Ol Kristin We Oli Mekem Wok Blong God Oli Mas Prea
1. ?Wanem samting we yumi mas mekem blong finisim wok blong prij?
1 Yumi no save finisim wok blong prij long paoa blong yumi nomo. Jeova nao i givim paoa long yumi blong mekem wok ya. (Fil. 4:13) Jeova i yusum ol enjel blong hem, blong oli givhan long yumi blong faenem ol man we oli olsem sipsip. (Rev. 14:6, 7) Jeova nomo i mekem ol sid blong trutok we yumi planem mo wotarem oli gru. (1 Kor. 3:6, 9) !Ol Kristin we oli mekem wok blong God, oli mas prea mo trastem Papa blong olgeta long heven!
2. ?Wanem sam samting we yumi save prea from?
2 Prea Long Saed Blong Yumi Wan: Yumi mas prea evri taem we yumi joen long wok blong prij. (Efes. 6:18) ?Wanem sam samting we yumi save prea from? Yumi save prea blong gat wan gudfala tingting long saed blong ol teritori blong yumi, mo blong yumi no fraet. (Wok 4:29) Yumi save askem long Jeova blong i lidim yumi i go long ol man we hat blong olgeta i stret, blong yumi save mekem Baebol stadi wetem olgeta. Sipos man blong haos i askem wan kwestin long yumi, yumi save mekem wan smol prea long tingting blong yumi. Yumi askem long Jeova blong i halpem yumi blong givim wan stret ansa long kwestin blong man ya. (Neh. 2:4) Yumi save askem waes tu, blong yumi mekem se wok blong prij i stap olsem wan impoten samting long laef blong yumi. (Jem. 1:5) Antap long samting ya, taem yumi talem tangkiu long Jeova, from we yumi stap olsem man blong wok blong hem, hem i glad tumas.—Kol. 3:15.
3. ?Taem yumi prea from ol narafala, olsem wanem hemia i givhan moa long wok blong prij?
3 Prea From Ol Narafala: Yumi mas “prea from ol narafala.” Sipos i stret, yumi save talem nem blong ol brata mo sista long ol prea blong yumi. (Jem. 5:16, NW; Wok 12:5) ?Olsem wanem sipos yu kasem wan sik we i blokem yu long wok blong prij? I gud yu prea from ol brata mo sista we oli gat strong bodi. !Yu no mas ting se prea we yu mekem long saed blong ol narafala i blong nating nomo! Hem i save gat bigfala paoa. I stret tu we yumi prea blong ol haeman oli letem wok blong prij i gohed, olsem nao ol brata mo sista blong yumi oli ‘save stap gud, mo gat pis’ long laef blong olgeta.—1 Tim. 2:1, 2.
4. ?From wanem yumi mas prea oltaem?
4 Wok blong talemaot gud nius long olgeta ples long wol, i wan bigfala wok we yumi no save mekem long prapa paoa blong yumi. Sipos yumi “prea oltaem,” Jeova bambae i halpem yumi blong finisim wok ya.—Rom 12:12.