Tijim Ol Narafala Blong Oli Lavem Jeova
1. ?Wanem i pulum samfala blong oli stat blong laekem Jeova?
1 ?Yu yu tingbaot yet faswan taem we yu harem ol tok long saed blong Jeova? ?Wanem samting i pulum yu blong laekem hem? Plante man we hat blong olgeta i stret oli talem se oli stat blong laekem Jeova taem oli kasem save long ol nambawan fasin blong hem, antap moa, fasin sore blong hem mo fasin blong hem blong lavem ol man.—1 Jon 4:8.
2, 3. ?Olsem wanem yumi save yusum buk ya Baebol Tijim blong givhan long ol Baebol studen blong oli lavem Jeova?
2 “Hemia God Blong Yumi”: Buk ya Baebol Tijim, i makemgud lav blong Jeova mo i soemaot klia se man i mas frengud wetem God. ?Olsem wanem yumi save yusum buk ya blong tijim ol narafala blong oli lavem God? Taem yumi stap tokbaot wan niufala poen we man i no save long hem yet, yumi save askem sam kwestin blong mekem hem i tingting gud. Maet yumi askem se: “?Trutok ya we yumi jes lanem i soemaot wanem long saed blong Jeova?” “?Olsem wanem poen ya i soemaot se Jeova i beswan Papa we man i save gat?” Sipos yumi tijim man long fasin ya, yumi save givhan long hem blong stat blong fren wetem Jeova, mo hem i save gohed olsem long ful laef blong hem.
3 Taem yumi givhan long ol Baebol studen blong oli luksave se i wan bigfala ona blong kasem save long God ya we hem nomo i tru mo i laef, bambae oli kasem mak we oli talem sem tok we Aesea i talem, se: “Hemia God blong yumi.” (Aes. 25:9, NW) Taem yumi eksplenem Tok blong God, yumi mas makem klia ol blesing we ol man bambae oli kasem taem Jeova i yusum Kingdom gavman blong hem we i stap long han blong Jisas Kraes, blong mekem ol tingting blong hem oli kamtru.—Aes. 9:6, 7.
4, 5. ?Lavem Jeova, i min se yumi mekem wanem?
4 Soemaot Se Oli Lavem Jeova: Yumi save se sipos yumi lavem Jeova wetem olgeta hat, laef, mo tingting blong yumi, hemia i no min se yumi gat strong filing blong lav long God nomo. Yumi mas gat tingting blong hem tu, mo yumi mas folem tingting ya long laef blong yumi. (Sam 97:10, NW) Yumi soemaot se yumi lavem God taem yumi obei gud long ol tok blong hem, mo yumi gohed oltaem blong mekem ol wok we ‘i tabu, mo ol fasin we hem i wantem,’ nating we yumi kasem trabol mo samfala oli agensem yumi.—2 Pita 3:11; 2 Jon 6.
5 Taem yumi lavem Jeova, yumi glad tumas blong mekem samting we hem i wantem. (Sam 40:8) Man we yumi mekem stadi long hem, i mas luksave se olgeta tok mo loa blong God oli blong mekem i gud long ol man blong Hem blong olwe. (Dut. 10:12, 13) Taem wan man i letem ol loa blong Jeova oli lidim hem, hem i soemaot se hem i gat bigfala tangkiu from ol nambawan wok blong Jeova. Yumi mas givhan long Baebol studen blong yumi, blong kasem save se sipos hem i folem ol stret rod blong Jeova, bambae hem i no kasem plante trabol we oli mekem ol man we oli no folem ol loa blong God oli harem nogud tumas.
6. ?Wanem ol blesing we man i save kasem taem hem i lavem Jeova?
6 Olgeta We Oli Lavem God Oli Kasem Blesing: Jeova i laekem tumas ol man we oli gat tingting daon mo oli lavem hem, taswe hem i soemaot long olgeta ‘ol tingting blong hem we man i no save faenemaot.’ (1 Kor. 2:9, 10) Save ya long saed blong ol stamba tingting blong Jeova i mekem se oli gat klia tingting long fiuja mo oli sua gud long ol promes blong God. (Jer. 29:11) Olgeta we oli lavem Jeova, Jeova i kaen long olgeta, hem i mekem i gud tumas long olgeta. (Eks. 20:6) Olgeta oli tinghae long janis we God i givim long olgeta from we hem i lavem olgeta, hemia blong kasem laef we i no save finis.—Jon 3:16.
7. ?Wanem filing blong yu long saed blong wok ya blong tijim ol narafala blong oli lavem Jeova?
7 Taem yumi kasem moa save long saed blong Papa blong yumi long heven, yumi gat moa save blong serem wetem ol narafala. (Mat. 13:52) !I wan bigfala ona blong tijim ol narafala, antap moa ol pikinini blong yumi, blong oli lavem Jeova! (Dut. 6:5-7) I gud we yumi, wetem ol Baebol studen blong yumi, yumi gohed nomo blong leftemap voes blong yumi blong presem Jeova, taem hem i stap mekem ‘olgeta gudgudfala fasin blong hem’ long yumi.—Sam 145:7.