LAEF BLONG OL KRISTIN

Halpem Man We i No Intres Long Ol Relijen Blong Save Krieta

Maet yu no wantem prij long olgeta we oli no intres long ol relijen, from yu ting se bambae oli no lesin. Sipos i olsem, tingbaot se plante long olgeta we oli no bin intres long ol relijen o oli bilif se i no gat God, oli kam ol Witnes blong Jehova. Maet, samting we oli nidim hemia smol save nomo we i save halpem olgeta blong faenemaot ol pruf se i gat wan God.—Ro 1:20; 10:14.

WAJEM VIDEO YA RIMEMBA—!ENI MAN I SAVE LANEM BLONG GAT BILIF!—MAN WE I NO INTRES LONG RELIJEN, BIAEN ANSA LONG KWESTIN YA:

?Olsem wanem ekspiriens blong Tommaso i halpem yu blong gat positif tingting blong prij long ol man we oli no intres long ol relijen?

Your answer

Olsem wanem blong mekem

Sipos wan man i talem se hem i no bilif long God, i gud yu kaen, waes, mo soemaot se yu intres long ol tingting mo filing blong hem long topik we yutufala i tokbaot. (2Ti 2:24) Tokbaot ol topik we maet oli save pulum intres blong hem. ?Hem i glad blong tokbaot ol pruf we oli save lidim hem blong bilif se i gat wan Krieta? Sipos i olsem, yusum ol buk mo ol video we oli wokem blong givhan long saed ya. Buklet ya Was Life Created? mo The Origin of Life—Five Questions Worth Asking i stap tu long Tijing Tulboks blong mekem i isi long olgeta blong faenem.

Maet long stat yu fraet blong tokbaot trutok long wan man we i no bilif long God. Maet yu save askem wan pablisa we i gat ekspiriens blong i givhan long yu. Mo tu, tingbaot se Jehova i save halpem yumi blong kasem hat blong olgeta we oli stret blong kasem laef, nating se long stat oli no bilif long God.—Wok 13:48.