?Bambae Yu Yu Ansa Olsem Wanem?
1. ?From wanem yumi mas folem eksampol blong Jisas taem yumi ansa long kwestin we man i askem long yumi?
1 Tede yet, ol man oli sapraes long fasin blong Jisas blong givim ansa long ol kwestin we ol man oli askem long hem. Long wok blong prij, i gud yumi folem eksampol blong Jisas taem yumi ansa long ol defdefren kaen kwestin we ol man oli askem long yumi.—1 Pita 2:21.
2. ?Wanem samting i save halpem yumi blong givim wan gudfala ansa long kwestin we man i askem long yumi?
2 Lesingud Fastaem: Taem man i askem kwestin long Jisas, Jisas i tingbaot from wanem man ya i askem kwestin olsem. Samtaem Jisas i mas askem sam narafala kwestin bakegen long man ya blong faenemaot tingting blong hem. Samfala we oli askem long yu se, “?Yu yu bilif long Jisas?” maet oli rili wantem save from wanem yu no mekem lafet blong Krismas. Sipos yu save tingting blong man we i askem kwestin long yu, bambae yu save givim wan gudfala ansa long hem.—Luk 10:25-37.
3. ?Wanem ol buk we oli save halpem yumi blong faenem ol stret ansa we Baebol i givim long ol kwestin we man i askem long yumi?
3 Yusum Baebol Blong Givim Ansa: Beswan rod blong givim ansa long ol kwestin we man i askem long yu, hemia blong yusum Baebol. (2 Tim. 3:16, 17; Hib. 4:12) Reasoning buk, buklet ya “Statem Wan Storian,” mo “Bible Topics for Discussion” we i stap long New World Translation of the Holy Scriptures, oli save halpem yumi blong givim wan stret ansa long ol kwestin we man i askem. Nating sipos man we i askem kwestin i no wantem we yu soem wan vas blong Baebol long hem, be maet yu save talemaot long hem long kaen fasin wanem we Baebol i tijim. Traem pulum man ya blong tingting gud long waes we i stap long Baebol. Taem yu folem eksampol blong Jisas, bambae ansa blong yu i ‘olsem gol apol long wan plet silva’—i min se bambae ansa i soem respek, i mekem man i harem gud, mo i givhan long man.—Prov. 25:11, NW.
4. ?Long wanem taem, i stret we yumi no traem blong ansa long evri kwestin we man i askem?
4 ?Bambae Yumi Ansa Long Evri Kwestin? Sipos yu no save ansa blong wan kwestin, yu no mas sem blong talem se: “Mi no save ansa blong kwestin ya, be mi save go lukaot moa save long kwestin blong yu mo kambak bakegen blong givim ansa we mi faenem.” Taem yu talem wan tok olsem, yu soemaot se yu gat tingting daon mo se yu intres long man. Ale, fasin blong yu i save pulum man ya blong askem long yu blong kambak visitim hem bakegen. Sipos yu luk se man we i askem kwestin long yu i wantem agensem yu mo agiu nomo wetem yu, i gud yu folem eksampol blong Jisas. Yu givim wan sot ansa nomo. (Luk 20:1-8) Long sem fasin, sipos man we i askem kwestin long yu i no intres long trutok be i wantem blong tantanem yu nomo, i gud we, long kaen fasin, yu stopem storian blong yutufala mo yu gohed blong yusum taem blong yu blong lukaot olgeta we oli rili wantem save trutok.—Mat. 7:6.
5. ?Jisas i soemaot wanem eksampol we yumi save folem blong givim ansa long ol kwestin we ol man oli askem long yumi?
5 Jisas i save se i impoten blong dipen long Jeova sipos hem i wantem finisimgud wok blong hem blong “talemaot ol tok we i tru,” we i min se, hem i givim gudfala ansa long olgeta we oli askem kwestin blong faenemaot trutok. (Jon 18:37) !Yumi gat wan nambawan janis blong folem eksampol blong Jisas blong givim ansa long ol kwestin blong olgeta we oli stret “blong kasem laef we i no save finis”!—Wok 13:48.