Ol Tul We Yumi Yusum Blong Tijim Man
1. ?Olsem wanem ol Kristin oli olsem man blong wokem haos?
1 Wan man we i gat gudhan blong wokem haos i yusum plante tul. I gat sam tul we hem i yusum blong mekem ol spesel wok, mo i gat sam narafala tul we hem i yusum oltaem. Hemia nao ol tul we hem i gat gudhan blong yusum. Man ya i stap karem ol tul ya long tul bokis blong hem. Baebol i talem se ol Kristin oli mas traehad blong kam ‘wan man blong wok blong God we i no gat sem long wok blong hem.’ (2 Tim. 2:15) ?Wanem nao impoten tul we yumi gat blong tijim ol man? Hemia Baebol, bigfala tul we yumi stap yusum blong pulum ol man oli kam disaepol. (Mat. 28:19, 20) Yumi mas traehad blong gat gudhan blong yusum Baebol, blong “tijim ol man long trutok blong God long fasin we i stret gud.” Be ol Kristin oli gat sam narafala tul bakegen we oli yusum oltaem, mo oli mas lanem blong gat gudhan blong yusum ol tul ya.—Prov. 22:29.
2. ?Wanem sam narafala tul we yumi yusum blong tijim ol man?
2 Ol Tul Blong Tijim Man: ?Wanem sam narafala tul bakegen we yumi yusum blong tijim ol man long Baebol? Wan tul, hemia buk ya ?Wanem Samting We Baebol i Rili Tijim? Afta we yumi finisim buk ya, yumi yusum narafala buk ya ‘Stap Long Laef Ya We God i Lavem Yu,’ we i tijim man blong i folem ol rul blong Baebol long laef blong hem. Taswe, yumi mas gat gudhan blong yusum tufala buk ya. Mo tu, i gat sam buklet we yumi yusum olsem tul blong tijim ol man. Yumi stap yusum !Gud Nius We i Kamaot Long God! blong statem ol Baebol stadi. Sipos i gat sam man long teritori blong yumi we oli no save rid gud no oli toktok narafala lanwis we i no gat plante buk long hem, yumi save yusum buklet ya Yu Mas Lesin Long God Nao Bambae Yu Laef Olwe. Blong lidim ol stadi oli kam long ogenaesesen, yumi save yusum buklet ya ?Hu i Stap Mekem Samting We Jehova i Wantem? Mo tu, i gat sam video we oli save givhan long yumi blong yumi pulum ol man oli kam disaepol, olsem tufala video ya ?From Wanem Yu Mas Stadi Baebol? mo ?Wanem i Stap Hapen Insaed Long Haos Kingdom? Yumi mas lanem blong gat gudhan blong yusum ol tul ya.
3. ?Long ol manis we oli stap kam, Kingdom Wok Blong Yumi bambae i givhan long yumi olsem wanem?
3 Long ol manis we oli stap kam, Kingdom Wok Blong Yumi bambae i givhan long yumi blong yumi gat gudhan blong yusum ol tul blong yumi. Taem yumi traehad blong yusum gud ol tul ya, yumi stap folem advaes we Pol i talem long Timoti, se: “Yu mas lukaot gud long fasin blong yu, mo long ol tok we yu stap tijim ol man long hem. Oltaem yu mas mekem olgeta fasin ya. Sipos yu mekem olsem bambae yu save sevem yu, wetem ol man we oli stap lesin long yu.”—1 Tim. 4:16.