LAEF BLONG OL KRISTIN
Faenem Glad Long Wok Blong Prij
Maet plante long yumi i faenem i had blong prij. ?From wanem? From we maet ol man long teritori blong yumi oli no intres, oli agens, o maet from we yumi fraet blong toktok long ol strenja. Yes, ol samting ya oli save mekem se yumi no moa glad blong prij. Be Jehova i wan God we i hapi, mo hem i wantem se yumi mekem wok blong hem wetem glad. (Sam 100:2; 1Ti 1:11) Bambae yumi luk tri risen we i save mekem yumi glad long wok blong prij.
Faswan se, yumi stap talemaot wan mesej blong hop. Nating se plante man oli no moa gat hop, yumi save mekem se oli harem gud long “gud nius” blong Kingdom blong God (Aes 52:7) Be gud nius ya i save mekem yumi tu yumi glad. Bifo we yumi go prij, i gud yumi tingting dip long ol blesing we Kingdom blong God bambae i mekem i kamtru long wol ya.
Seken wan se, gud nius we yumi stap talemaot i mekem i gud long ol man long saed blong bodi mo spirit. Oli lanem blong lego ol rabis fasin mo oli lanem olsem wanem blong kasem laef we i no save finis. (Aes 48:17, 18; Ro 1:16) Yumi save tingbaot se yumi olsem wan man we i stap lukaotem ol man we oli lus blong i givhan olgeta. Nating se samfala oli no wantem se yumi givhan long olgeta, be yumi gohed blong lukaotem olgeta we oli wantem se yumi givhan long olgeta.—Mt 10:11-14.
Namba tri we i impoten moa, hemia se, taem yumi prij yumi stap ona long Jehova. Hem i tinghae tumas long wok we yumi mekem. (Aes 43:10; Hib 6:10) Antap moa, Jehova i glad blong givim tabu spirit blong hem long yumi blong mekem wok blong hem. Taswe, yumi mas askem hem blong i givim glad, we i wan frut blong tabu spirit. (Ga 5:22) Mo tu, hem i save givhan long yumi blong winim ol wari blong prij mo i mekem se yumi no fraet blong prij. (Wok 4:31) Ol risen ya oli save mekem se yumi glad long wok blong prij, nating se ol man long teritori oli no glad.—Esik 3:3.
?Yu wantem gat wanem filing taem yu prij? ?From wanem i gud yumi soemaot se yumi glad taem yumi prij?
WAJEM VIDEO YA STADI MO TINGTING DIP BLONG KASEMBAK GLAD, MO BIAEN YU ANSA LONG OL KWESTIN YA:
?From wanem i impoten we yumi stadi oltaem, nating se evri manis yumi spenem plante aoa long wok blong prij?
Olsem wanem yumi save folem eksampol blong Meri?
Wetaem i stret blong tingting dip long Tok blong God?
Wanem i mekem se yu glad taem yu stap talemaot gud nius?