Lav Mo Tangkiu Bambae i Pulum Yu Blong Baptaes

1-2. Folem Ol Wok 8:27-31, 35-38, ?wanem i pulum haeman blong Itiopia blong i baptaes?

?YU YU wantem baptaes blong kam wan disaepol blong Kraes? Lav mo tangkiu long Jehova i pulum plante man blong oli baptaes. Traem tingbaot wan haeman we i wok blong kwin blong Itiopia.

² Wantaem nomo, man Itiopia ya i tekem aksen folem ol samting we hem i lanem long Baebol. (Ridim Ol Wok 8:27-31, 35-38.) ?Wanem i pulum hem? Hem i tinghae long Tok blong God. Taem hem i aot long Jerusalem blong gobak long Itiopia, hem i stap sidaon long kat we hos i pulum mo i stap ridim buk blong Aesea. Taem Filip i eksplenem samting we Jisas i mekem blong givhan long yumi, man ya i glad. ?Be from wanem haeman ya i bin go long Jerusalem? From we hem i lavem Jehova. ?Olsem wanem yumi save samting ya? Hem i go long Jerusalem blong mekem wosip long Jehova. Hem i lego skul we hem i bon long hem mo i joenem nesen ya we i wosipim trufala God. Lav ya we hem i gat long Jehova i pulum hem blong i mekem wan narafala impoten samting tu, hemia blong baptaes mo kam disaepol blong Kraes.—Mat. 28:19.

3. ?Wanem i save blokem yu blong yu no baptaes? (Yu luk bokis ya “?Hat Blong Yu i Wanem Kaen Graon?”)

³ Lav i save pulum yu blong yu baptaes, be lav i save blokem yu tu blong yu no baptaes. ?Olsem wanem? Tingbaot sam eksampol. Maet yu lavem ol famle mo ol fren blong yu we oli no wosipim Jehova, mo yu fraet se bambae oli no moa laekem yu sipos yu baptaes. (Mat. 10:37) Maet yu laekem sam fasin we God i no laekem nating, mo i had blong yu lego ol fasin ya. (Sam 97:10) Maet yu gruap long wan famle we oli mekem ol lafet blong giaman skul. Ating yu gat ol gudfala memori blong ol lafet ya, mo i had blong lego ol samting ya we Jehova i no laekem. (1 Kor. 10:20, 21) Kwestin we yu mas askem, hemia se: “?Mi mi lavem hu moa?”

?YU MAS LAVEM HU MOA?

4. ?Wanem bigfala samting we bambae i pulum yu blong baptaes?

⁴ I gat plante gudfala samting we yu save lavem mo tinghae long olgeta. Bifo we yu stadi wetem ol Witnes blong Jehova, ating yu laekem Baebol. Mo maet yu lavem Jisas tu. Taem yu mitim ol Witnes blong Jehova, yu laekem blong joen wetem olgeta. Be ol gudfala samting ya oli no naf blong pulum yu blong givim laef blong yu long Jehova mo baptaes. Bigfala samting we bambae i pulum yu blong baptaes, hemia lav we yu gat long Jehova God. Sipos yu lavem Jehova bitim eni narafala samting, yu no save letem wan samting i blokem yu blong mekem wosip long hem. Yu save tingbaot lav long Jehova olsem doa we i openem rod blong baptaes, mo fenis we i blokem yu blong yu no lego rod ya.

5. ?Bambae yumi tokbaot wanem long stadi ya?

⁵ Jisas i talem se yumi mas lavem Jehova long olgeta hat, laef, tingting, mo paoa blong yumi. (Mak 12:30) ?Olsem wanem yu save respektem mo lavem Jehova? Sipos yu tingbaot olsem wanem Jehova i lavem yu, bambae yu lavem hem moa. (1 Jon 4:19) Long stadi ya, bambae yu kasem save long ol samting we yu mas mekem blong lavem Jehova mo baptaes.

6. Folem Rom 1:20, talem wan rod blong kasem save long Jehova.

⁶ Ol samting we Jehova i wokem oli tijim yumi long hem. (Ridim Rom 1:20; Rev. 4:11) I gud yu tingting dip long ol tri mo animol mo olsem wanem oli soemaot waes blong Jehova. Traem kasem save olsem wanem Jehova i wokem bodi blong yumi long nambawan fasin. (Sam 139:14) Tingbaot bigfala paoa we Jehova i putum long san, hemia wan nomo long plante milian sta long skae.b (Aes. 40:26) Taem yu mekem olsem, bambae yu gat moa respek long Jehova. Be i no naf blong save nomo se Jehova i waes mo i gat paoa. Blong lavem hem mo fren gud wetem hem, yu mas save gud hem.

7. Blong lavem Jehova fulwan, ?yu mas bilivim wanem?

⁷ Yu mas bilif fulwan se Jehova i stap tingbaot yu. ?Olsem wanem? ?I had blong yu yu bilif se God we i wokem heven mo wol i stap tingbaot yu mo i lavem yu? Sipos i had, yu mas tingbaot se Jehova “i no stap longwe nating long yumi evriwan.” (Wok 17:26-28) Hem i ‘save olgeta tingting blong yu,’ mo olsem hem i promes long Deved mo Solomon, “sipos yu girap, yu lukaot hem, bambae hem i glad blong tekem yu.” (1 Kron. 28:9) Blong talem stret, wan risen from wanem yu stap stadi Baebol naoia, hemia from we Jehova ‘i pulum yu yu kam long hem.’ (Jon 6:44) Moa we yu tinghae long Jehova from evri samting we hem i mekem long yu, moa we bambae yu lavem hem.

8. ?Olsem wanem blong talem tangkiu from lav blong Jehova?

⁸ Wan rod blong talem tangkiu from lav blong Jehova, hemia blong prea long hem. Sipos yu tokbaot ol wari blong yu long hem mo talem tangkiu long hem, bambae yu lavem hem moa. Mo taem yu luk olsem wanem hem i ansa long ol prea blong yu, bambae yu fren gud wetem hem. (Sam 116:1) Bambae yu sua se hem i kasem save long yu. Be blong kam klosap long Jehova, yu mas kasem save long tingting blong hem. Mo yu mas save wanem we hem i askem long yu blong yu mekem. Wan rod nomo blong kasem ol save ya, hemia blong stadi long Tok blong hem, Baebol.

9. ?Olsem wanem blong soemaot se yu tinghae long Baebol?

⁹ Tinghae long Tok blong God, Baebol. Baebol nomo i talemaot trutok long saed blong Jehova mo ol plan blong hem. Yu soemaot se yu tinghae long Baebol, taem yu ridim evri dei, yu rerem gud Baebol stadi blong yu, mo yu folem samting we yu lanem. (Sam 119:97, 99; Jon 17:17) ?Olsem wanem? ?Yu yu stap folem wan program blong ridim Baebol evri dei?

10. ?From wanem Baebol i defren long ol narafala buk?

¹⁰ Ol man we oli luk ol wok blong Jisas, oli raetemdaon long Baebol. Hemia wan samting we i mekem se Baebol i defren long ol narafala buk. Mo tu, Baebol nomo i givim stret save long samting we Jisas i mekem blong yu. Taem yu save samting we Jisas i talem mo i mekem, bambae yu wantem fren gud wetem hem.

11. ?Wanem i save givhan long yu blong yu lavem Jehova?

¹¹ Lavem Jisas, nao bambae yu lavem Jehova moa. ?From wanem i olsem? From we Jisas i soemaot gud ol fasin blong Papa blong hem. (Jon 14:9) Taswe, taem yu kasem save moa long Jisas, yu kasem save moa long Jehova, mo yu lavem hem. Traem tingbaot olsem wanem Jisas i sore long ol man we ol narafala oli ting nating long olgeta, olsem ol puaman, ol sikman, mo olgeta we oli no gat paoa. Mo tu, traem tingbaot ol gudfala advaes we Jisas i givim, mo olsem wanem laef blong yu i kam gud moa taem yu folem.—Mat. 5:1-11; 7:24-27.

12. Taem yu kasem save long Jisas, ?hemia i save pulum yu blong mekem wanem?

¹² Bambae yu lavem Jisas moa sipos yu tingting dip long sakrefaes we hem i mekem, blong God i save fogivim ol sin blong yumi. (Mat. 20:28) Taem yu kasem save se Jisas i ded from yu, hemia i save pulum yu blong yu tanem tingting blong yu, mo yu askem long Jehova blong i fogivim yu. (Wok 3:19, 20; 1 Jon 1:9) Taem yu lavem Jisas mo Jehova, bambae yu wantem joen wetem ol narafala tu we oli lavem tufala.

13. ?Bambae Jehova i mekem wanem blong givhan long yu?

¹³ Lavem ol brata mo sista. Maet ol famle mo fren blong yu we oli no save Jehova, oli no kasem save from wanem yu wantem givim laef blong yu i go long hem. Maet oli agensem yu strong. Jehova i givhan long yu, taem hem i mekem se yu joen long bigfala famle blong ol brata mo sista long kongregesen. Sipos yu joen oltaem wetem olgeta, bambae oli lavem mo sapotem yu. (Mak 10:29, 30; Hib. 10:24, 25) Sloslo, maet sam stret famle blong yu oli joenem yu blong wosipim Jehova, mo blong obei long ol loa blong hem.—1 Pita 2:12.

14. Folem 1 Jon 5:3, ?olsem wanem ol loa blong Jehova oli givhan long yu?

¹⁴ Respektem ol loa blong Jehova mo folem. Bifo we yu save Jehova, ating yu mekem samting we yu nomo yu ting se i stret. Be naoia yu luksave se i moa gud blong folem ol loa blong Jehova. (Sam 1:1-3; ridim 1 Jon 5:3.) Traem tingbaot advaes we Baebol i givim long ol hasban, ol waef, ol papa mo mama, mo ol pikinini. (Efes. 5:22–6:4) Taem yu folem advaes ya long famle, ?yu luk se yufala i glad moa? Taem yu folem advaes blong Jehova blong jusum gud ol fren, ?yu luk se fasin blong yu i kam gud moa? ?Yu yu glad moa? (Prov. 13:20; 1 Kor. 15:33) Ating bambae yu ansa se yes.

15. ?Wanem i save givhan long yu blong yu folem ol advaes blong Baebol?

¹⁵ Samtaem i had blong save olsem wanem blong folem ol advaes blong Baebol we yu stap lanem. Taswe Jehova i yusum oganaesesen blong hem blong wokem ol buk we oli eksplenem Baebol, blong halpem yu blong luksave samting we i stret mo samting we i no stret. (Hib. 5:13, 14) Taem yu ridim ol buk ya mo yu stadi long olgeta, yu luk se ol advaes blong olgeta i stret mo i wok gud, nao yu wantem joen long oganaesesen blong Jehova.

16. ?Jehova i mekem wanem plan blong givhan long ol man blong hem?

¹⁶ Lavem mo sapotem oganaesesen blong Jehova. Jehova i mekem plan se i gat ol kongregesen, mo i putumap Pikinini blong hem Jisas, blong i hed blong olgeta. (Efes. 1:22; 5:23) Jisas i putumap wan smol grup blong ol tabu Kristin, blong oli lidim mo lukaot long wok we hem i wantem se yumi mekem tede. Jisas i kolem grup ya se “gudfala slef we i waes.” Olgeta long grup ya oli tinghevi long wok we oli mekem blong givhan long yu blong kam klosap long God, mo blong fren gud oltaem wetem hem. (Mat. 24:45-47) Wan rod we gudfala slef ya i yusum, hemia ol elda we oli lidim mo protektem yu. (Aes. 32:1, 2; Hib. 13:17; 1 Pita 5:2, 3) Ol elda oli rere blong mekem evri samting we oli save mekem blong leftemap tingting blong yu, mo blong halpem yu blong yu kam klosap moa long Jehova. Wan narafala impoten samting we oli mekem, se oli halpem yu blong yu kam naf blong tijim ol narafala long Jehova.—Efes. 4:11-13.

17. Folem Rom 10:10, 13, 14, ?from wanem yumi tokbaot Jehova long ol narafala?

¹⁷ Givhan long ol narafala blong oli lavem Jehova. Jisas i talem long ol man blong hem se oli mas tijim ol narafala long saed blong Jehova. (Mat. 28:19, 20) Maet yu obei long tok ya from we yu save se yu mas obei. Be taem yu lavem Jehova moa, bambae yu gat sem tingting olsem aposol Pita mo Pol, we tufala i talem se: “Mitufala i no save stop blong tokbaot samting we mitufala i luk mo mitufala i harem.” (Wok 4:20) Glad we yu kasem taem yu halpem narafala blong i lavem Jehova, i bigwan bitim mak. !Traem tingbaot olsem wanem Filip i glad taem hem i halpem man Itiopia blong i kasem save long trutok blong Baebol mo i baptaes! Taem yu folem fasin blong Filip mo yu obei long tok blong Jisas blong prij, yu soemaot se yu wantem kam wan Witnes blong Jehova. (Ridim Rom 10:10, 13, 14.) Long taem ya, bambae yu askem sem kwestin olsem man Itiopia, se: “?Wanem nao i blokem mi blong mi no save baptaes?”—Wok 8:36.

18. ?Bambae yumi tokbaot wanem long nekis stadi?

¹⁸ Taem yu baptaes, yu mekem wan desisen we i moa impoten i bitim ol narafala desisen long laef blong yu. From samting ya, yu mas tingting gud long baptaes. ?Yu mas save wanem long saed blong baptaes? ?Yu mas mekem wanem bifo mo afta long baptaes? Bambae yumi faenem ansa blong ol kwestin ya long nekis stadi.