Kwestin

Ol fasin long Galesia 5:22, 23, ?olgeta nomo oli kamaot long tabu spirit?

Ol vas ya oli tokbaot naen fasin blong ol Kristin: “Tabu spirit i save mekem se man i gat ol gudfala fasin olsem: Lav, glad, pis, tingting we i longfala, kaen, gud fasin, bilif, kwaet fasin, mo bos long tingting.” Be i no ol fasin ya nomo we oli kamaot long tabu spirit.

Traem tingbaot samting we aposol Pol i talem long ol vas bifo, i se: “Ol wok we oli kamaot long tingting blong man . . . oli olsem: Enikaen doti fasin blong seks, ol doti fasin, ol nogud fasin we man i no sem blong mekem, wosipim aedol, bisnes blong posen mo kleva, badfren long narafala, raorao, jalus, faerap long kros, faet, seseraot, ol smosmol grup we i folem tijing blong wan man nomo, wantem kasem mak blong narafala man, drong, ol rabis lafet, mo ol narafala samting olsem.” (Gal. 5:19-21) I gat plante narafala “wok we oli kamaot long tingting blong man,” olsem olgeta we Kolosi 3:5 i tokbaot, be Pol i no tokbaot olgeta long ol vas ya. I sem mak long ol naen gudfala fasin long Galesia 5:22, 23. Pol i no traem blong talem olgeta fasin we oli kamaot long tabu spirit.

Yumi kasem save samting ya taem yumi skelem ol fasin ya wetem ol tok we Pol i raetem long kongregesen blong Efesas, i se: “Laet i mekem se man i gat evri gudfala fasin, i gat stret fasin, mo i folem trutok.” (Efes. 5: 8, 9) Yes, “gudfala fasin” wetem stret fasin mo trutok, oli ol fasin we “laet i mekem se man i gat,” mo tu, oli fasin we “tabu spirit i save mekem se man i gat.”

Taem Pol i raet long Timoti, hem i tokbaot sikis gudfala fasin, hemia ‘stret fasin, holemstrong long God, bilif, lavem ol man, stanap strong, mo kam kwaet man.’ (1 Tim. 6:11) Tri nomo long ol fasin ya (bilif, lav, mo kwaet fasin) oli stap long lis blong ol fasin we oli kamaot long tabu spirit. Be Timoti i nidim tabu spirit blong wokem ol narafala fasin tu we vas ya i tokbaot, olsem stret fasin, holemstrong long God, mo stanap strong.—Skelem wetem Kolosi 3:12; 2 Pita 1:5-7.

Taswe, Galesia 5:22, 23 i no tokbaot olgeta fasin we oli kamaot long tabu spirit. Tabu spirit i save givhan long yumi blong yumi gat ol naen fasin we ol vas ya oli tokbaot. Be i gat plante narafala fasin tu we yumi mas wokem blong kam klosap moa long Jehova, mo blong ‘werem niufala fasin we God i wokem folem samting we hem i wantem. Niufala fasin ya i joen wetem stret fasin mo fasin ya blong holemstrong oltaem.’—Efes. 4:24.