!Yumi Tinghae Long Ol Wok We Yumi Kasem!
1 Tru long ol yia, Jeova i givim plante defren wok long ol man blong hem. Hem i givim wok long olgeta nomata we oli woman no oli man, oli yangfala no olfala, mo nomata sipos oli gat haenem no oli man nating. (Luk 1:41, 42; Wok 7:46; Fil. 1:29) ?Wanem ol blesing we hem i givim long yumi tede?
2 Sam Long Ol Blesing We Yumi Gat: Yumi kasem blesing ya blong Jeova i tijim yumi. (Mat. 13:11, 15) Taem yumi givim ol ansa long miting, yumi stap presem Jeova. Hemia i wan narafala blesing we yumi haremgud long hem. (Sam 35:18) Yumi glad blong givim ansa taem yumi gat janis blong mekem olsem. Long sem fasin, sipos yumi tingbaot se evri wok we yumi kasem long kongregesen i wan ona, bambae yumi traem bes blong yumi blong mekem ol wok ya. ?Olsem wanem? Taem yumi gat blesing ya blong klinim mo riperem ol samting long Haos Kingdom, ?yumi joen oltaem blong mekem ol wok ya?
3 Plante man oli stap asaskem sipos God i harem prea blong olgeta. Be Man ya we i hae moa long heven mo long wol, i harem ol prea blong yumi, mo yumi haremgud long blesing ya. (Prov. 15:29) Jeova hem wan i lesin long ol prea blong ol man blong hem. (1 Pita 3:12) I no gat wan mak we Jeova i putum se hamas taem yumi mas prea long hem evri dei. Yumi gat nambawan presen ya blong prea long Jeova “oltaem nomo.” !Yumi mas tinghae long blesing ya!—Efes. 6:18.
4 “Joen Wetem God Blong Mekem Wok Blong Hem”: Wan long ol beswan blesing, hemia blong yumi “joen wetem God blong mekem wok blong hem.” Wok ya i blong talemaot gud nius blong Kingdom blong God. (1 Kor. 3:9) Hemia wan wok we i karem glad long yumi mo i mekem yumi kam strong. (Jon 4:34) Jeova i no nidim blong yusum ol man blong mekem wok ya, be from we hem i lavem yumi, hem i givim wok ya long yumi. (Luk 19:39, 40) Be Jeova i no givim wok ya long enikaen man nomo. Olgeta we oli joen long wok ya blong prij, oli mas kasem mo holemtaet sam mak long saed blong spirit. (Aes. 52:11) ?Olsem wanem? ?Wok blong prij i wan impoten haf blong program blong yumi? Sipos yes, yumi soemaot se yumi tinghae long blesing ya.
5 Ol blesing we Jeova i givim oli mekem se laef blong yumi i gat mining. (Prov. 10:22) !Yumi neva mas ting nating long ol blesing ya! Taem yumi soemaot se yumi tinghae long ol blesing we yumi gat blong mekem wok blong God, yumi mekem Papa blong yumi long heven i glad. Hem nao i Man blong givim “evri samting we oli gud mo evri presen we oli nambawan.”—Jem. 1:17.