Olgeta samting we God i wokem oli stap long pis aninit long rul blong hem

?From Wanem Yumi Nidim Kingdom Blong God?

Taem God, we nem blong hem Jehova, i wokem fas man mo woman, hem wan nomo i rul. Hem i rul long fasin we i soemaot lav. Hem i wokem wan naesfala garen long Iden blong tufala i stap long hem, mo hem i givim plante kakae long tufala. Mo tu, hem i givim gudfala wok long tufala. (Jenesis 1:28, 29; 2:8, 15) Sipos ol man oli bin gohed blong obei long rul blong God, bambae pis i stap yet.

Iv i givim frut blong tri we God i blokem i go long Adam. — Fas man mo woman i no wantem rul blong God

Baebol i talem se wan stronghed enjel, we biaen oli putum nem blong hem se Devel Setan, i girap agensem God, mo i talem se God i no gat raet blong rul. Hem i talem se ol man bambae oli glad moa sipos God i no lidim mo rulum olgeta. Sore tumas, Adam mo Iv we yumi kamaot long tufala, i folem Setan, mo tufala i joen wetem hem blong agensem God.—Jenesis 3:1-6; Revelesen 12:9.

From we Adam mo Iv i no wantem se God i rulum tufala, tufala i no moa save stap long Paradaes, mo tufala i lusum janis blong gohed blong laef olwe wetem bodi we i stret gud. (Jenesis 3:17-19) Desisen blong tufala i spolem ol pikinini blong tufala. Baebol i talem se Adam i mekem “sin i kam long wol, mo ded i kamaot from sin.” (Rom 5:12) Sin i mekem wan narafala bigfala trabol i kamaot tu, hemia se: “Sam man oli gat paoa, mo ol narafala man oli stap aninit long olgeta, oli stap harem nogud.” (Prija 8:9) Hemia i min se, taem man i rulum man, trabol i kamaot.

RUL BLONG MAN I STAT

Flas man ya Nimrod i stanap. Biaen long hem, sam man oli stap wokem wan haos. — Nimrod i agensem Jehova

Baebol i talem se Nimrod i fas man blong rul. Mo hem i agensem rul blong Jehova. Stat long taem blong Nimrod i kam kasem tede, plante man oli yusum paoa blong olgeta long fasin we i nogud. Tri taosen yia bifo, King Solomon i talem se: “Ol man we oli gat paoa oli stap mekem i strong tumas long ol narafala man. Oli stap spolem olgeta, mo oli stap mekem olgeta oli harem nogud, we oli stap krae from.”—Prija 4:1.

Trabol ya i stap yet tede. Folem wan buk blong Yunaeted Nesen we i kamaot long 2009, i stap kam klia moa se “wan long ol stamba risen blong ol trabol long wol ya,” hemia ol gavman we oli no rul gud.

!TAEM BLONG TEKEM AKSEN!

Ol man oli nidim ol lida we oli rul gud, mo wan gavman we i wok gud. !Mo hemia nao samting we God i promes blong mekem!

Ol pija: Samting we i kamaot taem man i rul. 1. Wan woman Esia i sidaon long wan doti ples mo i holem wan pikinini we i stap krae. 2. Wan olfala man we i sik i slip long hospital. 3. Ol soldia oli stap sutum masket. 4. Ol man oli kros mo oli holem ol saen. 5. Wan woman mo gel blong hem i stanap aotsaed long haos blong tufala mo tufala i luk se glas long doa i brok. 6. Win long taon ya i doti, ol rop blong lektrik oli fasfas, mo i gat plante smok. — Ol gavman blong man oli traehad, be oli no naf blong winim ol bigfala trabol

God i stanemap wan Kingdom, o gavman, we bambae i tekem ples blong ol gavman blong man, mo bambae i “rul oltaem gogo i no save finis.” (Daniel 2:44) Hemia Kingdom ya we plante milian man oli stap prea from. (Matiu 6:9, 10) Be God i no King blong Kingdom ya. Hem i jusumaot wan Man we i laef long wol ya bifo, blong i rul. ?Hu ya man ya we God i jusumaot?