Yu Save Jusum Fiuja Blong Yu

Samwe 3,500 yia bifo, Jehova God i talem long ol man blong hem samting we oli mas mekem blong oli save gat wan gudfala fiuja, i se: “Mi mi putum laef mo ded, mo blesing mo trabol long fored long yufala. Yufala i mas jusum laef blong bambae yufala i save stap laef, yufala wetem olgeta we oli kamaot biaen long yufala.”—Dutronome 30:19.

Blong gat wan gudfala fiuja, ol man ya oli mas jusum gud samting we oli mekem. Tede tu yumi gat jus blong mekem. Baebol i talem olsem wanem blong jusum wan gudfala fiuja, i se: “Taem yufala i lavem Jehova we i God blong yufala, yufala i lesin long voes blong hem.”—Dutronome 30:20.

?OLSEM WANEM BLONG LAVEM JEHOVA MO LESIN LONG HEM?

STADI LONG BAEBOL: Blong lavem Jehova, faswan samting hemia se yu mas stadi long Baebol blong save hem. Taem yu mekem olsem, bambae yu faenemaot se hem i wan God we i gat lav mo i wantem halpem yu. Hem i wantem se yu prea long hem, “from we hem i kea long [yu].” (1 Pita 5:7) Baebol i promes se sipos yu traehad blong kam klosap long hem, “hem bambae i kam klosap long [yu].”—Jemes 4:8.

MEKEM OL SAMTING WE YU LANEM: Blong lesin long God i min se yu mas folem ol advaes blong hem long Baebol. Taem yu mekem olsem “bambae rod blong yu i go gud nao bambae yu mekem fasin we i waes.”—Josua 1:8.