Gohed Blong “Givgivhan Long Yufala Blong Mekem Yufala i Strong”

1. Folem 1 Tesalonaeka 5:11, ?wanem wok we yumi evriwan i save joen long hem?

?KONGREGESEN blong yu i bin joen blong bildim o fiksimap wan Haos Kingdom finis? Sipos yes, ating yu tingbaot yet faswan miting blong yu long niufala Haos Kingdom ya. Yu glad tumas, yu talem tangkiu long Jehova, mo maet yu wantem krae, mo i had blong yu singsing long faswan singsing. Taem yumi givhan blong bildim ol Haos Kingdom, hemia i leftemap nem blong Jehova. Be yumi leftemap nem blong hem moa, taem yumi givhan blong mekem wan narafala impoten wok, hemia blong givhan long ol man we oli kam long Haos Kingdom blong yumi. Aposol Pol i tingbaot wok ya taem hem i raetem ol tok we i stap long 1 Tesalonaeka 5:11, we i stamba vas blong stadi ya.—Ridim.

2. ?Bambae yumi tokbaot wanem long stadi ya?

² Aposol Pol i wan gudfala eksampol, from hem i save gud olsem wanem blong halpem ol brata mo sista. Hem i gat sore long olgeta. Long stadi ya, bambae yumi luk olsem wanem hem i halpem ol brata mo sista (1) blong oli stanap strong taem oli fesem ol trabol, (2) blong oli gat pis bitwin olgeta, mo (3) blong oli mekem bilif blong olgeta long Jehova i kam strong. Naoia i gud yumi luk olsem wanem yumi save folem eksampol blong hem, blong halpem ol brata mo sista blong yumi tede.—1 Kor. 11:1.

POL I HALPEM OL BRATA MO SISTA BLONG OLI STANAP STRONG LONG OL TRABOL

3. ?Pol i gat stret tingting long wanem?

³ Pol i lavem tumas ol brata mo sista. Long laef blong hem, hem i fesem plante hadtaem. So hem i naf blong soem sore mo lav long ol brata mo sista taem oli fesem ol trabol. Wan taem, Pol i no moa gat mane mo hem i mas faenem wok blong sapotem hem wan mo ol fren blong hem. (Wok 20:34) Hem i mekem wok blong somap tent. Taem hem i kamtru long Korin, fastaem hem i wok wetem Akwila mo Prisila we tufala tu i stap somap tent. Be long “evri sabat” hem i stap prij long ol man Jiu mo ol man Gris. Biaen taem Saelas mo Timoti i kamtru, “Pol i stat blong prij oltaem. Hem i stap talemaot tok blong God.” (Wok 18:2-5) Pol i neva fogetem impoten samting long laef blong hem, hemia blong mekem wok blong Jehova. From we Pol i soem wan nambawan eksampol, hemia i mekem se hem i naf blong enkarejem ol brata mo sista blong hem. Hem i rimaenem olgeta se oli no mas letem ol hadtaem long laef, o ol samting we famle i nidim, i mekem se oli no wantem save long “ol samting we oli moa impoten,” hemia ol samting we oli joen wetem wosip we oli mekem long Jehova.—Fil. 1:10.

4. ?Olsem wanem Pol mo Timoti i halpem ol brata sista blong stanap strong, taem i gat fasin agens?

⁴ Smoltaem afta we kongregesen long Tesalonaeka i stat, ol brata mo sista oli fesem bigfala fasin agens. Taem wan grup blong ol man blong agens oli no save faenem Pol mo Saelas, oli tekem “sam narafala brata i go long ol rula blong taon ya,” mo oli singaot bigwan se: “Ol man ya oli stap brekem ol loa blong Sisa.” (Wok 17:6, 7) Yu traem tingbaot, ating ol niufala Kristin ya oli fraet bigwan taem oli faenemaot se ol man long taon oli agensem olgeta. Samting ya i save mekem se oli no moa wok strong long wok blong Jehova. Be Pol i no wantem se samting ya i hapen. Nating se hem mo Saelas i mas aot, be tufala i meksua se i mas gat wan i stap blong i lukaot long kongregesen. Pol i rimaenem olgeta long Tesalonaeka se: “Mifala i sanem brata blong yumi Timoti, . . . blong i mekem yufala i strong mo blong i mekem yufala i harem gud, blong bilif blong yufala i kam strong. Nao bambae i no gat wan long yufala i save seksek from ol trabol ya.” (1 Tes. 3:2, 3) Timoti tu i bin fesem fasin agens long ples blong hem long Listra. Mo hem i luk olsem wanem Pol i mekem ol brata longwe oli kam strong. Timoti i luk olsem wanem Jehova i bin givhan long olgeta, taswe hem i talem long ol niufala brata mo sista ya se ol samting bambae oli go gud nomo.—Wok 14:8, 19-22; Hib. 12:2.

5. ?Wanem gudfala samting i kamaot from we wan elda i halpem Bryant?

⁵ ?Pol i mekem wanem moa blong halpem ol brata mo sista? Taem Pol mo Banabas i gobak visitim Listra, Ikoniam, mo Antiok, tufala i “putumap ol elda long ol kongregesen wanwan.” (Wok 14:21-23) I sua se ol elda ya oli naf blong leftemap tingting blong kongregesen, olsem ol elda tede. Makem samting we wan brata nem blong hem Bryant i talem, i se: “Taem mi gat 15 yia, papa blong mi i lego haos mo mama blong mi i disfelosip. Hemia i mekem mi harem olsem se mi stap mi wan mo tingting blong mi i foldaon.” ?Wanem i halpem Bryant blong i stanap strong long hadtaem ya? Hem i talem se: “Wan elda, nem blong hem Tony i toktok wetem mi oltaem long ol miting, mo long ol narafala taem tu. Hem i tokbaot stori blong samfala we oli fesem ol trabol, be yet oli glad. Mo tu, hem i ridim Ol Sam 27:10 long mi, mo plante taem hem i tokbaot Hesekia, we i holemstrong long Jehova nating se papa blong hem i no soem gudfala eksampol.” ?Ol samting ya oli givhan olsem wanem long Bryant? Hem i talem se: “Ol tok blong Tony oli enkarejem mi mo mi stat blong mekem wok blong fultaem paenia.” Ol elda, yufala i mas rere blong halpem olgeta we oli olsem Bryant, we oli nidim “gudfala toktok” blong enkarejem olgeta.—Prov. 12:25.

6. ?Olsem wanem Pol i yusum ol laef stori blong enkarejem ol brata mo sista?

⁶ Pol i rimaenem ol brata mo sista se “wan bigfala hip blong ol witnes” oli stanap strong long ol traem we oli fesem from we Jehova nao i givim paoa long olgeta. (Hib. 12:1) Pol i save se laef stori blong ol man we bifo oli stanap strong long ol hadtaem, i save halpem ol brata mo sista blong oli gat strong tingting, mo oli fokas nomo long “taon blong God ya we i laef.” (Hib. 12:22) Tede tu i sem mak. Taem yumi ridim olsem wanem Jehova i halpem Gideon, Barak, Deved, Samuel, mo plante narafala, hemia i mekem tingting blong yumi i strong. (Hib. 11:32-35) Mo yumi save lanem plante samting tu long eksampol blong ol man blong bilif tede. Long wol hedkwota, plante taem mifala i kasem ol leta long ol brata mo sista we oli talem se, bilif blong olgeta i kam strong afta we oli ridim laef stori blong wan long ol Witnes blong Jehova tede we i holemstrong long Jehova.

POL I SOEM LONG OL BRATA MO SISTA OLSEM WANEM BLONG GAT PIS BITWIN OLGETA

7. ?Yu lanem wanem long advaes we Pol i givim long Rom 14:19-21?

⁷ Yumi halpem ol brata mo sista, taem yumi talem mo mekem samting blong i gat pis insaed long kongregesen. Yumi no letem ol defdefren tingting we yumi gat i seraotem yumi. Mo yumi no fosem ol narafala blong oli folem tingting blong yumi, sipos samting we oli wantem mekem i no agensem ol rul blong Baebol. Eksampol, long kongregesen long Rom bifo, i gat ol Kristin we oli man Jiu mo olgeta we oli no man Jiu. Be taem Loa blong Moses i finis, ol man we oli wosipim Jehova oli no moa nid blong obei long loa ya long saed blong sam kakae. (Mak 7:19) Stat long taem ya, ol Kristin we oli man Jiu oli fri blong kakae enikaen kakae, be sam narafala oli harem se i no stret blong kakae ol kakae ya. Ale kongregesen i seraot from bisnes ya. Taswe, Pol i makem se i impoten blong gat pis mo holemtaet pis, taem hem i se: “I moa gud yu no kakae mit, mo yu no dring waen, mo yu no mekem eni samting we i save mekem brata blong yu i stambol.” (Ridim Rom 14:19-21.) Pol i halpem ol brata mo sista blong luksave se fasin ya i save spolem olgeta wan mo ful kongregesen. Pol tu i rere blong jenisim prapa fasin blong hem, blong no mekem ol narafala oli stambol. (1 Kor. 9:19-22) Yumi tu yumi save halpem narafala mo holemtaet pis, sipos yumi no raorao from ol defdefren tingting we yumi gat.

8. ?Pol i mekem wanem taem i gat wan problem we i save spolem pis insaed long kongregesen?

⁸ Pol i soem wan gudfala eksampol blong holemtaet pis wetem olgeta we oli no agri long sam impoten samting. Eksampol, sam kongregesen long faswan handred yia, oli talem se ol man we oli no man Jiu we oli kam Kristin oli mas sakomsaes, olsem nao, ol man Jiu bambae oli no save jikim olgeta. (Gal. 6:12) Pol i no agri nating long tingting blong olgeta. Be i bitim we hem i wantem se oli folem tingting blong hem, wetem tingting daon hem i askem advaes long ol aposol mo ol elda long Jerusalem. (Wok 15:1, 2) Hemia i givhan long ol Kristin ya blong oli holemtaet glad mo pis insaed long kongregesen.—Wok 15:30, 31.

9. ?Olsem wanem yumi save folem eksampol blong Pol?

⁹ Sipos i gat wan bigfala rao i kamaot, yumi save givhan blong holemtaet pis, sipos yumi askem advaes long olgeta we Jehova i putumap blong lukaot long kongregesen. Mo tu, plante taem yumi save faenem ol advaes blong Baebol blong lidim yumi, tru long ol buk blong yumi o long ol daereksen we oganaesesen i givim. Sipos yumi folem ol advaes ya, i bitim we yumi folem prapa tingting blong yumi, bambae yumi save mekem se kongregesen i gat pis.

10. ?Pol i mekem wanem moa blong holemtaet pis insaed long kongregesen?

¹⁰ Pol i holemtaet pis, taem hem i tokbaot ol gudfala fasin blong ol brata sista, be i no ol slak fasin blong olgeta. Eksampol, long en blong leta we hem i raetem i go long ol man Rom, hem i talem nem blong plante man mo plante taem hem i talem ol gudfala toktok mo samting we hem i laekem long saed blong olgeta. Yumi save folem eksampol blong Pol, taem yumi tokbaot ol gudfala fasin blong ol brata mo sista blong yumi. Taem yumi mekem olsem, fren gud moa wetem olgeta mo yumi mekem se i gat lav insaed long kongregesen.

11. ?Olsem wanem yumi save gat pis wetem narafala, taem i gat wan rao i kamaot?

¹¹ Samtaem, ol Kristin we oli bigman long spirit, olgeta tu oli no agri o oli rao wetem narafala. Hemia nao samting we i hapen long Pol mo gudfala fren blong hem Banabas. Tufala i bin rao from we wan i wantem tekem Mak long nekiswan misinari trip blong tufala, be narawan i no wantem. Ale, “tufala i rao bigwan” mo tufala i seraot. (Wok 15:37-39) Be Pol, Banabas, mo Mak, oli traehad blong gat pis bitwin olgeta bakegen. Hemia i soemaot se long tingting blong olgeta, i impoten we kongregesen i joen gud mo i gat pis. Samtaem biaen, Pol i talem ol gudfala toktok long saed blong Banabas mo Mak. (1 Kor. 9:6; Kol. 4:10) Yumi tu yumi nid blong stretem eni problem we yumi gat wetem narafala long kongregesen, mo gohed blong tingbaot ol gudfala fasin blong olgeta. Olsem nao, bambae yumi save joen gud mo yumi gat pis.—Efes. 4:3.

POL I MEKEM BILIF BLONG OL BRATA MO SISTA I KAM STRONG

12. ?Wanem sam situesen we ol brata mo sista oli stap fesem?

¹² Yumi givhan long ol brata mo sista blong yumi blong mekem bilif blong olgeta i strong. Samfala, ol memba blong famle we oli no bilif, ol fren blong olgeta long skul o long wok, oli jikim olgeta. Sam narafala oli fesem ol problem long saed blong helt, o oli stap traehad blong winim ol nogud filing we i mekem oli harem nogud. Sam narafala bakegen, oli baptaes longtaem finis mo blong plante yia oli stap wet blong luk en blong sistem blong wol. Ol situesen olsem oli save traem bilif blong wan Kristin tede, sem mak olsem ol memba blong kongregesen long faswan handred yia. ?Pol i mekem wanem blong mekem bilif blong ol brata mo sista i strong?

13. ?Olsem wanem Pol i halpem olgeta we ol man oli jikim olgeta from bilif blong olgeta?

¹³ Pol i yusum Baebol blong mekem bilif blong ol brata mo sista i strong. Eksampol, maet ol Kristin we oli man Jiu oli no save wanem blong talem long ol memba blong famle we oli no bilif, we oli talem se skul blong ol man Jiu i moa gud i bitim we yu kam Kristin. I sua se leta we Pol i raetem i go long ol man Hibru, i givim paoa long ol Kristin ya. (Hib. 1:5, 6; 2:2, 3; 9:24, 25) Ol tok we Pol i talem i halpem olgeta blong save wanem blong talem long ol man blong agens, mo long ol memba blong famle we oli no bilif. Tede yumi save halpem ol brata sista we ol man oli stap jikim olgeta, blong yusum gud ol buk blong yumi we i stanap long Baebol, blong eksplenem gud bilif blong olgeta. Mo sipos ol man oli stap laf jikim ol yangfala blong yumi from oli bilif long kriesen, yumi save halpem olgeta blong faenem ol infomesen long buklet ya Was Life Created? mo The Origin of Life—Five Questions Worth Asking, blong oli save soem from wanem oli bilif long kriesen.

14. Nating se Pol i bisi blong prij mo tij, ?be hem i mekem wanem?

¹⁴ Pol i enkarejem ol brata mo sista blong soemaot lav tru long “ol gudfala wok” we oli mekem. (Hib. 10:24) Hem i halpem ol brata mo sista, i no long toktok blong hem nomo be tu long samting we hem i mekem. Eksampol, taem ol brata mo sista long Judia oli gat hadtaem blong kasem kakae, Pol i karem sam samting we oli nidim, i go long olgeta. (Wok 11:27-30) Nating se Pol i bisi long wok blong prij mo tij, be oltaem hem i lukaot rod blong halpem olgeta we oli nidim samting long bodi. (Gal. 2:10) Taem hem i mekem olsem, hem i halpem olgeta blong oli trastem moa se Jehova bambae i kea long olgeta. Tede tu, taem yumi glad blong yusum taem, paoa, mo gudhan blong yumi blong givhan long wok blong disasta, yumi stap mekem bilif blong ol brata sista i kam strong. Yumi mekem olsem tu, taem yumi givim presen mane oltaem blong sapotem wok we i stap gohed long fulwol. Nomata wanem samting yumi mekem, yumi stap halpem ol brata sista blong oli trastem se Jehova bambae i neva lego olgeta.

15-16. ?Olsem wanem yumi save givhan long olgeta we bilif blong olgeta i kam slak?

¹⁵ Pol i no givap long olgeta we bilif blong olgeta i kam slak. Hem i soem sore long olgeta mo hem i toktok kaen long olgeta. (Hib. 6:9; 10:39) Eksampol, long leta we hem i raetem i go long ol man Hibru, plante taem hem i yusum ol toktok olsem “mifala” mo “yumi,” blong soemaot se hem tu i mas folem ol advaes we hem i givim. (Hib. 2:1, 3) Olsem Pol, yumi tu yumi no mas givap long olgeta we bilif blong olgeta i kam slak. Be yumi mas givhan long olgeta, mo yumi mekem olsem taem yumi soem intres long olgeta. Long rod ya, yumi soemaot se yumi lavem olgeta. Taem yumi toktok kaen, hemia i save leftemap tingting blong man.

¹⁶ Pol i mekem ol brata mo sista oli sua se Jehova i save ol gudfala wok we oli bin mekem. (Hib. 10:32-34) Yumi save mekem sem mak, taem yumi stap givhan long wan brata o sista we bilif blong hem i slak. Yumi save askem hem blong tokbaot olsem wanem hem i kam long trutok, o yumi enkarejem hem blong i tingtingbak long ol taem we hem i harem se Jehova i sapotem hem. Yumi save yusum janis ya blong talem long hem se Jehova i no fogetem ol wok we hem i bin mekem blong soemaot se hem i lavem Jehova, mo se Jehova bambae i neva lego hem. (Hib. 6:10; 13:5, 6) Maet ol storian olsem oli save pulum hem blong i wantem gohed long wok blong Jehova.

“GOHED BLONG LEFTEMAP TINGTING BLONG YUFALA”

17. ?Wanem samting we yumi mas kam gud moa long hem?

¹⁷ Sam samtaem, wan bilda i mas kam gud moa long wok blong hem. Long sem fasin, yumi tu yumi save kam gud moa long fasin blong yumi blong givhan long narafala. Yumi save halpem ol narafala blong oli stanap strong long ol hadtaem, taem yumi tokbaot eksampol blong ol man bifo we oli bin stanap strong. Yumi save holemtaet pis taem yumi tokbaot ol gudfala fasin blong ol narafala, taem narafala i mekem i no stret long yumi, mo taem i gat raorao i kamaot. Yumi save gohed blong mekem bilif blong ol brata sista i kam strong, taem yumi tokbaot sam impoten trutok blong Baebol wetem olgeta, yumi givim samting we oli nidim, mo yumi sapotem olgeta we oli kam slak long spirit.

18. ?Yu mas gat strong tingting blong mekem wanem?

¹⁸ Olgeta we oli joen long ol tiokratik bilding projek, oli kasem bigfala glad. Yumi save kasem bigfala glad, taem yumi mekem bilif blong ol brata mo sista i kam strong. Ol bilding blong yumi, sloslo oli save kam nogud. Be frut blong ol wok blong yumi bambae i stap olwe. Taswe, i gud yumi gat strong tingting blong ‘gohed blong leftemap tingting blong yumi, mo yumi givgivhan long yumi blong mekem yumi strong.’—1 Tes. 5:11.