I Gud Yumi Tingbaot Ol Profet Ya—Maeka
1. ?Wanem kwestin we maet Maeka i stap tingbaot? ?From wanem wok we hem i mekem i no blong nating nomo?
1 ‘?En blong ol rabis fasin blong wol ya bambae i kamtru wetaem?’ Maet profet Maeka tu i stap tingbaot kwestin ya, taem hem i stap talemaot se Jehova bambae i jajem ol kingdom blong Isrel mo Juda. Be nating se i olsem, wok we Maeka i mekem i no blong nating nomo. Long yia 740 B.K.T., taem Maeka i laef yet, tok we Jehova i talem agensem ol man Sameria i kamtru. (Maeka 1:6, 7) Mo biaen bakegen, tok blong hem i kamtru, taem Jerusalem i lus long yia 607 B.K.T. (Maeka 3:12) Taem yumi stap wet long Jehova blong i mekem jajmen blong hem i kamtru long taem blong yumi, ?yumi save folem fasin blong Maeka olsem wanem?
2. Taem yumi stap wet long dei blong Jehova, ?olsem wanem yumi soemaot se yumi gat longfala tingting, mo from wanem?
2 Yumi Mas Gat Longfala Tingting: Maeka i raetem se: “Be mi, [Jehova] i God blong mi, mo oltaem bambae mi putum tingting blong mi i stap strong long hem nomo. . . . Bambae mi stap wet long hem, from we hem nao bambae i kam sevem mi.” (Maeka 7:7) Be Maeka i no stap sidaon nomo, mo i wet se en bambae i kam, nogat. Hem i bisi long wok blong Jehova. Long sem fasin, taem yumi stap wet long dei blong Jehova blong i kamtru, yumi tu yumi mas bisi long wok blong Jehova. Yumi mas ol man we i ‘tabu, yumi man blong God, mo yumi mas mekem ol fasin we hem i wantem.’ (2 Pita 3:11, 12) Jehova i gat longfala tingting long ol man, taswe hem i givim janis long olgeta blong oli tanem tingting blong olgeta from ol sin blong olgeta. (2 Pita 3:9) I gud we yumi tu yumi folem tok blong Baebol, blong gat longfala tingting, olsem ol profet bifo.—Jem. 5:10.
3. ?From wanem yumi mas askem strong long Jehova blong i givim tabu spirit long yumi?
3 Yumi Mas Dipen Long Paoa Blong Jehova: Nating se wok we Maeka i mekem i no isi, be hem i dipen long Jehova blong i givim paoa long hem, nao hem i save mekem gud wok blong hem. (Maeka 3:8) Jehova i save se yumi nidim hem blong i givim paoa long yumi. Taswe long Baebol, Jehova i talem se yumi mas askem long hem blong i givim paoa long yumi. Hem i glad nomo blong givim paoa long olgeta we oli taed, blong oli save mekem gud ol wok blong hem. (Sam 84:5, 7; Aes. 40:28-31) ?Yu yu luk finis se Jehova i stap givim paoa long yu taem yu stap mekem tabu wok blong hem? ?Yu yu stap askem strong oltaem long Jehova blong i givim tabu spirit blong hem long yu?—Luk 11:13.
4. ?Wanem gudfala eksampol we Maeka i soemaot long yumi tede?
4 Maeka i mekem samting we Jehova i wantem, fastaem long ol narafala samting. Hem i gat strong tingting blong holemstrong long Jehova, nating se ol man raonabaot long hem oli gat ol rabis fasin. Long sem fasin, evri dei yumi fesem sam samting we oli traem fasin blong yumi blong holemstrong long Jehova. From samting ya, i gud we yumi mekem tingting blong yumi i strong blong “wokbaot olwe long nem blong Jehova, God blong yumi, gogo i no save finis.”—Maeka 4:5, NW.