Oli Givim Bisket Long Tufala Dog
NICK we i laef long Oregon, U.S.A i talem se: “Long stat blong 2014 mi tekem tufala smol dog blong mi blong go wokbaot long taon. Mo oltaem ol Witnes oli stap stanap wetem ol troli blong olgeta long medel blong taon. Oli talem halo mo oli smael long evri man we i pas.
“Ol Witnes ya oli no jes kaen long ol man nomo, be oli kaen tu long ol dog blong mi. Wan dei Elaine we i stanap klosap long troli, i givim sam bisket long tufala smol dog blong mi. Afta long taem ya, enitaem we mifala i pas klosap long ol troli, tufala dog i wantem go long ol Witnes blong oli save kakae bisket.
“Naoia sam manis i pas. Ol dog oli laekem bisket blong olgeta, mo mi tu mi glad blong storian smol wetem ol Witnes, be mi no wantem storian tumas wetem olgeta. Mi mi gat bitim 70 yia, mo mi no savegud se bilif blong ol Witnes i olsem wanem. From we mi no glad long plante relijen we oli talem se oli Kristin, mi gat tingting se i moa gud mi stadi Baebol mi wan nomo.
“Long ol taem ya, mi luk ol narafala Witnes tu oli stanap wetem ol troli blong olgeta long ol narafala pat blong taon. Olgeta tu oli kaen mo oltaem oli yusum Baebol blong ansarem ol kwestin blong mi. Mo hemia i mekem mi trastem olgeta moa.
“Wan dei, Elaine i askem mi se, ‘?Yu yu bilif se ol animol oli wan presen we i kam long God?’ Mi ansa se: ‘!Yes, mi mi bilif fulwan!’ Biaen Elaine i ridim Aesea 11:6-9 long mi. Stat long taem ya i go, mi wantem blong save moa long saed blong Baebol, be yet mi no wantem tekem eni buk long ol Witnes.
“Sam dei afta, mi storian gud wetem Elaine mo hasban blong hem, Brent. Tufala i talem blong mi ridim Matiu kasem Ol Wok blong kasemsave se i minim wanem blong folem fasin blong Kraes. Ale mi mekem. I no longtaem afta, mi akseptem blong stadi Baebol wetem Brent mo Elaine. Hemia samwe long medel blong yia 2016.
“Evri wik mi luk fowod long Baebol stadi blong mi mo blong go long ol miting long Haos Kingdom. Mi glad tumas blong lanem samting we Baebol i tokbaot. Mo wan yia afta mi tekem baptaes olsem wan Witnes blong Jehova. Naoia mi gat 79 yia, mo mi glad tumas se mi faenem trufala skul. Jehova i blesem mi taem hem i letem mi mi kam pat blong famle blong hem long fulwol.”