Wan Profet Tok We i Impoten Long Yu

1. ?Jehova i mekem wanem stret afta we Adam mo Iv i mekem sin? (Jenesis 3:15)

STRET afta we Adam mo Iv i mekem sin, Jehova i talem wan impoten profet tok we i givim hop long ol pikinini we bambae oli kamaot biaen long tufala. Samting we hem i talem i stap long Jenesis 3:15.—Ridim.

2. ?From wanem profet tok ya i impoten?

² Profet tok ya i kamaot long faswan buk blong Baebol. Mo olgeta narafala buk blong Baebol oli tokbaot samting we i joen wetem profet tok ya. Olsem we olgeta branj blong wan tri oli joen long wan stamba, ol samting we ol narafala buk blong Baebol oli tokbaot, oli joen wetem ol tok ya we oli stap long Jenesis 3:15, mo oli tokbaot wan mesej nomo, hemia se God bambae i sanem wan Sevia we bambae i distroem Devel mo ol rabis man blong hem.b !Hemia i wan nambawan blesing long ol man we oli lavem Jehova!

3. ?Bambae yumi tokbaot wanem long stadi ya?

³ Long stadi ya, bambae yumi ansarem sam kwestin long saed blong profet tok blong Jenesis 3:15: ?Profet tok ya i tokbaot hu? ?Olsem wanem profet tok ya i kamtru? ?Mo olsem wanem profet tok ya i givhan long yumi?

?PROFET TOK YA I TOKBAOT HU?

4. ?Hu ya “snek” ya mo olsem wanem yumi save?

⁴ Ol man we Jenesis 3:14, 15 i tokbaot, hemia wan “snek,” “pikinini” blong snek ya, wan “woman,” mo “pikinini” blong woman ya. Baebol i halpem yumi blong kasemsave se olgeta wanwan oli hu.c Bambae yumi stat wetem snek ya. Wan trufala snek bambae i no kasemsave long samting we Jehova i talem long garen blong Iden. Taswe, i klia se Jehova i talem jajmen ya long wan kriesen blong hem we i gat save. ?So, Jehova i stap toktok long hu? Revelesen 12:9 i eksplenem se snek ya hem i hu. Vas ya i talemaot klia se “snek ya blong bifo” hemia Devel Setan. ?So hu nao i pikinini blong snek ya?

5. ?Hu ya pikinini blong snek?

⁵ Samtaem, Baebol i yusum tok ya pikinini blong tokbaot ol man we oli folem gud fasin blong wan man, we i mekem se oli kam olsem pikinini blong hem. So pikinini blong snek i minim ol rabis enjel mo ol man we fasin blong olgeta i sem mak olsem Setan, oli agensem Jehova God mo ol man blong Hem. Hemia i minim ol enjel ya tu we long taem blong Noa, oli lego ples blong olgeta long heven blong kamdaon long wol, wetem ol rabis man we fasin blong olgeta i sem mak olsem papa blong olgeta Devel.—Jen. 6:1, 2; Jon 8:44; 1 Jon 5:19; Jud 6.

6. ?From wanem “woman” ya i no minim Iv?

⁶ Naoia, yumi mas faenemaot se “woman” ya hem i hu. Blong talem stret, hemia i no minim Iv. ?From wanem? Bambae yumi tokbaot wan risen nomo. Profet tok i talem se pikinini blong woman ya bambae i “smasem” hed blong snek ya. Olsem we yumi bin tokbaot, snek ya hemia rabis enjel ya Setan, mo i no gat wan pikinini blong Iv we i sinman, we i naf blong smasem hem. Sipos i olsem, ?olsem wanem nao Setan bambae i lus?

7. Folem Revelesen 12:1, 2, 5, 10, ?woman ya we Jenesis 3:15 i tokbaot, hem i hu?

⁷ Laswan buk blong Baebol i talem long yumi se woman ya we Jenesis 3:15 i tokbaot, hem i hu. (Ridim Revelesen 12:1, 2, 5, 10.) !Woman ya i no wan woman olbaot! Mun i stap aninit long leg blong hem mo i gat 12 sta long hed blong hem olsem hat blong king. Mo hem i bonem wan pikinini, hemia Kingdom blong God. Kingdom ya i stap long heven, so hemia i min se woman ya tu i stap long heven. Hem i representem oganaesesen blong Jehova long heven, we i fulap long plante gudfala enjel.—Gal. 4:26.

8. ?Hu ya pikinini blong woman, mo wetaem samting ya i kamtru? (Jenesis 22:15-18)

⁸ Tok blong God i halpem yumi tu blong luksave se hu ya pikinini blong woman ya. Pikinini ya i mas kamaot long laen blong Ebraham. (Ridim Jenesis 22:15-18.) Olsem we profet tok i bin talem, Jisas i kamaot stret long laen blong Ebraham. (Luk 3:23, 34) Be pikinini ya i mas gat moa paoa i bitim wan man, from we bambae hem i mas smasem Devel Setan blong olwe. So taem Jisas i gat samwe 30 yia, tabu spirit i makemaot hem. Stat long taem ya, wan impoten haf blong profet tok ya i kamtru, from we naoia Jisas i kam olsem pikinini blong woman ya. (Gal. 3:16) Afta we Jisas i ded mo i laef bakegen, God i “mekem hem i kasem glori mo ona olsem hat blong king” mo “i givim paoa long [hem] long olgeta samting long heven mo long wol,” antap long hemia hem i givim paoa long hem tu “blong brekemdaon ol wok blong Devel.”—Hib. 2:7; Mat. 28:18; 1 Jon 3:8.

9-10. (1) ?Hu ya ol narafala man we oli pikinini blong woman ya, mo wetaem samting ya i kamtru? (2) ?Naoia bambae yumi tokbaot wanem?

⁹ Be i no Jisas nomo we i pikinini blong woman ya, i gat sam narafala man tu. Aposol Pol i tokbaot ol narafala pikinini ya taem i talem long ol Kristin we oli man Jiu mo olgeta we oli no laen blong Isrel se: “Sipos yufala i blong Kraes, yufala i pikinini blong Ebraham. Mo bambae yufala i gat raet blong kasem ol samting ya we God i promes blong givim.” (Gal. 3:28, 29) Taem Jehova i makemaot wan Kristin long tabu spirit, man ya i kam wan pikinini blong woman ya. So pikinini blong woman ya, hemia Jisas Kraes mo ol 144,000 man we bambae oli rul wetem hem. (Rev. 14:1) Olgeta evriwan ya oli traehad blong gat sem fasin olsem Papa blong olgeta, Jehova God.

¹⁰ Naoia we yumi faenemaot finis ol man we Jenesis 3:15 i tokbaot, i gud yumi luk samting we Jehova i mekem finis blong profet tok ya i kamtru, mo olsem wanem profet tok ya i halpem yumi tede.

?OLSEM WANEM PROFET TOK YA I KAMTRU?

11. ?Profet tok ya i minim wanem taem i se pikinini blong woman ya bambae i kasem kil long “bak blong leg blong hem daon”?

¹¹ Folem profet tok blong Jenesis 3:15, snek ya bambae i givim kil long pikinini blong woman ya long “bak blong leg blong hem daon.” Samting ya i kamtru taem Setan i yusum ol man Jiu mo ol man Rom blong oli kilim i ded Pikinini blong God. (Luk 23:13, 20-24) Olsem we wan man i kasem kil long bak blong leg blong hem daon, mo i no save wokbaot gud blong smoltaem, blong smoltaem Jisas i no save mekem wan samting taem hem i stap long gref blong tri dei.—Mat. 16:21.

12. ?Wetaem mo olsem wanem bambae Kraes i smasem hed blong snek?

¹² Profet tok blong Jenesis 3:15 i soemaot se Jisas i no save stap olwe long gref. ?From wanem? From folem profet tok ya, pikinini ya bambae i smasem hed blong snek. Be blong Jisas i mekem samting ya, bak blong leg blong hem daon i mas kam gud bakegen. !Mo hemia nao samting we i hapen! Tri dei afta we Jisas i ded, hem i laef bakegen olsem wan spirit we i no save ded samtaem. Mo long stret taem we God i makemaot, Jisas bambae i smasem Setan blong olwe. (Hib. 2:14) Olgeta we bambae oli rul wetem Kraes, bambae oli joenem hem blong distroem ol enemi blong God, hemia ol pikinini blong snek.—Rev. 17:14; 20:4, 10.d

?OLSEM WANEM PROFET TOK YA I GIVHAN LONG YUMI?

13. ?Olsem wanem profet tok ya we i stap kamtru, i givhan long yumi?

¹³ Sipos yu yu wan man blong God, i sua se yu yu stap kasem gudfala samting from profet tok ya we i stap kamtru. Jisas i kam long wol ya olsem wan man, mo hem i soemaot klia ol fasin olsem blong Papa blong hem. (Jon 14:9) So taem yumi traehad blong save gud Jisas, yumi stap save Jehova God mo yumi lavem hem. Mo tu, from we Jisas i lidim Kristin kongregesen tede, yumi stap kasem ol gudfala samting from ol tijing mo advaes blong hem. Hem i tijim yumi olsem wanem blong gat wan laef we i mekem Jehova i glad. Mo yumi evriwan i kasem gudfala samting from ded blong Jisas, hemia taem we hem i kasem kil long bag blong leg blong hem daon. ?From wanem yumi talem olsem? From we taem Jisas i laef bakegen, hem i givim blad blong hem we i sas we i sas, olsem wan sakrefaes we i stret gud olgeta, blong “mekem yumi klin long olgeta sin blong yumi.”—1 Jon 1:7.

14. ?Olsem wanem yumi save se profet tok ya we Jehova i talemaot long garen blong Iden, i no kamtru fulwan stret long taem ya? Yu eksplenem.

¹⁴ Profet tok ya we Jehova i talemaot long garen blong Iden, i soemaot se bambae i no kamtru fulwan long taem ya. Bambae i tekem taem blong woman ya i bonem pikinini we profet tok ya i tokbaot, blong Devel i hivimap ol man blong hem, mo blong tufala grup ya i agensem (o i no laeklaekem) tufala. Sipos yumi kasemsave long profet tok ya, hemia bambae i givhan long yumi from we i wonem yumi se wol ya we Setan i kontrolem, bambae i no laekem ol man we oli wosipim Jehova. Samtaem biaen, Jisas i givim sem woning ya long ol disaepol blong hem. (Mak 13:13; Jon 17:14) Yes, long ol 100 yia we i pas, yumi luk klia we ol haf blong profet tok ya oli kamtru. ?Olsem wanem oli kamtru?

15. ?From wanem wol ya i agensem yumi moa i bitim bifo? ?Mo from wanem yumi no nid blong fraet long Setan?

¹⁵ Smoltaem afta we Jisas i kam Mesaea King long 1914, oli sakemaot Setan long heven. Naoia hem i stap long wol ya, mo hem i stap wet blong bambae i lus. (Rev. 12:9, 12) Be hem i no stap kwaet nomo, hem i bisi we i bisi. Setan i wari, i kros, mo i stap atakem ol man blong God. (Rev. 12:13, 17) From samting ya, wol blong Setan i stap agensem yumi moa i bitim bifo. Be yumi no nid blong fraet long Setan mo ol man blong hem. Yumi save gat strong tingting olsem aposol Pol, we i se: “Sipos God i stap wetem yumi, ?hu bambae i agensem yumi?” (Rom 8:31) Yumi save trastem Jehova fulwan from yumi luk finis se bighaf blong profet ya long Jenesis 3:15 i kamtru finis.

16-18. Taem Curtis, Ursula, mo Jessica oli kasemsave long profet tok ya long Jenesis 3:15, ?olsem wanem hemia i givhan long olgeta?

¹⁶ Promes blong Jehova we i stap long Jenesis 3:15, i save halpem yumi blong dil wetem ol traem we yumi fesem long laef. Curtis, wan brata we i misinari long Guam, i talem se: “Samtaem, mi fesem ol problem we mi harem se i had blong mi holemstrong long Jehova. Be taem mi tingting dip long profet tok ya long Jenesis 3:15, hemia i halpem mi blong mi gohed blong trastem Papa blong mi long heven.” Curtis i stap luk fowod long taem ya we Jehova bambae i finisim olgeta trabol blong yumi.

¹⁷ Wan sista long Bavaria, we nem blong hem Ursula i talem se, taem hem i kasemsave long Jenesis 3:15, hemia i halpem hem blong trastem fulwan se Baebol i Tok blong God. Hem i sapraes tumas blong luk se olgeta narafala profet tok oli joen gud wetem profet tok ya. Mo tu, hem i talem se: “Taem mi lanem se Jehova i tekem aksen kwiktaem blong mekem se yumi gat hop, hemia i mekem mi mi lavem hem moa.”

¹⁸ Jessica, we i blong Maekronesia, i talem se: “!Mi stil tingbaot yet filing we mi gat long taem ya we mi luksave se mi faenem trutok! Profet tok ya long Jenesis 3:15 i bin kamtru. Hemia i bin halpem mi blong tingbaot se ol samting we oli stap mekem yumi safa tede, oli no samting we Jehova i bin wantem long stat. Profet tok ya i mekem bilif blong mi i strong se taem mi mekem wok blong Jehova, mi save gat wan gudfala laef naoia mo long fiuja bambae mi gat wan laef we i beswan.”

19. ?From wanem yumi sua se laswan haf blong profet tok ya bambae i kamtru?

¹⁹ Olsem we yumi bin luk finis, profet tok ya long Jenesis 3:15 i stap gohed yet blong kamtru naoia. Yumi bin faenemaot finis se hu ya i pikinini blong woman, mo hu ya i pikinini blong snek. Mo naoia, kil we Jisas i bin kasem long bak blong leg blong hem daon, i kam gud finis, mo hem i kasem paoa blong rul olsem King blong olwe. Kam kasem naoia, Jehova i jusumaot klosap evri man finis we bambae oli rul wetem Boe blong hem long heven. From we faswan haf blong profet tok ya i kamtru finis, yumi gat plante risen blong trastem se laswan haf blong profet tok ya, hemia blong smasem hed blong snek, bambae i mas kamtru tu. !Ol man blong God bambae oli glad tumas, taem Setan i lus blong olwe! Be go kasem taem ya, yumi no mas givap. Yumi save trastem God blong yumi. Tru long pikinini blong woman ya, God bambae i mekem se “olgeta nesen long wol” oli kasem blesing.—Jen. 22:18.