?Olsem Wanem Blong Prij Long Ol Man, Be i No Ol Woman Nomo?
1. ?Wanem bigfala nid i stap blong lukaot long ol wok blong Kingdom?
1 Long ol las dei ya, wok blong Kingdom i stap kam bigwan moa, taswe yumi nidim tumas ol man we oli nafgud mo we oli gat ol gudfala Kristin fasin, blong oli lidim wok ya. (Mak 4:30-32; Wok 20:28; 1 Tim. 3:1-13) Long sam ples, i gat plante woman we oli intres long gud nius blong Kingdom, be smol man nomo oli intres. Long sam kantri, ol man oli letem waef blong olgeta i mekem ol desisen long ol samting long saed blong wosip mo blong tijim pikinini blong olgeta long Baebol. ?Olsem wanem yumi save pulum plante moa man blong oli tingbaot ol nid blong olgeta blong savegud God mo joen wetem yumi long trufala wosip?
2. ?Olsem wanem traehad blong Pol mo Pita blong prij long ol man, i karem gudfala frut?
2 Faenem Ol Man: Taem hed blong famle i bilif long trutok, plante taem hem i pulum ol narafala memba blong famle blong oli joenem hem long trufala wosip. Tingbaot, taem Pol mo Saelas tufala i stap long kalabus from we tufala i prij, tufala i toktok long wan man blong lukaot long kalabus. Biaen, man ya wetem ful famle blong hem oli tekem baptaes. (Wok 16:25-34) Taem Pol i prij long Korin, “Krispas, man we i lida blong haos blong prea ya, hem wetem ol famle blong hem mo ol man blong hem oli bilif long Masta blong yumi.” (Wok 18:8) Jeova i yusum Pita blong prij long Konilias, we i wan kapten blong ol soldia mo we Baebol i tokbaot hem se i ‘wan man blong prea mo i stap mekem wosip long God.’ Konilias wetem famle mo sam fren blong hem, oli tekem baptaes.—Wok 10:1-48.
3. ?Folem eksampol blong Filip, hu olgeta “haeman” we yumi save prij long olgeta?
3 Sipos yumi prij long ol “haeman,” plante gudfala frut i save kamaot. (1 Tim. 2:1, 2) Tingbaot, enjel blong Jeova i talem long Filip blong go toktok long “wan haeman” we i lukaot long ol sas samting blong kwin blong Itiopia. Filip i harem we man ya “i stap ridim buk blong Profet Aesea,” nao Filip i eksplenem long hem gud nius ya long saed blong Jisas. Ale, man Itiopia ya i kam wan disaepol, mo ating hem i talemaot gud nius long ol man long rod, taem hem i stap gobak long ples blong hem. Ating hem i prij long kwin tu wetem olgeta we oli stap long haos blong kwin. Hemia ol man we oli no gat janis blong harem gud nius long wan narafala rod.—Wok 8:26-39.
4. ?Olsem wanem yumi save givim janis long plante moa man blong oli harem gud nius?
4 Toktok Long Plante Moa Man: Long dei, plante man oli stap long ples blong wok blong olgeta. ?Olsem wanem? ?Yu save jenisim program blong yu blong yu save prij moa long ol sapa, ol wiken, mo ol holide? Sipos yu prij oltaem long ol stoa mo ofis, hemia bambae i givim plante janis long yu blong prij long ol man we oli no stap oltaem long haos blong olgeta. Ol brata tu oli save mekem wan spesel traehad blong tekem janis blong prij long ol man we oli wok wetem olgeta. Taem yumi prij long ol haos wanwan, speseli long ol teritori we yumi prij long olgeta oltaem, wanwan taem i gud we ol brata oli askem blong toktok long man blong haos.
5. ?Wanem samting we wan sista i mas mekem, sipos hem i prij long wan man we i intres long gud nius blong Kingdom?
5 Sipos wan sista i prij long wan man nao man ya i intres, sista ya i no mas go hem wan blong visitim hem bakegen. I gud we sista ya i go wetem hasban blong hem, no wetem wan narafala pablisa. Sipos man ya i gohed gud, plante taem i moa gud blong askem long wan brata we i naf blong i gohed blong visitim man ya.
6. ?Olsem wanem yumi save folem fasin blong aposol Pol blong “pulum plante man moa”?
6 Jusum Ol Poen We Ol Man Oli Intres Long Olgeta: Aposol Pol i tingbaot ol defren kaen man we hem i prij long olgeta, ale hem i jenisim toktok blong hem blong mekem i stret long olgeta wanwan, blong hem i save “pulum plante man moa.” (1 Kor. 9:19-23) Long sem fasin, yumi mas tingbaot mo rerem ol storian we bambae oli pulum intres blong ol man we yumi save mitim. Olsem nao, plante taem ol man oli wari long ol problem long saed blong mane, oli wantem wan gavman we i gud, mo oli wantem lukaot gud long famle blong olgeta. Maet oli intres tu blong save wanem mining blong laef, wanem fiuja blong wol, mo from wanem God i letem ol man oli stap safa. Sipos yumi gat fasin luksave taem yumi stap toktok long ol man, bambae ol man oli save intres long tok blong Kingdom we yumi stap talemaot.—Prov. 16:23, NW.
7. ?Olsem wanem evriwan long kongregesen oli save givhan long wan hasban we i no stap long trutok, we i kam long miting?
7 Givhan Long Ol Hasban We Oli No Stap Long Trutok: Plante taem gudfala fasin blong Kristin waef i gat bigfala paoa long hasban blong hem we i no stap long trutok. Be ol memba blong kongregesen tu oli save givhan long ol hasban ya. (1 Pita 3:1-4) Taem wan hasban we i no stap long trutok i folem waef blong hem i kam long miting, fasin fren we kongregesen i soem blong welkamem hem, i givim bigfala witnes long hem. From we hasban ya i stap long miting, hemia i soemaot se hem i intres smol long trutok, mo maet hem i glad blong stadi long Baebol.
8. ?Olsem wanem ol brata oli save givhan long ol hasban we oli no stap long trutok, be oli soem se oli intres smol?
8 Fastaem sam hasban oli no intres long ol samting long saed blong Baebol, be biaen, sloslo oli save glad blong tokbaot Baebol wetem wan brata we oli faenem i isi blong storian wetem hem. Long wan kongregesen, wanwan brata oli go visitim wan famle we hasban i no stap long trutok, mo oli mekem wan spesel traehad blong storian wetem hasban ya long sam samting we oli save se hem i intres long olgeta. Sloslo storian blong olgeta i go long ol samting long saed blong God mo Baebol, mo naoia hasban ya i baptaes finis. Wan narafala brata i givhan long wan hasban we i no stap long trutok be i gat fasin fren, blong pulum wan fenis i goraon long haos blong hem. From we brata ya i soem intres olsem long hasban ya, hem i statem wan Baebol stadi wetem hem. (Gal. 6:10; Fil. 2:4) Sipos yu yu wan Kristin brata, i gud yu traehad blong givhan long wan, no plante hasban olsem, we oli no stap long trutok.
9. ?Wanem frut i save kamaot sipos yumi trenem ol Kristin man?
9 Trenem Olgeta Blong Mekem Wok Long Fiuja: Ol man we oli bilif long gud nius blong Kingdom mo we oli wantem mekem moa long wok blong Jeova, oli save kam “ol man we oli olsem presen” long kongregesen. Ol presen ya, hemia ol Kristin elda we oli yusum paoa mo gudhan blong olgeta blong givhan long kongregesen blong ol man blong Jeova. (Efes. 4:8, NW; Sam 68:18, NW) Ol man olsem oli glad nomo blong lukaot long kongregesen olsem man blong lukaot long sipsip, mo i no gat wan man i fosem olgeta. (1 Pita 5:2, 3) !Taem i gat ol man olsem, hemia i wan bigfala blesing long kampani blong ol brata!
10. ?Olsem wanem traehad blong Ananaeas blong givhan long Pol, i karem blesing long plante man?
10 Tingbaot, nating se fastaem Sol i stap mekem bigfala trabol long ol Kristin, be biaen hem i kam wan ‘aposol blong ol man we oli no laen blong Isrel.’ (Rom 11:13) Fastaem, disaepol Ananaeas i no wantem go prij long Sol from we hem i wan man blong agens. Be Ananaeas i folem oda blong Jisas mo i go toktok wetem man ya we biaen i kam aposol Pol. Long ol yia we oli kam biaen, wok blong prij we Pol i mekem i givhan long plante taosen man we oli lesin long hem. Mo plante milian man tede oli kasem blesing yet from ol leta we tabu spirit i pulum Pol blong raetem long Tok blong God.—Wok 9:3-19; 2 Tim. 3:16, 17.
11. ?From wanem yumi mas mekem sam jenis, blong yumi save prij long ol man?
11 Taswe, i gud we yumi jenisim sam samting long laef blong yumi blong yumi save prij long ol man, be i no long ol woman nomo. Sipos yumi gohed blong mekem olsem, yumi save sua se Jeova bambae i blesem ol traehad blong yumi blong mekem samting we Hem i wantem, mo blong lukaot gud long ol wok blong Kingdom.