Yu Mas Lukaot Gud Long Tingting We i Save Jajem Yu
1. Long niufala seves yia blong 2013, ?wanem nem blong asembli blong wan dei? ?Asembli ya bambae i givhan long yumi olsem wanem?
1 Evri dei, yumi stap fesem plante samting we oli pulum yumi blong yumi no moa lesin long tingting blong yumi we i save jajem yumi. Taswe long seves yia 2013 we i stat long Septemba 2012, asembli blong wan dei i karem nem ya se “Yu Mas Lukaot Gud Long Tingting We i Save Jajem Yu.” (1 Tim 1:19) Tingting ya we i save jajem yumi, hem i wan nambawan presen we God i givim. Asembli ya bambae i givhan long yumi blong tingbaot se yumi stap yusum presen ya olsem wanem.
2. ?Wanem ol impoten kwestin we bambae yumi faenem ansa blong olgeta long asembli ya?
2 Traem Faenem Ansa Blong Ol Kwestin Ya: Long asembli ya bambae yumi kasem ansa blong seven impoten kwestin long saed blong tingting we i save jajem yumi:
• ?Wanem sam samting we oli save mekem se tingting blong yumi i no moa jajem yumi?
• ?Yumi save mekem wanem blong trenem tingting blong yumi blong i lidim gud yumi?
• ?Yumi save mekem wanem blong bambae yumi no gat fol taem rabis man i lus?
• Taem yumi mas mekem wan desisen we Baebol i no talem wan loa long hem, nao yumi tingbaot ol stamba tijing blong Baebol mo yumi folem, ?samting ya i soemaot wanem?
• ?Yumi save mekem wanem blong yumi no spolem tingting blong narafala?
• Ol yangfala. ?Yufala i save mekem wanem blong stanap strong taem ol narafala oli agensem yufala?
• ?Wanem ol blesing we yumi kasem taem tingting blong yumi i pulum yumi blong mekem ol samting we tabu spirit i wantem?
3. ?Asembli ya bambae i givhan long yumi olsem wanem?
3 Setan i traem plante samting blong mekem we tingting blong yumi i no moa jajem yumi. Be Jehova i save givhan long yumi blong winim Setan. Jehova i Papa blong yumi long heven, mo hem i lavem yumi tumas. Taswe hem i givim Baebol mo ogenaesesen blong hem, blong talem long yumi se: “Hemia rod. Yufala i folem.” (Aes. 30:21) Long asembli ya, bambae Jehova i talem long yumi rod blong folem. Taswe i gud yumi mekem plan naoia blong stap long asembli ya blong lesin long olgeta tok blong hem. Yu mas lesin gud mo traem tingbaot se yu save mekem ol tok ya i wok long laef blong yu olsem wanem. Taem yu stap wetem famle blong yu, i gud yufala i tokbaot ol samting we yufala i harem long asembli ya. Sipos yumi traehad blong folem ol samting we yumi lanem, bambae yumi strong moa blong ‘mekem ol stret fasin we tingting blong yumi i klin gud.’ Bambae yumi no save letem ol samting blong rabis wol ya blong Setan i trikim yumi nao yumi lusum rod.—1 Pita 3:16.