?Olsem Wanem Blong Kasem Hat Blong Olgeta We Yumi Tijim?

1. ?Tijing blong Jisas i mekem wanem long ol man we oli lesin long hem?

¹ Jisas i kasem hat blong ol man taem hem i tijim olgeta. Wan taem, hem i eksplenem ol tok blong Baebol long tu disaepol blong hem, nao tufala i “harem gud tumas” long ol tok blong hem. (Luk 24:32) Blong man i mekem jenis long laef blong hem, hem i mas obei long God long olgeta hat blong hem. ?Taswe, olsem wanem yumi save pulum olgeta we yumi tijim blong oli mekem olsem?—Rom 6:17.

2. ?Olsem wanem fasin ya blong toktok gud mo luksave samting i save givhan long yumi blong kasem hat blong man?

² Toktok Gud Mo Luksave Samting: Taem yumi talem long ol man wanem fasin i stret mo wanem fasin i no stret, samting ya bambae i no save givhan long olgeta. Mo sipos yumi yusum plante vas long Baebol blong tok agensem bilif blong olgeta, hemia tu bambae i no save givhan long olgeta. Blong pulum man blong mekem samting we i stret, yumi mas kasemsave fastaem from wanem hem i bilif olsem. Taem yumi yusum ol toktok we oli gud mo yumi yusum ol gudfala kwestin, samting ya bambae i givhan long hem blong talemaot tingting we i stap long hat blong hem. (Prov. 20:5) Taem yumi mekem olsem, bambae yumi save yusum ol vas blong Baebol we oli stret gud long hem mo we i save tajem hat blong hem. Taswe yumi mas soemaot se yumi gat intres long hem mo yumi mas gat longfala tingting tu. (Prov. 25:15) I gud blong tingbaot se, sam man oli gohed gud long trutok kwiktaem nomo be sam oli slo. Yumi mas letem tabu spirit blong Jehova i gat paoa long tingting mo fasin blong olgeta.—Mak 4:26-29.

3. ?Olsem wanem yumi save givhan long olgeta we yumi tijim blong oli gat ol gudfala fasin?

³ Givhan Long Olgeta Blong Oli Gat Ol Gudfala Fasin: Ol vas blong Baebol we oli soemaot ol gudfala fasin blong Jehova mo lav we hem i gat long yumi, i save givhan long olgeta we yumi tijim blong oli wokem ol gudfala fasin. Yumi save yusum ol vas olsem Ol Sam 139:1-4 no Luk 12:6, 7, blong soemaot long olgeta se Jehova i tingbaot yumi wanwan. Taem ol man oli kasemsave se Jehova i kaen gud long olgeta, samting ya bambae i pulum olgeta blong oli lavem Jehova mo oli mekem ol gudfala fasin. (Rom 5:6-8; 1 Jon 4:19) Mo tu, taem oli kasem save se fasin blong olgeta i save mekem Jehova i glad no i no glad, hemia bambae i save pulum olgeta blong oli wantem mekem samting we i leftemap nem blong God mo mekem hem i glad.—Sam 78:40, 41; Prov. 23:15.

4. ?Olsem wanem yumi soem respek long man we yumi tijim?

⁴ Jehova i no save fosem ol man blong oli obei long ol loa blong hem. Be, hem i soemaot long ol man se i waes blong oli folem ol advaes blong hem long Baebol. (Aes. 48:17, 18) Yumi folem fasin blong Jehova, taem yumi tijim man long fasin we i givhan long hem blong mekem prapa desisen blong hem long samting we hem i stap lanem. Taem ol man oli luksave se oli mas mekem ol jenis long laef blong olgeta, hemia i save gat moa paoa long olgeta mo oli save holemstrong longtaem. (Rom 12:2) Mo oli kam klosap moa long Jehova, we hem i stap lukluk hat blong man.—Prov. 17:3.