“Yu No Mas Fraet”
1. ?Olsem Jeremaea, wanem tingting we yumi wanwan yumi save gat?
1 Taem Jeova i givim wok long Jeremaea blong i kam wan profet we i talemaot tok blong Hem, fastaem Jeremaea i harem se hem i no naf blong mekem wok ya. Be Jeova i leftemap tingting blong Jeremaea taem i talem long hem se: “Yu no mas fraet.” Mo Jeova i kaengud long Jeremaea, i givim paoa long hem blong finisim wok blong hem olsem wan profet. (Jer. 1:6-10) Tede, maet fasin blong sem, no tingting ya se yumi no naf, i save blokem yumi blong yumi no joen tumas long wok blong prij. Maet yumi fraet se man blong haos bambae i no lesin long tok we yumi talem long hem. Mo tu, yumi fraet se man blong haos bambae i gat wanem tingting long saed blong yumi. Ol tingting olsem oli save mekem we yumi no moa wantem talemaot trutok long ol man. ?Olsem wanem yumi save winim fraet ya, mo wanem ol blesing we yumi wanwan i save kasem?
2. ?Olsem wanem fasin blong rere gud i save halpem yumi blong blokem fraet, taem yumi stap prij?
2 Yu Mas Rere Gud Fastaem: Taem yumi rere gud, samting ya i save halpem yumi blong winim fraet. Yes, sipos long haos, yumi tingbaot fastaem sam tok we ol man oli stap talem blong blokem yumi, bambae yumi rere blong ansa taem man i talem ol tok olsem long yumi. (Prov. 15:28) I gud we long taem blong Famle Wosip, yumi mekem sam pleplei, we oli rerem yumi blong ansa long ol kaen tok we maet ol fren long skul no ol man long wok blong prij, oli talem blong blokem yumi.—1 Pita 3:15.
3. ?Taem yumi trastem Jeova, olsem wanem samting ya i halpem yumi blong winim fraet?
3 Yu Mas Trastem Jeova: Wan gudfala samting we i save givhan long yumi blong winim fraet, hemia fasin blong dipen long God. Jeova i promes se hem bambae i givhan long yumi. (Aes. 41:10-13) !Ating promes ya blong Jeova i mekem yumi harem se yumi no moa fraet blong prij! Mo tu, Jisas i promes se nating sipos man i talem wan tok long yumi we yumi no rere blong ansarem, be tabu spirit blong God bambae i halpem yumi blong yumi naf blong talemaot trutok long fasin we i stret. (Mak 13:11) Taswe, yumi mas prea oltaem long Jeova mo askem long hem blong i givim tabu spirit blong hem long yumi.—Luk 11:13.
4. ?Nating se yumi kasem sam trabol, wanem ol blesing we yumi kasem taem yumi gohed strong long wok blong prij?
4 Ol Blesing: Long wok blong prij, yumi stap kasem plante trabol. Be sipos yumi wok strong long wok ya, hemia bambae i givhan long yumi blong stanap strong tru long ol trabol we bambae oli kamaot long fiuja, mo blong winim olgeta. Bambae yumi gat ol fasin we oli sem mak olsem ol man we oli fulap long tabu spirit. Ol fasin ya hemia strong tingting mo fasin blong no fraet nating. (Wok 4:31) Mo tu, taem Jeova i givhan long yumi blong winim fraet, bilif blong yumi bambae i kam strong, mo bambae yumi trastem moa Jeova se hem bambae i blokem gud yumi. (Aes. 33:2) Yumi kasem glad mo yumi harem gud tu blong save se yumi stap mekem Papa blong yumi long heven i glad. (1 Pita 4:13, 14) !Ale, i gud yumi gohed blong talemaot gud nius blong Kingdom we yumi no fraet nating, mo oltaem yumi mas bilif strong se Jeova i stap halpem yumi!