Yumi Serem Hop Blong Kingdom Wetem Narafala
1 Long ol las dei ya we laef i strong tumas, plante man long wol oli no gat wan hop blong fiuja. (Efes. 2:12) Plante oli putum tras blong olgeta long ol sas samting, ol lida blong wol, saens, mo ol narafala samting olsem. Hemia i no waes nating. Yumi glad tumas we yumi gat wan trufala hop long saed blong fiuja, wan hop we i olsem “wan angka blong holem laef blong yumi. Hem i wan angka we i fas strong, we i no save muf.”—Hib. 6:19.
2 Aninit long rul blong Kingdom blong God, bambae wol ya i kam wan paradaes. Ol fren mo famle blong yumi we oli ded, bambae oli laef bakegen. (Wok 24:15) Fasin pua, ol fasin we oli no stret, sik, fasin blong kam olfala, mo ded, bambae oli lus olgeta. (Sam 9:18; Mat. 12:20, 21; Rev. 21:3, 4) Hemia sam long ol promes blong Jeova we bambae oli kamtru i no longtaem. ?Wanem promes blong Jeova we yu yu wantem tumas blong luk?
3 Talemaot Gud Nius: Yumi no mas holem hop blong Kingdom i blong yumi nomo. Lav we yumi gat long God mo long ol man i pusum yumi blong folem eksampol blong Jisas, mo blong ‘talemaot long ol man we oli stap long kalabus se, “Yufala i save go fri,” mo talemaot long ol man we oli blaen se, “Ae blong yufala i save kam gud,” mo blong mekem ol man we oli stap harem nogud aninit long han blong narafala man, oli go fri.’ (Luk 4:18) Aposol Pol i talemaot gud nius long maket, mo long eni ples we hem i save faenem man long hem. Hem i bisi oltaem nomo long wok blong prij. (Wok 18:5) Sipos yumi folem eksampol blong aposol Pol blong wok strong long wok blong prij, bambae samting ya i givhan long yumi blong blokem fasin ya blong ‘tingting tumas from laef blong yumi long wol ya mo blong wantem tumas blong kam rijman.’ Ol samting ya bambae oli no gat paoa blong daonem hop blong yumi.—Mak 4:19.
4 Taem yumi prij, nao ol man oli no wantem lesin, oli no intres long gud nius blong Kingdom, no maet oli agensem yumi, samting ya i no daonem hop blong yumi long Kingdom. Yumi “holemtaet fasin ya we yumi talemaot finis se i fasin blong yumi, we yumi putum tingting blong yumi i stap strong long God.” (Hib. 10:23) Yumi “no sem nating long gud nius.” (Rom 1:16) Maet strong bilif ya blong yumi we man i luksave klia nomo, mo fasin blong yumi blong gohed oltaem long wok blong prij, i save pulum sam man blong lesin long yumi.
5 I stret we yumi pulum ol man blong tingbaot ol nogud samting long wol ya we Baebol i bin talemaot longtaem bifo finis, be yumi no man long talemaot nogud nius. Wok blong prij blong yumi i blong talemaot hop blong Kingdom—hemia gud nius blong Kingdom blong God. Gohed blong talemaot gud nius ya wetem strong bilif mo strong tingting, ‘nao bambae yumi save kasem ol samting ya we yumi putum tingting blong yumi i stap strong long hem.’—Hib. 6:11.