Saekol Blong No Laekem Narafala

?From wanem i gat saekol blong nogud fasin ya long wol? Blong kasem ansa, yumi mas save se fasin ya blong no laekem narafala i minim wanem, from wanem ol man oli stat blong no laekem narafala, mo olsem wanem hem i spred.

?Fasin Ya Blong No Laekem Narafala i Minim Wanem?

Fasin ya hem i wan strong filing blong no laekem wan man o grup blong man. Hem i no wan filing we i stap smoltaem nomo, be i stap longtaem.

?FROM WANEM OL MAN OLI STAT BLONG NO LAEKEM NARAFALA?

Ol man oli stat blong gat fasin ya from plante risen. Samtaem ol man oli no laekem narafala i no from samting we narafala i mekem, be jes from ples we hem i kamaot long hem. Oli ting se evriwan long ples ya oli nogud, oli save mekem nogud long ol narafala, mo hemia fasin blong olgeta, oli no save jenis. Mo oli save luk olgeta olsem we oli nating nomo, o olsem ol man blong mekem problem nomo. Sam man oli gat fasin ya from i gat vaelens, i nogat jastis, o from sam samting we i bin hapen bifo.

?OLSEM WANEM I SPRED?

Samtaem man i no laekem narafala, nating se hem i no mitim olgeta. Eksampol, wan man i save gat filing ya, sipos ol famle mo ol fren blong hem oli gat filing ya. Taswe, sipos sam long famle o komuniti oli no laekem wan grup blong ol man, kwiktaem nomo, evriwan long famle o komuniti ya oli save gat filing ya tu.

Taem yumi kasemsave olsem wanem fasin ya blong no laekem narafala i save spred kwik, bambae yumi kasemsave from wanem plante man oli gat fasin ya. Be blong winim saekol blong no laekem narafala, yumi mas save olsem wanem fasin ya i stat. Yumi save faenemaot long Baebol.

BAEBOL I SOEMAOT STAMBA BLONG FASIN YA

Pija blong tu aro we oli raonem tufala, we i representem ol fasin we i mekem saekol blong no laekem narafala. 1. Giaman infomesen, komuniti, sosol Media, ol nius 2. No kasemsave long kalja, ples, religen. 3. Fraet long, jenis, lusum samting, samting we i save hapen. 4. No laekem narafala, jajem man, spolem man, kilim man.

MAN I NO STATEM FASIN YA BLONG NO LAEKEM NARAFALA. Fasin ya i stat taem wan enjel i rebel agensem God, nao i kam Devel Setan. Devel ya “i man blong kilim man i ded.” Hem i “man blong giaman mo hem i papa blong ol giaman toktok,” we i gohed blong promotem fasin blong no laekem man mo agensem man. (Jon 8:44; 1 Jon 3:11, 12) Baebol i diskraebem hem olsem man blong spolem narafala, kros bitim mak mo atakem man.—Job 2:7; Revelesen 12:9, 12, 17.

I ISI BLONG OL SINMAN I GAT FASIN YA BLONG NO LAEKEM NARAFALA. Faswan man ya Adam i folem fasin ya blong Setan. From samting ya, olgeta man oli kam sinman. (Rom 5:12) Ken we i fasbon blong Adam, i no laekem brata blong hem Ebel nao i kilim hem i ded. (1 Jon 3:12) I tru plante man oli soem lav mo sore long ol narafala. Be from sin, i isi blong man i tingbaot hem nomo, i jalus, mo i flas. Hemia ol fasin we i mekem ol man oli no laekem narafala.—2 Timoti 3:1-5.

TAEM MAN I JAJEM NARAFALA I ISI BLONG I NO LAEKEM HEM. Wol ya i pulum ol man blong no laekem narafala, taem hem i promotem fasin blong nogat sore mo wantem mekem i nogud long narafala. Fasin blong jajem man we i defren, spolem mo daonem narafala, mo spolem propeti i kam antap from we “fulwol i stap long paoa blong man ya we i rabis,” Devel Setan.—1 Jon 5:19.

Baebol i no talemaot stamba blong nogud fasin ya nomo, hem i talemaot rod blong winim tu.