?Kingdom Blong God Bambae i Mekem Wanem?

SAMTING WE KINGDOM YA I MEKEM FINIS

Long las haf, yumi tokbaot saen we Jisas i talem blong soemaot se Kingdom blong God i stanap long heven, mo Jisas Kraes i kam King.

Baebol i talem se taem Jisas i kam king, bambae hem i sakemaot Setan mo ol rabis enjel blong hem long heven. Naoia oli save mekem wok blong olgeta long wol nomo. Hemia nao risen from wanem evri samting i kam nogud tumas, stat long yia 1914.—Revelesen 12:7, 9.

Nating se trabol i stap kam antap moa long wol, Jisas we i King blong Kingdom blong God, i stap mekem samting blong givhan long ol man. Wan bigfala wok blong tijim ol man long Baebol we Jisas i talemaot, i stap gohed, mo plante man oli stap kasem save long trutok blong Baebol mo folem long laef blong olgeta. (Aesea 2:2-4) Plante milian man oli lanem finis blong gat stret tingting long saed blong wok, mo blong stretem ol problem long famle. Oli lanem tu se oli no mas kam slef blong mane mo ol rij samting we oli harem gud long olgeta. Ol man ya oli stap kasem save long ol samting we i givhan long laef blong olgeta naoia, mo i halpem olgeta blong oli kam ol gudfala man we oli stret blong stap aninit long rul blong Kingdom blong God.

SAMTING WE KINGDOM BAMBAE I MEKEM YET

I tru se Jisas i stap rul finis long heven, be ol gavman blong man oli stap rul yet long wol. Nating se i olsem, God i talem long Jisas se: “Bambae yu rulum ol enemi blong yu.” (Ol Sam 110:2) I no longtaem, Jisas bambae i spolem ol enemi blong hem mo givim blesing long ol man we oli glad blong obei long God.

Kingdom blong God bambae i:

• Spolem ol giaman skul. Bambae i no moa gat ol skul we oli stap giaman long ol man long saed blong God, mo mekem i strong tumas long olgeta ya. Baebol i talem se ol giaman skul oli olsem wan woman blong rod. Plante man bambae oli sek long bigfala trabol we i kam blong spolem ol skul ya.—Revelesen 17:15, 16.

• Finisim rul blong man. Kingdom blong God bambae i finisim rul blong man.—Revelesen 19:15, 17, 18.

• Spolem ol rabis man. ?Wanem bambae i hapen long olgeta we oli no wantem obei long God mo lego ol rabis fasin? “Ol man nogud we oli stap mekem ol rabis fasin, bambae God i tekemaot olgeta.”—Ol Proveb 2:22.

• Finisim Setan mo ol rabis enjel blong hem. Setan mo ol rabis enjel bambae oli no moa save “pulum olgeta neson oli go krangke.”—Revelesen 20:3, 10.

?Hemia bambae i givhan olsem wanem long ol man we oli stap aninit long Kingdom ya?

KINGDOM BAMBAE I GIVHAN LONG OL MAN

Jisas we i King long heven, bambae i mekem plante moa samting i bitim enikaen gavman blong man. God i jusumaot 144,000 man long wol blong oli go rul wetem Jisas long heven. (Revelesen 5:9, 10; 14:1, 3) Bambae hem i meksua se samting we God i wantem i kamtru long wol. ?Kingdom bambae i givhan olsem wanem long ol man?

• Bambae man i no moa sik, kam olfala, mo ded. ‘Bambae i no moa gat man we i save talem se hem i sik,’ mo “bambae i no moa gat man i ded.”—Aesea 33:24; Revelesen 21:4.

• Bambae ol man oli stap long pis mo oli sef. ‘Bambae i gat pis’ mo ‘ol man bambae oli stap gud long ol plantesen blong grep blong olgeta, mo oli sidaon aninit long ol figtri blong olgeta. Bambae i no moa gat man blong mekem olgeta oli fraet.’—Aesea 54:13; Maeka 4:4.

• Bambae ol man oli gat gudfala wok. ‘Ol samting we oli hadwok long hem, bambae oli harem gud long hem longtaem. Ol wok we oli mekem, bambae oli go gud.’—Aesea 65:22, 23.

• Graon, win, mo wota, bambae i kam gud. “Draeples bambae i harem gud, i glad. Ples we ol samting i no save gru long hem, ol flaoa bambae oli stap gru.”—Aesea 35:1.

• Kingdom bambae i tijim ol man blong oli save laef olwe. “Laef ya we i no save finis, hemia se man i gohed blong save yu we yu nomo yu tru God, mo i save Jisas Kraes we yu yu sanem hem i kam.”—Jon 17:3.

God i wantem se yu tu yu kasem ol blesing ya. (Aesea 48:18) Nekis haf bambae i tokbaot samting we yu save mekem naoia blong kasem gudfala laef ya long fiuja.