I Gud Yumi Tingbaot Ol Profet Ya—Neham
1. ?Bambae yumi lanem wanem long buk blong Neham?
1 Olfala taon blong Nineve we i lus finis, i pruvum se profet tok we Neham i talemaot i kamtru. Hem i talemaot se, Jehova bambae i givim panis long ol enemi blong Hem. Mo ol man we oli strong blong agensem Jehova bambae oli no naf blong stanap long fes blong Hem. (Neham 1:2, 6) Taem yumi lukluk gud long profet tok blong Neham, yumi save lanem sam lesen we oli save givhan long yumi long wok blong prij.
2. ?Yumi save mekem wanem blong givhan long ol man we yumi prij long olgeta?
2 Yumi Leftemap Tingting: Fastaem taem yumi ridim buk blong Neham, maet yumi ting se hem i tokbaot nomo bigfala trabol we i kasem Nineve, we hem i flas taon blong Asiria. (Neham 1:1; 3:7) Be ol tok we profet Neham i talem, oli olsem wan nius we i mekem ol man blong Jehova oli glad. Nem blong Neham i minim “leftemap tingting.” Taswe, ol tok we Neham i talemaot, oli mekem ol man Isrel oli save se i no longtaem bambae ol enemi blong olgeta oli lus. Biaen Neham i tokbaot Jehova se, “taem ol man blong hem oli stap long trabol, hem i save lukaot gud long olgeta.” (Neham 1:7) Yumi save folem eksampol blong Neham. Taem yumi prij, yumi talemaot gud nius mo yumi leftemap tingting blong ol man blong oli trastem Jehova.—Neham 1:15.
3. ?Olsem wanem yumi save folem fasin blong Neham?
3 Yumi Yusum Ol Eksampol Mo Ol Stori: Jehova i pulum profet Neham blong tokbaot trabol we bambae i kasem Nineve, olsem taem ya we ol man Asiria oli spolem taon ya Tebes we i kaptel blong Ijip. (Neham 3:8-10) Yumi save folem fasin blong Neham, taem yumi tokbaot bigfala dei blong Jehova long ol man, yumi yusum ol profet tok blong Baebol we oli soemaot se evri samting we Jehova i talem, oli kamtru. Eksampol, long yia 632 bifo Kraes, ol ami blong Babilon mo Media oli joen wanples blong faet agensem ol man Nineve. Long taem ya, i gat bigfala ren we i mekem se Taegris reva i ron bigwan gogo i kavremap ol ples. Ale, samting ya i mekem wan haf blong stonwol blong bigfala taon blong Nineve i foldaon. Wantaem nomo ol ami oli spolem taon ya. Ol samting ya oli kamtru, stret olsem we Jehova i talem.—Neham 1:8; 2:6.
4. ?Taem yumi prij, i gud yumi mekem wanem?
4 Yumi Talem Ol Tok We Oli Klia Blong Man i Kasem Save: Ol tok blong Neham oli gat paoa, mo hem i eksplenem klia samting we hem i talem. (Neham 1:14; 3:1) Long sem fasin, taem yumi prij, i gud yumi yusum ol tok we oli isi blong man i kasem save long hem. (1 Kor. 14:9) Long faswan taem we yu prij long man, i gud we yu tokbaot klia from wanem yu kam luk hem. Taem yu mekem Baebol stadi wetem wan man, i gud yu givhan long hem blong i gat strong bilif long Jehova mo Baebol. Mo tu, yu givhan long hem blong i luksave olsem wanem samting we hem i lanem i save givhan long laef blong hem.—Rom 10:14.
5. ?Profet tok we Neham i talemaot i save givhan long yumi olsem wanem?
5 Neham i trastem ol profet tok we Jehova i talemaot se bambae oli mas kamtru. Ale hem i raetem ol tok ya long buk we i karem nem blong hem long Baebol. Klosap nao rabis wol blong Setan bambae i finis. Yumi glad tumas blong save se: ‘Ol trabol bambae oli no moa kamaot bakegen.’—Neham 1:9.