wof sipos oli no gat angka. Sipos wan strongfala win i girap, sip i slakem angka blong hem blong mekem se win i no karem sip i go fas long ol ston we maet i stap long so. Sem mak, sipos yumi bildimap bilif long ol promes blong God naoia, ale taem ol strongfala win blong fasin agens no ol narafala hadtaem oli kasem yumi, nambawan hop blong yumi we i olsem wan angka, bambae i mekem se yumi stanap strong oltaem. Ol hadtaem oli save kasem yumi wantaem nomo. Nating se ol man long Listra oli bin glad long wok blong prij we Pol mo Banabas i mekem, be taem sam man Isrel oli kamtru long Listra, kwiktaem nomo tingting blong ol man Listra i jenis. Oli biaenem ol man Isrel ya, nao oli agensem Pol mo Banabas.—Wok 14:8-19.
4 Man We i Stanap Strong i Save Harem Gud: Yumi save gat pis long tingting taem yumi gohed nomo blong prij nating se yumi kasem fasin agens. Yumi glad tumas taem yumi save se, Jeova i luk se yumi naf blong kasem sem long fes blong ol man, from nem blong Jisas. (Wok 5:40, 41) Fasin blong stanap strong agensem ol traem i halpem yumi blong wokem ol fasin olsem tingting daon, obei, mo yumi naf moa blong stanap strong longtaem. (Dut. 8:16; Hib. 5:8; Jem. 1:2, 3) Fasin ya i tijim yumi blong dipen long Jeova, blong trastem ol promes blong hem mo blong faenem ples blong haed long hem.—Prov. 18:10.
5 Yumi save se ol traem oli blong smoltaem nomo. (2 Kor. 4:17, 18) Ol traem oli givim janis long yumi blong soemaot sipos lav we yumi gat long Jeova i strong no nogat. Taem yumi stanap strong long ol traem, yumi save pruvum se tok blong Setan agensem God i giaman nomo. !Taswe, yumi no mas letem tingting blong yumi i foldaon! “Taem ol samting oli kam blong traem bilif blong man, be hem i stap stanap strong, hem i save harem gud, from we taem hem i winim ol samting ya we oli kam blong traem hem, God bambae i flasem hem olsem we oli flasem man we i win long faet.”—Jem. 1:12.