Yumi Talem Tangkiu Long Jehova Yumi Kam Long Memoriol Long 17 Eprel
1. ?Wanem tingting blong man ya blong raetem Sam, we yumi mas gat long taem blong Memoriol?
1 From we Jehova i mekem plante samting blong soemaot sore long ol man mo blong sevem olgeta, man blong raetem Ol Sam i askem se: “?Bambae mi save givim wanem presen long hem?” (Sam 116:12) Tede, ol man blong God oli gat moa risen blong talem tangkiu long Jehova. Plante handred yia afta we oli raetem ol tok ya, Jehova i givim wan bigfala presen—Pikinini blong hem we i ded blong pemaot ol man. Taem yumi stap mekemrere blong tingbaot ded blong Kraes long namba 17 Eprel, yumi gat gudfala risen blong talem tangkiu long God.—Kol. 3:15.
2. ?Wanem sam risen blong talem tangkiu from sakrefaes blong Jisas?
2 Ol Blesing We Yumi Save Kasem From Ded Blong Kraes: From ded blong Kraes, ‘God i save fogivim yumi, i tekemaot sin blong yumi.’ (Kol. 1:13, 14) Samting ya i halpem yumi blong wosipim Jehova wetem wan tingting we i klin long fes blong hem. (Hib. 9:13, 14) Yumi no fraet blong talem evri samting long Jehova taem yumi kam klosap long hem long prea. (Hib. 4:14-16) Ol man we oli soemaot bilif long sakrefaes blong Jisas, oli gat janis blong kasem laef we i no save finis.—Jon 3:16.
3. ?Yumi save mekem wanem blong talem tangkiu long Jehova from sakrefaes blong Kraes?
3 ?Yumi Mekem Wanem Blong Talem Tangkiu?: Wan rod blong talem bigfala tangkiu, hemia blong mekem Baebol riding long saed blong Memoriol evri dei, mo blong tingting dip long hem. Yumi save prea long Jehova wetem fulhat blong yumi, blong soemaot se yumi tinghae long sakrefaes blong Kraes. (1 Tes. 5:17, 18) Taem yumi obei long tok blong Jisas nao yumi kam long Memoriol, yumi stap talem tangkiu from sakrefaes blong hem. (1 Kor. 11:24, 25) Mo tu, taem yumi singaot ol man oli kam long Memoriol wetem yumi, yumi folem fasin blong Jehova blong lavem olgeta man.—Aes. 55:1-3.
4. ?Yumi mas gat strong tingting blong mekem wanem?
4 Ol man blong Jehova we oli tinghae long ol samting we Jehova i mekem, oli no tingbaot Memoriol olsem wan narafala miting nomo. !Miting ya i impoten moa! Taem Memoriol i stap kam klosap, yumi mas gat strong tingting olsem man blong raetem Sam ya we i talem se: “Mi mi mas presem hem [Jehova], mo mi no save fogetem we hem i kaen tumas long mi.”—Sam 103:2.