Wan Presen We i Save Halpem Ol Famle
1. ?Evri wik, Sabat dei i mekem i gud olsem wanem long ol famle blong Isrel?
1 Loa ya long saed blong Sabat dei, hem i wan rod we Jehova i stanemap blong halpem ol famle. Ol man Isrel oli mas spel long ol wok blong olgeta, blong oli save gat taem blong tingting long ol gudfala fasin blong Jehova, mo long fasin fren blong olgeta wetem hem. Long taem ya nao, ol papa mama oli save tekem janis blong putum ol loa blong Jehova i go long hat blong ol pikinini blong olgeta. (Dut. 6:6, 7) Loa ya long saed blong Sabat dei, i mekem se evri wik, ol man blong Jehova oli gat taem blong putum tingting blong olgeta long wosip blong olgeta nomo.
2. ?Loa ya long saed blong Sabat dei, i tijim wanem long saed blong Jehova?
2 I tru, Jehova i no moa askem long ol famle blong oli folem loa ya blong Sabat dei. Be loa ya, i tijim wan samting long yumi long saed blong God. Oltaem nomo Jehova i intres tumas long fasin blong ol man blong hem blong stap frengud wetem hem. (Aes. 48:17, 18) Tede, wan rod we Jehova i stanemap blong soemaot se hem i lavem yumi, mo i intres long yumi, hemia naet blong Famle Wosip.
3. ?Wanem mak blong naet ya blong Famle Wosip?
3 ?Wanem Mak Blong Naet Ya Blong Famle Wosip? Long Jenuware 2009, Buk Stadi Blong Kongregesen i jenis i kam long sem naet ya we yumi mekem miting blong Tiokratik Skul, mo Miting Blong Kingdom Wok. Wan risen from wanem i gat jenis ya, hemia blong givim janis long ol famle blong oli mekem fasin fren blong olgeta wetem Jehova, i kam strong moa. Oli save mekem olsem taem oli makemaot wan naet evri wik, blong mekem famle wosip. Slef we i stret mo waes i talem se i gud blong wanwan famle, oli yusum naet ya we fastaem hem i naet blong buk stadi, blong oli mekem famle stadi blong olgeta long hem, sipos i stret long olgeta blong mekem olsem. Mo long naet ya, oli save joen wanples, mo tekem taem blong olgeta blong tokbaot Baebol, mo stadi long ol poen we oli save halpem famle blong olgeta.
4. ?Famle Wosip i mas stap wan aoa nomo? Eksplenem.
4 Fastaem, taem yumi go long Buk Stadi Blong Kongregesen, yumi nidim taem blong swim mo jenis, blong yumi wokbaot i go long ples blong miting, mo blong yumi mekem sam narafala samting bakegen. Plante man we oli stap go long Buk Stadi, oli luk se long naet ya, miting i wan aoa nomo, be taem we oli mas spenem blong go long miting ya mo kambak, i bitim wan aoa. Be naoia we program blong ol miting i jenis, yumi save jusum naet ya blong wosipim Jehova olsem wan famle. Be yumi no mas ting se Famle Wosip i mas stap wan aoa nomo. Blong makemaot se Famle Wosip blong yumi i mas longfala olsem wanem, yumi mas tingbaot nid blong famle blong yumi, mo samting we oli naf blong mekem.
5. ?Famle i mas spenem fultaem ya blong storian nomo? Eksplenem.
5 ?Famle i Mas Spenem Fultaem Ya Blong Storian Nomo? Taem wan man mo woman blong hem, no wan famle wetem ol pikinini, oli joen wanples blong tokbaot Baebol, oli stap lefleftemap tingting blong olgeta. (Rom 1:12) Mo hemia i mekem ol famle oli joengud. Taswe, ol storian long saed blong Baebol oli mas wan impoten haf blong naet ya blong Famle Wosip. Be, ol wanwan memba blong famle oli save spenem taem tu blong mekem prapa stadi blong olgeta. Olsem nao, maet afta we famle i storian wanples, wanwan long olgeta i save gohed blong stadi hem wan, hem i save finisim blong rerem ol miting blong hem, no hem i save ridim ol magasin. Sam famle oli jusum blong no lukluk televisin long ful naet ya.
6. ?Wanem sam rod blong mekem Famle Wosip?
6 ?Wanem Sam Rod Blong Mekem Famle Wosip? Yumi no mas ting se long taem blong Famle Wosip, oltaem i mas gat kwestin mo ansa nomo. Blong mekem se Famle Wosip i laef mo i pulum intres blong evriwan, plante famle oli folem wan program we i klosap sem mak long miting we yumi gat long medel blong wik. Blong mekem olsem, oli seraotem storian blong olgeta i go long plante haf, mo oli folem plante defren fasin blong storian. Olsem nao, maet oli joen wanples blong ridim Baebol, oli rerem wan haf blong miting, no oli mekem sam pleplei blong rere from wok blong prij. Long pej 6, i gat sam advaes blong mekem olsem.
7. ?Ol papa mama oli mas traehad blong mekem se, evriwan long famle oli harem olsem wanem?
7 ?Ol Papa Mama Oli Mas Traehad Blong Mekem Se, Evriwan Long Famle Oli Harem Olsem Wanem? Famle blong yu bambae i lanem plante gudfala samting moa, sipos i gat lav mo sipos oli harem gud long taem blong Famle Wosip. Maet samtaem, yufala i save stadi afsaed, sipos weta i gud. Sipos yufala i harem se yufala i mas spel smol long medel blong stadi, yufala i no mas fraet blong mekem olsem. Sam famle oli dring smol ti no jus, afta long Famle Wosip blong olgeta. Ol papa mama oli no mas yusum naet ya blong Famle Wosip, olsem wan taem blong tok long pikinini mo stretem hem. Be, sipos papa mama i luk se wan pikinini i gat problem no i gat wan fasin we i no stret, tufala i save yusum smol taem long Famle Wosip blong stretem samting ya. Be, i moa gud we papa mama i toktok wetem pikinini ya long wan narafala dei long wik, blong mekem se hem i no sem long fored blong ol brata sista blong hem. Famle Wosip i no mas wan taem we famle i kam taed long hem, mo i harem se i strong tumas. Be defren olgeta, Famle Wosip i mas wan taem blong harem gud, from we God ya we yumi wosipim, hem i wan God we i stap harem gud oltaem.—1 Tim. 1:11.
8, 9. ?Hed blong famle i mas mekem wanem blong rerem Famle Wosip?
8 ?Hed Blong Famle i Save Rerem Famle Wosip Olsem Wanem? Ol famle bambae oli save kasem gudfala samting moa, sipos hed blong famle i rerem gud fastaem ol wanwan haf blong naet ya blong Famle Wosip. Hem i mas tingbaot fastaem wanem we oli mas storian long hem, mo wanem beswan rod blong givim save ya long olgeta. (Prov. 21:5) I gud we hasban i toktok wetem waef blong hem long saed ya. (Prov. 15:22) Yufala ol hed blong famle, sam samtaem i gud we yufala i askem tingting blong ol pikinini blong yufala tu. Sipos yufala i mekem olsem, bambae yufala i save kasem save long tingting blong olgeta, mo wanem we oli intres long hem.
9 Hed blong famle i no nid blong tekem longtaem blong rerem niufala program blong Famle Wosip evri wik. Ating plante famle bambae oli glad moa, taem oli folem sem program evri wik. Taswe i no nid we hed blong famle i mekem wan niufala program evri taem. Maet hed blong famle i luk se i moa gud we hem i mekem rere stadi blong nekis wik, jes afta we stadi blong olgeta i finis. Hemia from we hem i tingbaot yet nid blong famle blong hem long saed blong spirit. Sam hed blong famle oli raetemdaon wan sotfala program, mo oli putum long wan ples we evriwan long famle i save luk, olsem long aes bokis. Hemia i mekem se evriwan long famle oli glad blong wet long taem ya, mo i givim i naf taem long olgeta blong rere, sipos i gat nid.
10. ?Olgeta we oli stap olgeta nomo, oli save yusum naet ya blong Famle Wosip olsem wanem?
10 ?Olsem Wanem Sipos Mi Stap Mi Wan Nomo, No Sipos Mi Mi Wan Nomo Long Trutok? Olgeta we oli stap olgeta nomo, oli save yusum naet ya blong Famle Wosip blong mekem prapa stadi blong olgeta. Wan gudfala samting we yu save mekem long prapa stadi blong yu, hemia blong ridim Baebol, rerem ol miting, mo ridim ol Wajtaoa mo Wekap! Sam pablisa oli ademap ol samting ya long program blong olgeta blong stadi wanwan. Sam samtaem, oli save singaot wan narafala pablisa, no wan famle blong i kam joen wetem olgeta, blong oli save givgivhan long olgeta, taem oli stap storian long Baebol.
11, 12. ?Wanem sam long ol blesing we yumi save kasem, taem yumi mekem Famle Wosip oltaem?
11 ?Wanem Ol Gudfala Samting We Yumi Save Kasem Taem Yumi Mekem Famle Wosip Oltaem? Olgeta we oli folem tru wosip wetem fulhat blong olgeta, oli kam klosap moa long Jehova. Mo tu, taem ol famle oli kam wanples blong mekem wosip, fasin blong olgeta blong joengud i kam strong moa. Wan man mo woman blong hem, tufala i raetem tingting blong tufala long saed blong ol blesing we tufala i kasem. Tufala i raetem se: “Mitufala i no gat pikinini, mo mitufala i mekem wok blong paenia. From samting ya, mitufala i glad tumas long naet ya blong Famle Wosip. Mitufala i harem se mitufala i kam klosap moa long mitufala, mo mitufala i kam klosap moa long Papa blong yumi long heven, Jehova. Naoia, taem mitufala i wekap long dei ya we mitufala i putum long program blong mitufala blong stadi tugeta, mitufala i asaskem long mitufala se: ‘?Yu traem tingbaot se tede long naet bambae yumitu mekem wanem? !Famle Wosip!’”
12 Plan ya blong gat wan naet blong famle wosip, i save halpem tu ol famle we oli bisi. Wan mama we hem wan nomo i stap lukaot long tufala boe blong hem, mo i stap mekem wok blong fultaem paenia, i raetem se: “Long ol yia we oli pas, famle stadi blong mifala i godaon. Mi mi taed tumas, ale mifala i stadi sam samtaem nomo, mo oltaem mifala i jenisim plan blong stadi. Mi no moa save wanem dei nao i stret blong mifala i stadi. Taswe, mi mi raet blong talem bigbigfala tangkiu long yufala, from naet ya blong Famle Wosip. Mifala i glad tumas we naoia mifala i mekem famle stadi oltaem, mo mifala i harem gud tumas long ol blesing we oli kamaot from.”
13. ?Sipos yumi wantem se famle blong yumi i kasem blesing from plan ya blong famle wosip, yumi mas mekem wanem?
13 Olsem loa ya blong Sabat dei, Papa blong yumi long heven, Jehova, i givim naet ya blong Famle Wosip olsem wan presen we i save halpem ol famle. (Jem. 1:17) Sipos ol famle blong Isrel bifo oli wantem se fasin fren blong olgeta wetem Jehova i kam strong moa, oli mas yusum gud Sabat dei. Long sem fasin, sipos yumi wantem se famle blong yumi i kasem blesing from famle wosip, yumi mas yusum gud naet ya blong Famle Wosip. (2 Kor. 9:6; Gal. 6:7, 8; Kol. 3:23, 24) Blong yusum gud plan ya blong Famle Wosip, famle blong yu i save talem olsem man ya blong raetem Sam, se: “Taem we mi mi kam stap klosap long yu, mi harem se i gud tumas long mi. Yu yu sefples blong mi, yu yu stap blokem mi.”—Sam 73:28.
[Tok blong makem poen long pej 5]
Famle Wosip i no mas wan taem we famle i kam taed long hem, mo i harem se i strong tumas. Be defren olgeta, Famle Wosip i mas wan taem blong harem gud, from we God ya we yumi wosipim, hem i wan God we i stap harem gud oltaem
[Bokis blong pija long pej 6]
KIPIM GUD
Sam Tingting We Yu Save Folem Blong Mekem Famle Wosip
Baebol:
• Yufala i save joen wanples blong ridim ol japta blong Baebol riding blong wik. Sipos japta we famle i ridim i wan stori we i gat plante defren man long hem, wan long famle i save ridim japta ya olsem se hem nao i stap talem stori ya, mo ol narafala oli save ridim toktok blong ol man long japta ya, olsem se olgeta nao ol man long stori ya.
• Yufala i save mekem wan pleplei folem ol vas blong Baebol we yufala i stap ridim.
• I gud we fastaem, wanwan memba blong famle oli ridim ol japta we oli jusumaot finis, mo oli save raetemdaon wan no tu kwestin we oli gat long saed blong haf ya we oli ridim. Ale, biaen olgeta evriwan oli save joen wanples blong mekem risej, blong faenem ansa blong ol kwestin ya.
• I gud we evri wik, yu wokem wan smol kad mo yu raetem wan vas blong Baebol long hem, mo yu traem blong save vas ya baehat mo eksplenem. I gud we yu wokem plante smosmol kad olsem, mo evri wik, yu lukluk olgeta bakegen blong luk se hamas vas we yu yu tingbaot.
• Yu save lesin long wan Baebol riding we oli rikodem, mo yu folem long Baebol blong yu.
Ol Miting:
• Yufala i save rerem ol haf blong miting wanples.
• Yufala i save lanem ol singsing blong kingdom, we i stap long program blong nekis miting.
• Sipos wan long famle i gat wan tok long Tiokratik Skul, no wan pleplei long Miting Blong Kingdom Wok, i gud we evriwan oli tokbaot sam tingting we i save givhan long hem blong rerem pleplei no tok ya. Sipos no, hemia we i gat tok no pleplei ya, i mekem haf ya long fored blong evriwan long famle.
Ol Nid Blong Famle:
• I gud blong tingbaot ol haf insaed long buk ya Ol Yangfala Oli Askem, no buk ya Learn From the Great Teacher.
• Yufala i save mekem sam pleplei blong trenem pikinini, blong hem i naf blong fesem sam samting we oli save traem hem long skul.
• I gud we papa mama mo ol pikinini, oli mekem sam pleplei, we papa mama tufala i mekem olsem se tufala nao oli pikinini, mo ol pikinini oli mekem olsem se olgeta nao oli papa mama. Hemia i min se ol pikinini oli mekem risej long wan poen, biaen oli tokbaot poen ya long papa mama blong olgeta.
Wok Blong Prij:
• Yufala i save mekem pleplei long sam fastok we yufala i save yusum long wok blong prij long wiken.
• Famle i save tokbaot sam mak we oli naf blong kasem, blong oli save joen moa long wok blong prij long ol manis bifo mo afta long Memoriol, mo long taem blong spel.
• Yu save letem smol taem long wanwan memba blong famle blong oli mekem sam risej, blong oli save olsem wanem blong ansa long ol defdefren kwestin we ol man oli save askem long wok blong prij. Mo biaen, i gud we oli mekem wan pleplei blong trenem olgeta.
Sam Narafala Tingting:
• Yufala i save ridim wan haf blong ol laswan magasin.
• I gud blong askem long wanwan memba blong famle, blong oli ridim fastaem wan haf blong ol niufala magasin we olgeta wanwan oli intres long hem, mo biaen, askem long olgeta blong oli tokbaot haf ya we oli ridim.
• I gud sipos wanwan taem, yu askem wan pablisa, no wan brata mo woman blong hem, blong oli kam joen wetem yufala long Famle Wosip blong yufala, mo maet yu save askem sam kwestin long olgeta.
• Yufala i save wajem, mo tokbaot wan long ol DVD blong yumi.
• Yufala i save tokbaot ol haf ya blong Wekap!, “Ol Yangfala Oli Askem” mo “Samting Blong Famle i Tokbaot.”
• Yufala i save tokbaot ol haf ya blong Wajtaoa, “Tijim Pikinini Blong Yu” mo “For Young People” (“Blong Ol Yangfala”).
• Yufala i save ridim wan haf blong Yearbook, no wan buk we yumi jes kasem long las distrik asembli blong yumi.
• Afta we yufala i go long wan asembli, i gud we yufala i lukluk bakegen ol bigfala poen we oli kamaot long taem ya.
• I gud we yufala i lukluk olgeta samting we Jehova i wokem, mo yufala i tokbaot ol samting ya blong faenemaot se oli tijim wanem long saed blong Jehova.
• Yufala evriwan i save wok wanples blong mekem wan projek. Maet yufala i wokem wan samting olsem sip blong Noa, no tempol, no wan narafala samting olsem, be i smol moa long hemia we i tru wan, no yufala i droem wan map, no yufala i droem wan plan.