!Manis Ogis Bambae i Wan Spesel Manis Long Histri!

1. ?Long manis Ogis, bambae yumi mekem wanem spesel wok long fulwol?

¹ Yumi stap kam klosap moa long taem ya we bambae i makem 100 yia we Kingdom blong God i rul. !Taswe i stret nomo we yumi joen long wan spesel wok, blong ona long Jehova! Long manis Ogis, bambae yumi seremaot wan niufala traket long fulwol, we nem blong hem “?Weples Yu Save Faenem Ansa Blong Ol Impoten Kwestin?” Traket ya bambae i pulum ol man, blong oli lukluk long Baebol blong faenem ansa blong ol kwestin blong olgeta. Mo tu, bambae i soemaot olsem wanem Websaet ya jw.org i save givhan long olgeta.

2. ?Yumi save mekem wanem blong yumi joen wetem ol narafala blong ‘singsingaot bigwan blong presem Jehova’?

² Yumi Singsingaot Bigwan Blong Presem Jehova: I gat wan plan blong givhan long ol pablisa we oli wantem prij moa long manis Ogis. Plan ya hemia se olgeta we oli baptaes finis, mo oli wantem mekem wok blong haftaem paenia oli save kasem 30 aoa. Long Ogis i gat faef wiken, taswe ol pablisa we oli wok fultaem, no oli skul, oli save mekem haftaem paenia tu. Sipos wan Baebol stadi blong yu no wan pikinini blong yu i naf blong kam pablisa, i gud yu toktok wetem kodineta blong kampani blong ol elda kwiktaem. !Bambae i gud tumas sipos olgeta ya oli kam pablisa long spesel manis ya! Long manis Ogis plante fultaem paenia oli stap spel, be maet long manis ya oli save jenisim program blong olgeta blong oli joen fulwan long spesel wok ya. Ol famle oli save stat naoia blong tokbaot samting we oli save mekem, blong oli joen wetem ol narafala blong oli ‘singsingaot bigwan blong presem Jehova.’—Esra 3:11; Prov. 15:22.

3. ?Yumi wantem tumas se spesel wok ya bambae i olsem wanem?

³ Yumi stap joen finis blong mekem sam spesel wok olsem. Be yumi wantem tumas se wok ya long manis Ogis, bambae i wan spesel wan long histri. ?Olsem wanem? ?Yumi save kasem wan niufala namba blong ol aoa, ol pablisa, mo ol haftaem paenia long manis Ogis? Taem yumi kasem en blong seves yia 2014, bambae yumi luk we Jehova i blesem bigfala wok we ol man blong hem oli mekem long fulwol, blong talemaot gud nius long manis Ogis. I no gat wan taem bifo we oli mekem bigfala wok olsem.—Mat. 24:14.