Taem Yumi Prij Yumi Mas Gat Longfala Tingting

1. ?Jehova i mekem wanem blong soemaot se hem i gat longfala tingting long ol man?

¹ God i gat longfala tingting long ol man. (Eks. 34:6; Sam 106:41-45; 2 Pita 3:9) Wok blong talemaot Kingdom long olgeta ples blong wol i soemaot gud we God i lavem ol man mo i mekem tingting blong hem i longfala blong givhan long olgeta. Bitim 2,000 yia i pas finis Jehova i stap givhan long ol man. Mo hem i gohed yet blong pulum ol man we oli wantem fren gud wetem hem. (Jon 6:44) Yumi tu yumi mas gat longfala tingting olsem Jehova. ?Yumi save mekem wanem blong soemaot fasin ya taem yumi prij?

2. ?Taem yumi stap prij, yumi mekem wanem blong soemaot se yumi gat longfala tingting?

² Prij Long Ol Haos Wanwan: Yumi mas gohed nomo blong prij long ol ples we ol man oli no glad blong lesin long yumi. Long rod ya, yumi folem fasin blong Jehova we i gat longfala tingting. (Wok 5:42) Taem ol man oli no wantem lesin, no oli jikim yumi, no oli agensem yumi long wok blong prij, yumi mas gat longfala tingting mo yumi mas stanap strong. (Mak 13:12, 13) Samtaem i no isi blong faenem bakegen ol man we yumi bin storian gud wetem olgeta. Be sipos yumi gohed blong traehad blong putum wota long ol sid blong trutok, yumi stap soemaot se yumi gat longfala tingting.

3. ?From wanem yumi mas gat longfala tingting taem yumi mekem ol visit mo ol Baebol stadi?

³ Ol Baebol Stadi: Yumi mas gat longfala tingting sipos yumi wantem luk wan flaoa i gru i kam bigwan. Yumi save putum wota long hem, be yumi no save mekem hem i gru kwik. (Jem. 5:7) Samting ya i sem mak long wan man we i stap lanem trutok. Hem i gohed sloslo nomo. (Mak 4:28) Maet i had blong ol man we yumi mekem stadi long olgeta oli sakemaot ol giaman bilif mo ol kastom we oli no stanap long Baebol. Yumi no mas fosem olgeta blong jenisim ol bilif mo fasin blong olgeta, from we yumi wantem nomo se oli gohed kwik. Yumi mas letem naf taem i pas blong spirit blong God i wok long hat blong olgeta. Blong mekem olsem, yumi mas gat longfala tingting.—1 Kor. 3:6, 7.

4. ?Longfala tingting bambae i givhan long yumi olsem wanem, taem yumi prij long ol famle we oli no gat sem bilif olsem yumi?

⁴ Ol Famle We Oli No Gat Sem Bilif: Yumi wantem tumas we ol famle blong yumi we oli no gat sem bilif olsem yumi, oli kasem trutok. Be yumi mas wet gogo kasem wan stret taem, blong yumi talemaot bilif blong yumi long olgeta. Mo yumi no mas givim tumas save wantaem. Olsem nao, yumi soemaot se yumi gat longfala tingting. (Pri. 3:1, 7, NW) Taem yumi stap wet, ol fasin blong yumi oli save soemaot samting we trutok i mekem long laef blong yumi. Mo yumi mas rere oltaem blong talemaot bilif blong yumi long kwaet fasin mo wetem bigfala respek. (1 Pita 3:1, 15) Yes, sipos yumi gat longfala tingting taem yumi prij, bambae wok blong yumi i karem moa frut, mo bambae yumi mekem Papa blong yumi long heven i glad.