?Yu Yu Save?

Wan toktok we i sapotem Baebol

LONG musium ya Bible Lands Museum long Jerusalem, i gat wan blok blong ston we oli katem wan toktok long hem. Ston ya i blong samwe ol yia 700-600 B.K.T. Ol man oli bin karem ston ya long wan kev we oli stap berem ol man long hem, klosap long Hebron, long Isrel. Toktok we oli katem long ston ya i talem se: “I gud Yahweh Sabaot i mekem trabol i kam long Hagaf, we i boe blong Hagav.” ?Olsem wanem toktok ya i sapotem Baebol? Hem i soem se ol man long taem blong Baebol, oli savegud nem blong God, Jehova, we oli raetem se YHWH long olfala lanwis Hibru, mo oli yusum nem ya evri dei. Blong talem stret, ol narafala raeting we oli stap long ol kev ya, oli soem se ol man we oli yusum ol kev ya blong mitim ol narafala mo blong haed, plante taem oli raetem nem blong God mo ol nem we i gat nem blong God long olgeta, long ol wol blong ol kev ya.

Dr. Rachel Nabulsi blong Yunivesiti Blong Jojia, i tokbaot ol raeting ya, i se: “Nem ya YHWH i kamaot plante taem long ol kev ya, hemia i tijim yumi long wan impoten samting. . . . Oli soem se nem ya YHWH i impoten tumas long laef blong ol man Isrel mo Juda.” Samting ya i sapotem Baebol, se nem blong God, hemia YHWH we oli raetem long ol Hibru leta, i kamaot plante taosen taem long Baebol. Mo tu, plante taem nem blong God i stap tu long nem blong ol man.

Tok ya “Yahweh Sabaot,” we oli katem long blok blong ston ya, i minim “Jehova komanda blong ol ami.” Hemia i soem se ol man long taem ya, oli yusum plante taem tok ya “Jehova komanda blong ol ami.” Hemia tu i sapotem Baebol, we i yusum tok ya “Jehova komanda blong ol ami” 283 taem long Hibru Haf Blong Baebol, plante taem long Aesea, Jeremaea, mo Sekaraea.