Yu Mas Trenem Pikinini Blong Yu Long Wok Blong Jehova
1. ?Ol papa mama oli mas mekem wanem blong folem tok blong Ol Sam 148:12, 13?
1 Jehova i singaot ol yangfala blong oli presem hem. (Sam 148:12, 13) Taswe, ol papa mama oli tijim pikinini long ol trutok blong Baebol mo long ol loa blong God. Be i no hemia nomo. Oli mas trenem hem tu blong i save talemaot gud nius. Samting ya i tekem taem. ?Oli save mekem olsem wanem?
2. ?Taem papa mama i soemaot rod, pikinini i mekem wanem?
2 Yu Soemaot Rod: Gideon, wan haeman long Isrel bifo, i talem long ol 300 man blong hem se: ‘Yufala i mas lukluk mi. Wanem samting we mi mekem, yufala tu i mas mekem.’ (Jaj. 7:17) Oltaem pikinini i lukluk papa mama blong hem, mo i mekem samting we tufala i mekem. Yu traem tingbaot stori ya blong wan papa. Hem i wok evri naet, mo i taed tumas taem hem i kambak long haos. Nating se i olsem, evri Sarede moning hem i tekem ol pikinini blong hem oli go prij. Taem hem i soemaot rod olsem, hemia nomo i naf blong mekem ol pikinini oli luksave se wok blong prij i impoten tumas. (Mat. 6:33) ?Olsem wanem? ?Pikinini blong yu i luk se yu yu glad blong mekem ol samting we i joen wetem wosip, olsem prea, ridim Baebol, ansa long miting, mo prij? I tru, yu yu no stret gud olgeta. Be sipos pikinini blong yu i luk se yu yu stap traehad long wok blong Jehova, bambae hem i glad moa blong folem ol tijing we yu givim long hem.—Dut. 6:6, 7; Rom 2:21, 22.
3. ?Wanem ol niufala samting we papa mama i save tijim pikinini long hem?
3 Yu Tijim Hem Long Ol Niufala Samting: Ol papa mama oli no kam les blong tijim pikinini blong wokbaot, toktok, putum klos, mo plante narafala samting olsem. Taem pikinini i lanem ol samting ya finis, papa mama i tijim hem long ol niufala samting. Ol papa mama long trutok oli givhan long pikinini blong i lanem tu ol niufala samting long saed blong wosip, folem yia mo save blong hem. (1 Kor. 9:26) ?Olsem wanem? ?Pikinini blong yu i stap ansa long miting long prapa toktok blong hem? ?Hem i stap rerem ol tok blong hem long Tiokratik Skul? Yu mas tijim hem blong i mekem ol samting ya. (Sam 35:18) ?Yu yu stap trenem hem long ol defren haf blong wok blong prij? ?Olsem wanem long baptaes mo wok blong paenia? ?Yu stap givhan long hem blong i kam naf blong mekem ol samting ya? I gat plante brata mo sista we oli mekem wok blong prij wetem bigfala glad mo strong tingting. ?Yu yu stap mekem rod blong pikinini blong yu i joen oltaem wetem olgeta?—Prov. 13:20.
4. ?Wanem gudfala frut i save kamaot sipos yu trenem pikinini long wok blong Jehova taem hem i smol nomo?
4 Ol Sam 71:17 i talem se: “God, i stat long taem we mi mi yangfala, yu yu stap tijim mi, mo mi stap tokbaot yet ol bigfala wok ya blong yu.” Yu mas trenem pikinini blong yu long wok blong Jehova taem hem i smol nomo. !Gudfala tijing we yu givim bambae i givhan long hem long ol yia we oli kam!—Prov. 22:6.