Kwestin
?Jisas i minim wanem taem hem i talem se: “Yufala i no mas ting se mi kam blong mekem pis”?
Jisas i tijim ol man blong oli gat pis wetem ol narafala. Be wan taem, hem i talem long ol aposol se: “Yufala i no mas ting se mi kam blong mekem pis long wol ya. Mi mi no karem pis i kam, be mi karem naef blong faet, from we mi mi kam blong mekem ol man oli seraot. Man i agensem papa blong hem, mo gel i agensem mama blong hem, mo waef i agensem mama blong hasban blong hem.” (Mat. 10:34, 35) ?Jisas i minim wanem?
Jisas i no wantem seraotem ol famle, be hem i save se ol tijing blong hem oli save mekem sam famle oli seraot. Taswe, olgeta we oli disaed blong kam disaepol blong hem mo oli baptaes, oli mas save se bambae oli mas fesem sam hadtaem. Sipos hasban o waef we i no bilif, o wan narafala memba blong famle i agensem olgeta, hemia i save mekem i had blong oli holemstrong long ol tijing blong Kraes.
Baebol i enkarejem ol Kristin blong oli “gat pis wetem olgeta man.” (Rom 12:18) Be ol tijing blong Jisas oli save kam olsem “naef blong faet” long sam famle. Hemia i save hapen sipos wan memba blong famle i akseptem ol tijing blong Jisas, be ol narafala oli no akseptem o agensem ol tijing ya. Long taem olsem, ol narafala memba blong famle oli kam olsem “ol enemi” blong hemia we i lanem trutok.—Mat. 10:36.
Ol disaepol blong Kraes we oli stap long sem haos wetem ol famle we oli no gat sem bilif, samtaem oli save fesem sam situesen we i save traem lav we oli gat long Jehova mo Jisas. Eksampol, sam memba blong famle we oli no bilif, oli save fosem olgeta blong joen long wan lafet blong giaman skul. Taem samting olsem i hapen, ?bambae oli jusum blong mekem hu i glad? Jisas i talem se: “Man we i lavem papa mo mama blong hem moa i winim we hem i lavem mi, hem i no stret blong kam man blong mi.” (Mat. 10:37) I klia se Jisas i no stap minim se, sipos wan man i kam disaepol blong hem, bambae hem i stop blong lavem perens blong hem. Be hem i wantem makem long olgeta se oli mas jusum samting we i moa impoten long laef blong olgeta. Sipos ol memba blong famle oli agensem yumi from yumi traehad blong wosipim Jehova, yumi mas gohed blong soemaot lav long olgeta, be yumi mas tingbaot se yumi mas lavem God fastaem.
Blong talem stret, taem famle i agensem yumi, hemia i mekem yumi harem nogud. Be, ol disaepol blong Jisas oli mas tingbaot oltaem tok ya we hem i talem, i se: “Man we i no wantem karem pos blong hem mo biaen long mi, hem i no stret blong kam man blong mi.” (Mat. 10:38) Yes, ol Kristin oli mas tingbaot se fasin agens we i kam long famle, hem i wan long ol traem we ol disaepol blong Kraes oli mas fesem. Be long semtaem, oli hop se gudfala fasin blong olgeta bambae i pulum ol famle we oli no bilif, blong oli jenisim tingting blong olgeta mo oli wantem save ol trutok blong Baebol.—1 Pita 3:1, 2.