Blong Mekem Wok Blong Prij Yumi Mas Stanap Strong
1 Blong bitim 30 yia, aposol Pol i haremgud long wok blong hem olsem wan man blong talemaot gud nius. Be plante taem, man we i wantem mekem wan gudfala wok hem i kasem sam traem. Samting ya i tru tumas taem Pol i mekem wok blong prij. (2 Kor. 11:23-29) Nating se i olsem, hem i no lego wok blong prij. (2 Kor. 4:1) Hem i kasem save se Jeova bambae i givim paoa we hem i nidim blong gohed blong mekem wok blong prij nating se traem i kasem hem. (Fil. 4:13) Gudfala eksampol blong Pol blong stanap strong, i mekem se hem i save talem toktok ya se: “Oltaem, yufala i mas folem fasin blong mi, olsem we mi mi stap folem fasin blong Kraes.”—1 Kor. 11:1.
2 Stanap Strong Agensem Ol Traem Tede: Evri dei, plante long ol brata blong yumi oli gat ol famle, ol fren long wok no long skul, we oli stap jikim olgeta, agensem olgeta mo oli no wantem lesin long olgeta. (Mat. 10:35; Jon 15:20) Ating ol samting ya oli tru tu long saed blong yu. No maet yu gat wan sik we yu stap traehad blong winim. Maet evri dei, yu stap traehad blong blokem ol samting we oli stap westem taem mo paoa blong yu, mo ol samting we oli traem bilif mo fasin blong yu blong stanap strong. Yumi save kasem paoa blong stanap strong taem yumi tingting long eksampol blong ol man bifo we oli gat strong bilif mo eksampol blong ol Kristin brata sista tede we oli kasem mo winim ol traem.—1 Pita 5:9.
3 Yumi save kasem paoa blong gohed blong mekem wok blong prij taem yumi “putum olgeta klos blong faet, we God i givim.” (Efes. 6:10-13, 15, NW) I impoten tumas we yumi prea long God blong i halpem yumi blong stanap strong. God i save givim tabu spirit long yumi blong yumi naf blong winim ol traem. (2 Korin 6:4-7) Yumi mas lesin long ol tok blong God we hem i talem plante taem long yumi se, yumi mas mekem tingting blong yumi i strong. Sipos yumi mekem olsem, bambae yumi save winim faet blong yumi agensem Setan mo wol blong hem. (Sam 119:24, 85-88, NW) Tingbaot wan pikinini we i kasem wan leta long papa blong hem we i laekem tumas hem. Taem hem i kasem leta ya, maet bambae hem i ridim bakegen mo bakegen. Samting ya i sem mak long fasin blong yumi blong ridim Baebol evri dei. Fasin ya i mekem se yumi frengud moa wetem Jeova. Taem yumi stadi Baebol oltaem, yumi kasem waes we i save givhan long yumi blong winim ol traem. Long rod ya, yumi letem tingting blong God i gat paoa long ol desisen we yumi mekem mo yumi mekem tingting blong yumi i strong se bambae yumi stap tru long Jeova.—Prov. 2:10, 11.
4 Fasin Blong Stanap Strong i Karem Ol Blesing: Olsem Pol, taem yumi stanap strong agensem ol traem mo yumi no stop blong mekem wok blong prij, yumi mekem hat blong Jeova i glad, mo bambae fasin ya i karem blesing i kam long yumi mo ol narafala tu. (Prov. 27:11) I gud we yumi mekem tingting blong yumi i strong blong gohed oltaem long wok blong prij. Long rod ya, yumi pruvum se bilif blong yumi i save stap longtaem mo hem “i gud moa i winim gol” we i save lus, nating se oli “bonem long faea blong faenemaot se i gud.”—1 Pita 1:6, 7.