I Gud Yumi Tingbaot Ol Profet Ya—Habakuk
1. ?From wanem i gud yumi tingbaot stori blong profet Habakuk?
1 Taem yumi stap fesem ol trabol we oli stap kam antap tede, yumi save harem olsem Habakuk we i askem long Jehova se: “?From wanem yu letem mi mi stap luk ol trabol ya olsem? ?Bambae yu yu stap lukluk ol trabol ya gogo kasem wetaem?” (Hab. 1:3; 2 Tim. 3:1, 13) Taem yumi tingting dip long ol tok blong Habakuk mo gudfala eksampol blong hem, hemia i save givhan long yumi blong stanap strong kasem dei ya we God bambae i jajem ol man long hem.—2 Pita 3:7.
2. ?Olsem wanem yumi save soemaot se tingting blong yumi i stap strong long Jehova?
2 Tingting Blong Yumi i Mas Stap Strong Long Jehova: Habakuk i harem nogud from ol trabol we hem i fesem, be hem i no letem ol trabol ya i winim hem. Hem i holemstrong long Jehova mo i gohed blong mekem wok blong hem. (Hab. 2:1) Jehova i promes long Habakuk se tok blong Hem bambae i kamtru long stret taem mo se ‘olgeta ya nomo we fasin blong olgeta i stret, bambae oli save laef, from we tingting blong olgeta i stap strong long Jehova.’ (Hab. 2:2-4) ?Hemia i minim wanem long ol Kristin we oli laef long taem blong en? Samting we i impoten moa hemia se en bambae i kam, be i no se wetaem bambae en i kam. Bilif i pusum yumi blong wekap gud oltaem mo wok strong long wok blong prij.—Hib. 10:38, 39.
3. ?From wanem yumi mas holemtaet glad we yumi kasem long wok blong Jehova?
3 Yumi Harem Gud From We Jehova i God Blong Yumi: Taem King Gogo i agensem ol man blong Jehova, long taem ya bambae i gat ol samting oli traem bilif blong yumi. (Esik. 38:2, 10-12) Ol faet i mekem evri man oli harem nogud, mo ol man tu we oli win long faet oli harem nogud. Bambae yumi no moa gat kakae, maet yumi lusum olting blong yumi mo fasin blong laef i kam nogud. ?Bambae yumi mekem wanem taem yumi kasem ol trabol ya? Habakuk i save se bambae hem i kasem trabol, taswe hem i traehad blong holemtaet glad we hem i kasem taem hem i gohed blong mekem wok blong Jehova. (Hab. 3:16-19) “Oltaem [Jehova] i stap mekem yumi glad” mo hemia i givhan long yumi blong winim ol trabol we bambae yumi fesem long fiuja.—Neh. 8:10; Hib. 12:2.
4. ?Yumi save glad long wanem naoia mo long fiuja?
4 Olgeta we oli laef tru long jajmen dei, bambae oli gohed blong lanem ol gudfala fasin we Jehova i glad long hem. (Hab. 2:14) Mo tu, olgeta we bambae oli laef bakegen oli save lanem moa long saed blong Jehova. I gud we naoia yumi yusum evri janis we yumi gat blong tokbaot Jehova mo ol nambawan wok blong hem.—Sam 34:1; 71:17.