Naoia i Taem Blong Go Tekem Kakae Long Garen
1. ?Wanem impoten wok i stap gohed naoia?
1 Taem Jisas i prij finis long woman Sameria, hem i talem long ol disaepol blong hem se: “Yufala i traem lukluk long ol kakae long garen. Naoia lif blong olgeta i drae finis, i taem blong go tekem kakae nao.” (Jon 4:35, 36) Long taem ya, wan wok blong hivimap ol man we oli lesin long tok blong God i stat, mo Jisas i luksave se wok ya bambae i kasem olgeta ples long wol. Naoia Jisas i stap long heven, mo hem i gohed blong lukluk long wok ya blong tekem ol kakae long garen. (Mat. 28:19, 20) ?Wanem ol samting we oli soemaot se wok ya i stap gohed blong kam bigwan moa, mo en blong hem i stap kam klosap moa?
2. ?Wanem ol samting we oli soemaot se wok ya blong tekem kakae long olgeta ples long wol i stap kam antap kwiktaem?
2 Wok Blong Tekem Kakae Long Olgeta Ples Long Wol: Long seves yia blong 2009, namba blong ol pablisa long fulwol, i go antap 3.2 pesen. Long ol kantri we i gat tabu long wok blong prij, namba blong ol pablisa i go antap 14 pesen. Namba blong ol Baebol stadi evri manis i bitim 7,619,000. Namba ya i bigwan moa long namba blong ol pablisa, mo i minim se i gat klosap 500,000 moa Baebol stadi i bitim laswan seves yia. Taem wok ya i gohed blong kam antap kwiktaem long plante ples, i nidim plante moa misinari we oli kasem trening long Gilead skul. Long plante kantri, i gat plante frut i stap kamaot taem ol pablisa oli prij long ol man we oli toktok narafala lanwis. I klia we Jehova i stap mekem wok ya i spid moa long taem ya blong tekem ol las kakae blong garen. (Aes. 60:22) ?Yu yu gat wan gudfala tingting long wok blong prij long ples blong yu?
3. ?Sam brata sista oli gat wanem tingting long wok blong tekem kakae long ples blong olgeta?
3 Wok Blong Tekem Kakae Long Ples Blong Yu: Maet samfala oli talem se: “Long ples blong mi, i no gat plante man we oli lesin taem mifala i prij.” I tru se long sam ples ol man oli glad blong lesin, be long sam narafala ples i no olsem, mo maet ol man oli no moa lesin olsem we oli mekem long ol yia we i pas. Taswe sam brata sista oli ting se wok blong tekem kakae long ples blong olgeta, klosap i finis, mo naoia wok blong olgeta i blong faenem ol wanwan man we oli stap yet. ?Olsem wanem? ?Hemia i tru?
4. ?Wanem stret tingting we yumi mas wokem long saed blong wok blong prij, mo from wanem?
4 Long taem blong tekem kakae long garen i gat plante wok blong mekem, long stat blong hem i go kasem en blong hem. Yu traem luk tok blong Jisas we i soemaot se taem i sot. Hem i se: “I gat plante kakae tumas i stap long garen we i rere finis, be smol man nomo oli stap blong karem i go long haos. Yufala i mas askem strong long masta blong garen ya, blong hem i save sanem sam moa man oli kam blong karem ol kakae ya i go long haos blong hem.” (Mat. 9:37, 38) Jehova i Masta blong garen ya, hem nao i jusum wetaem mo weples kakae i rere long hem. (Jon 6:44; 1 Kor. 3:6-8) ?Wanem wok blong yumi? Baebol i ansa se: “Yu mas planem ol kakae long garen blong yu long moning, mo long sapa tu [“yu no mas slakem han blong yu,” NW].” (Pri. 11:4-6) Yes, taem blong tekem kakae long garen i stap go from en blong hem nao. !Taswe yumi no mas slakem han blong yumi!
5. ?From wanem yumi mas gohed blong prij wetem strong tingting long teritori we i luk olsem se man i no wantem lesin?
5 Yumi Mas Gohed Blong Tekem Kakae Long Garen: Nating se yumi prij long teritori blong yumi plante taem finis mo i luk olsem se ol man oli no wantem lesin, i gat gudfala risen blong wok yet wetem strong tingting mo wetem tingting ya se taem i sot. (2 Tim. 4:2) Ol trabol we i stap mekem ol bigbigfala jenis long wol, oli mekem se ol man oli jenisim tingting blong olgeta mo oli tinghevi moa long fiuja. Ol yangfala we oli kam bigman, oli harem se oli mas faenem wan ples we i sef, blong oli save gat pis long tingting blong olgeta. Mo tu, strong tingting blong yumi i save pulum narafala blong lesin. Yes, ol man we oli no wantem lesin long yumi bifo, oli save lesin yet long yumi. Mo tu, yumi mas givim woning long ol man we oli minim nomo blong no lesin long yumi.—Esik. 2:4, 5; 3:19.
6. ?Wanem samting bambae i givhan long yumi blong gohed blong prij wetem strong tingting, nating se ol man long teritori blong yumi oli no wantem lesin?
6 ?Wanem samting bambae i givhan long yumi blong gohed blong prij wetem strong tingting, nating se ol man long teritori blong yumi oli no wantem lesin? I tru se yumi mas gohed blong prij long haos wanwan, be yumi save traem ol narafala rod blong prij tu, olsem maet yumi prij long ol man long ples blong wok blong olgeta no yumi yusum telefon blong prij long man. Mo yumi save jenjenisim ol fastok blong yumi blong yumi traem ol niufala rod blong storian long man. Yumi save jenisim program blong yumi mo joen long wok blong prij long sapa no long wan narafala taem we moa man oli stap long haos blong olgeta. Yumi save lanem wan niufala lanwis, blong yumi save kasem plante moa man wetem gud nius. Maet yumi mekem moa long wok blong prij taem yumi mekem wok blong fultaem paenia. Mo yumi save muf i go long ples we i gat smol man nomo blong tekem kakae long garen. Sipos yumi gat stret tingting long wok blong tekem kakae long garen, bambae yumi traehad moa blong joen fulwan long impoten wok ya.
7. ?Yumi mas wok blong hivimap ol man blong God gogo kasem wetaem?
7 Ol man we oli wokem garen oli gat smoltaem nomo blong pikimap ol kakae we oli rere finis. Taswe oli no spel mo oli no slakem olgeta gogo wok ya i finis. Ol man blong hivimap kakae long garen long saed blong spirit, oli mas gat tingting ya tu se taem i sot. ?Yumi mas wok blong hivimap ol man blong God gogo kasem wetaem? Yumi mas mekem wok ya long “ol laswan dei blong rabis wol ya” gogo kasem we “en” i kam. (Mat. 24:14, NW; 28:20, NW) Olsem Jisas we i nambawan man blong wok blong Jehova, yumi wantem finisim ol wok we Jehova i givim long yumi. (Jon 4:34; 17:4) Ale, i gud yumi gohed blong prij wetem strong tingting, glad, mo wan gudfala tingting gogo en i kam. (Mat. 24:13) !Wok blong tekem kakae long garen i no finis yet!
[Tok blong makem poen long pej 2]
Long taem blong tekem kakae long garen i gat plante wok blong mekem, long stat blong hem i go kasem en blong hem