Leftemap Tingting Blong Olgeta We Oli Sore Tumas Long Hat Blong Olgeta
1 Naoia bitim olgeta taem bifo, ol man oli nidim tumas we narafala i leftemap tingting blong olgeta. Sipos yumi folemgud King blong yumi Jisas Kraes, bambae yumi tu yumi “go blong fasem soa blong olgeta we oli sore tumas long hat blong olgeta.”—Aes. 61:1, NW.
2 Wan Rod Blong Leftemap Tingting: Yumi mas skelemgud ol toktok we yumi talem long ol man we yumi storian long olgeta. Ol toktok blong yumi oli mas leftemap tingting blong olgeta mo mekem oli harem gud. Taem yumi no spenem tumas taem blong tokbaot ol rabis fasin blong wol mo ol giaman tijing, ale yumi gat moa taem blong tokbaot ol trutok long saed blong Baebol mo nambawan hop ya we God i promes blong givim blong leftemap tingting blong yumi. Hemia i no minim se yumi no mas tokbaot Amagedon. Wok blong yumi “i blong talemaot yia we [Jeova] i makem blong soemaot gladhat blong hem long ol man, mo dei we God ya blong yumi i makem blong givimbak long ol man nogud,” mo blong ‘wekemap tingting blong ol man nogud ya, blong bambae oli kamaot long rabis rod blong olgeta.’ Be, woning long saed blong Amagedon, mo taem ya we Jeova bambae i spolem ol man nogud, i no mas blokem stamba wok blong yumi, hemia blong talemaot “gud nius ya blong Kingdom.”—Aes. 61:2, NW; Esik. 3:18, NW; Mat. 24:14, NW.
3 Long Olgeta Haos Wanwan: Yumi no mas sapraes taem yumi faenem ol man we tingting blong olgeta i foldaon from sik, from we oli lusum fren no famle blong olgeta long ded, from nogud fasin, mo from ol problem long saed blong mane. Yumi we i folem eksampol blong Kraes, yumi mas ‘sore tumas long olgeta’ mo yumi mas soem kaen fasin long olgeta we yumi mitim olgeta long wok blong prij. (Luk 7:13; Rom 12:15) Nating se yumi ridim wan no tu vas blong Baebol we i stret long trabol blong wan man, yumi mas soemaot se “yumi rere oltaem blong lesin,” olsem nao, man ya bambae i gat janis blong talemaot tingting blong hem. (Jem. 1:19) Afta we yu lesin long man ya, bambae yu naf blong leftemap tingting blong hem.
4 Taem we yu stap storian long wan man, maet yu save talem se: “Mi wantem serem sam tok blong Baebol wetem yu, we ol tok ya oli save leftemap tingting blong yumi.” Sipos yumi gat fasin luksave, bambae yumi no traem blong stretem evri rong tingting we man i gat. Defren olgeta, bambae yumi traem givhan mo leftemap tingting blong man taem yumi yusum ol vas blong Baebol blong mekem hat blong olgeta i harem gud bakegen. Blong mekem olsem, yu save yusum Reasoning From the Scriptures pej 117-121 long Inglis, mo 119-122 long Franis, aninit long stamba tok ya “Encouragement (Leftemap Tingting).” Sipos no, yu save givim traket ya Mekem Man We Tingting Blong Hem i Foldaon i Haremgud Bakegen mo storebaot ol haf insaed long traket ya.
5 Lukaot Janis Blong Leftemap Tingting Blong Narafala: ?Yu yu tingbaot wan man klosap long yu, long ples blong wok, long skul, no long famle blong yu we yu save leftemap tingting blong hem? Sipos yes, i gud yu traehad blong go visitim ol man olsem long haos blong olgeta mo leftemap tingting blong olgeta wetem ol vas blong Baebol. Sipos yu kasem save filing blong olgeta bambae yu naf blong leftemap tingting blong olgeta. Blong mekem olsem, samfala oli raetem leta no telefon long ol man olsem. Trufala lav we yumi gat long ol man, bambae i pusum yumi blong sore long olgeta mo leftemap tingting blong olgeta wetem ol vas blong Baebol.—Luk 10:25-37.
6 Yes, wok blong yumi i blong leftemap tingting blong olgeta we oli harem i soa long hat blong olgeta mo blong mekem oli tingbaot se i gat wan gudfala hop long fiuja. Samting ya nao we plante man long wol oli nidim blong leftemap tingting blong olgeta. Yumi mas toktok wetem glad long saed blong ol gudgudfala samting we Jeova i promes blong givim. Samting ya i save leftemap tingting mo givim hop long olgeta we oli laekem trutok. Oltaem yumi mas tingbaot blong leftemap tingting blong olgeta we oli sore tumas long hat blong olgeta.