?Yu Yu Save Mekem Moa Long Wok Blong God?
1. ?I gat wanem bigfala nid long saed blong wok blong prij? ?From wanem samting ya i impoten moa naoia?
1 Taem Jisas i luk se fulap man oli wantem harem gud nius blong Kingdom, hem i talem long ol disaepol blong hem blong oli “askem strong long masta blong garen ya, blong hem i save sanem sam moa man oli kam blong karem ol kakae ya i go long haos blong hem.” (Mat. 9:37, 38) Naoia yumi stap long ol laswan aoa blong taem ya blong tekem kakae long garen. From samting ya, i impoten moa blong wok strong naoia i bitim olgeta taem bifo. Taswe, yumi mas toktok long Jeova long prea, blong traem faenem rod blong mekem moa long wok blong prij.—Jon 14:13, 14.
2. ?Samfala oli mekem wanem blong ansa long tok blong Jisas blong singaot moa man oli go tekem kakae long garen?
2 Mekem Moa Wok: Plante we oli askem Jeova blong halpem mo lidim olgeta, oli faenem rod blong mekem wok blong paenia. (Sam 26:2, 3; Fil. 4:6) Samfala oli mekem wan spesel traehad blong joen long wok blong haftaem paenia long wan manis no long plante manis evri yia. Oli luk se hemia wan gudfala rod blong mekem moa long wok blong prij. Oli kasem bigfala glad long wok ya, mo samting ya i pulum olgeta blong oli wantem kam fultaem paenia.—Wok 20:35.
3. ?Sipos yu bin mekem wok blong paenia samtaem bifo, maet yu stap tingbaot wanem naoia?
3 ?Yu Yu Save Joen Bakegen Long Wok Blong Paenia?: Sipos yu yu bin mekem wok blong paenia samtaem bifo, ating yu harem gud yet blong tingbaot ol blesing we yu bin kasem long taem ya. ?Yu yu askem long Jeova long prea, blong i halpem yu blong faenem rod blong joen bakegen long wok blong paenia? Maet samting we i bin stopem wok blong yu bifo, i no moa wan problem naoia. Maet stret taem i kam finis blong yu yu harem gud long spesel wok ya bakegen.—1 Jon 5:14, 15.
4. ?Wanem spesel janis we yumi evriwan i gat?
4 Wok blong go tekem kakae long garen i stap gohed strong, mo i no longtaem wok ya bambae i finis. (Jon 4:35, 36) I gud we yumi evriwan yumi tingting gud long laef blong yumi, blong luksave sipos yumi save jenisim sam samting, blong yumi naf blong mekem moa long wok blong prij. Sipos yumi jekem, nao yumi faenem se yumi no save mekem moa, maet yumi save lukaot sam rod blong karem moa frut long wok we yumi stap mekem. (Mak 12:41-44) !Olgeta we laef blong olgeta i stret blong oli save letem Jeova i yusum olgeta long spesel wok ya, oli gat wan bigfala blesing i stap fored long olgeta!—Sam 110:3.