Trufala Waestok i Stap Singaot Bigwan

1. ?Plante man oli mekem wanem taem waestok i singaot long olgeta? (Ol Proveb 1:20, 21)

LONG plante kantri, yumi bin luk ol brata mo sista oli stap stanap long rod mo givim ol buk long ol man we oli pas. Maet yu tu yu bin mekem samting ya. Long taem ya, ating yu tingbaot pijatok we i stap long buk blong Ol Proveb, hemia se waestok i stap singaot long ol man long pablik ples blong oli harem advaes blong hem. (Ridim Ol Proveb 1:20, 21.) “Trufala waestok,” hemia waes blong Jehova we i stap long Baebol mo long ol buk blong yumi. Hemia ol waestok we ol man oli nidim blong kasem laef we i no save finis. Yumi glad tumas taem wan man i wantem ridim ol buk blong yumi. Be plante man oli no wantem. Samfala oli no wantem save long samting we Baebol i talem. Sam narafala oli laf long yumi. Oli ting se Baebol i wan buk blong bifo nomo. Sam narafala oli tok nogud long ol tijing blong Baebol long saed blong gudfala fasin, mo oli talem se olgeta we oli folem Baebol, oli strong tumas mo oli jajem narafala. Be from we Jehova i lavem ol man, hem i gohed blong traem givim waestok long olgeta. ?Olsem wanem hem i mekem olsem?

2. ?Olsem wanem yumi save kasem waestok blong Jehova tede? ?Be bighaf blong ol man oli mekem wanem?

² Wan rod we Jehova i yusum blong ol man oli harem waestok blong hem, hemia tru long Baebol. Klosap olgeta man oli save kasem wan Baebol. ?Mo olsem wanem long saed blong ol buk blong yumi? From we Jehova i blesem wok blong yumi, naoia ol buk ya oli stap long bitim 1,000 lanwis. Ol buk ya oli halpem ol man we oli ridim mo folem ol waestok blong olgeta. Be bighaf blong ol man oli no wantem lesin long waestok ya we i stap singaot long olgeta. Taem oli mekem ol desisen, oli laekem moa blong folem prapa tingting blong olgeta o tingting blong narafala man. Maet oli daonem yumi from we yumi jus blong folem samting we Baebol i talem. Stadi ya bambae i tokbaot from wanem ol man oli mekem fasin ya. Be fastaem, bambae yumi tokbaot olsem wanem blong kasem waestok blong Jehova.

SAVE BLONG JEHOVA I GIVIM WAES

3. ?Yumi mas mekem wanem blong kasem trufala waes?

³ Fasin waes i min se yumi yusum save we yumi gat blong mekem ol gudfala desisen. Be mining blong trufala waes i bigwan moa. Baebol i talem se: “Fasin blong fraet long Jehova hem i stat blong waes, mo ol save long saed blong Man Ya We i Tabu We i Tabu, i mekem man i kasemsave samting.” (Prov. 9:10) Taswe taem yumi mekem wan impoten desisen, fastaem yumi sud faenemaot tingting blong Jehova, hemia “save . . . blong Man Ya We i Tabu We i Tabu.” Yumi faenemaot tingting blong Jehova taem yumi stadi Baebol mo ol buk we oli eksplenem Baebol. Taem yumi mekem olsem, yumi stap soemaot trufala waes.—Prov. 2:5-7.

4. ?From wanem Jehova nomo i save givim trufala waes?

⁴ Jehova nomo i save givim trufala waes. (Rom 16:27) ?From wanem yumi talem se hem i Stamba blong fasin waes? Faswan risen se, hem i Krieta, taswe hem i gat olgeta save long saed blong ol samting we hem i krietem. (Sam 104:24) Seken risen se, evri aksen blong Jehova i soemaot se hem i waes. (Rom 11:33) Nambatri risen se, oltaem waes advaes blong Jehova i givhan long olgeta we oli folem. (Prov. 2:10-12) Sipos yumi wantem kam waes, yumi mas akseptem ol stamba trutok ya, mo letem olgeta oli lidim yumi long ol desisen mo aksen we yumi mekem.

5. ?Wanem i hapen taem ol man oli no wantem luksave Jehova olsem Stamba blong trufala waes?

⁵ Plante we yumi mitim olgeta long wok blong prij, oli ting se ol samting raonabaot long yumi oli naes tumas, be oli no bilif long wan Krieta, oli bilif long evolusen nomo. Sam narafala oli talem se oli bilif long God, be oli ting se ol loa mo advaes blong Baebol oli no stret long taem blong yumi, mo oli no wantem folem. ?Wanem i kamaot from? Wol i stap kam moa nogud from we ol man oli folem prapa waes blong olgeta be i no waes blong God. Ol man oli no glad mo oli no gat wan gudfala hop blong fiuja. Samting we yumi luk long wol i soemaot se tok ya blong Baebol i tru, se: “I no gat waes, o fasin luksave, o advaes, we i save agensem Jehova.” (Prov. 21:30) Hemia i mekem se yumi wantem nomo blong gohed blong askem long Jehova blong i givim trufala waes. Sore tumas, bighaf blong ol man oli no mekem olsem. ?From wanem?

?FROM WANEM MAN I SAKEMAOT TRUFALA WAES?

6. Folem Ol Proveb 1:22-25, ?hu i no wantem lesin long trufala waes?

⁶ Plante man oli no wantem harem trufala waestok we “i stap singaot bigwan long bigrod.” Baebol i tokbaot tri kaen man we oli sakemaot trufala waes: man we i “no gat ekspiriens,” man we i stap “jikim man,” mo man we i “no gat hed.” (Ridim Ol Proveb 1:22-25.) Bambae yumi tokbaot samting we i mekem se ol man ya oli sakemaot waes blong God, mo olsem wanem yumi save blokem fasin ya.

7. ?From wanem samfala oli jusum blong “no gat ekspiriens”?

⁷ Olgeta we oli “no gat ekspiriens,” hemia olgeta we oli bilivim evri samting we oli harem, oli folem tingting blong narafala, mo i isi blong giaman long olgeta. (Prov. 14:15, fut.) Yumi mitim plante man olsem long wok blong prij. Tingbaot hamas milian man we ol lida blong jos mo politik oli stap giaman long olgeta. Samfala oli sek nogud taem oli luksave se ol lida ya oli stap giaman long olgeta. Be ol man we Ol Proveb 1:22 i tokbaot, oli jusum blong no gat ekspiriens from we oli laekem olsem. (Jer. 5:31) Oli wantem mekem samting we olgeta nomo oli wantem, mo oli no wantem save long Baebol mo folem ol loa blong hem. Plante oli gat sem tingting olsem wan woman Quebec long Kanada we hem i strong long jos blong hem, mo i talem long wan Witnes se: “!Sipos pris blong mifala i giaman long mifala, hemia fol blong hem, i no fol blong mifala!” !Yumi no wantem nating blong folem fasin blong ol man olsem!—Prov. 1:32; 27:12.

8. ?Wanem bambae i halpem yumi blong kasem ekspiriens we i mekem yumi waes?

⁸ I gat gudfala risen blong Baebol i talem se yumi no mas man we i no gat ekspiriens, be yumi mas “tingting olsem bigman.” (1 Kor. 14:20) Yumi kasem ekspiriens taem yumi folem ol loa blong Baebol long laef blong yumi. Sloslo, yumi luk olsem wanem Baebol i halpem yumi blong blokem plante problem mo mekem ol waes desisen. I gud yu jekem sipos yu stap kam gud moa long samting ya. Sipos yu bin go long miting mo stadi long Baebol longtaem lelebet be yu no givim laef blong yu long Jehova mo baptaes, i gud yu tingbaot from wanem yu no mekem samting ya. Sipos yu baptaes finis, ?yu stap kam gud moa long wok blong prij mo tijim ol man long gud nius? ?Ol desisen blong yu oli soemaot se yu stap folem samting we yu lanem long Baebol? ?Yu yu mekem ol gudfala fasin long ol narafala olsem we Jisas i mekem? Sipos yu luk se yu nidim blong mekem sam jenis, i gud yu tingting dip long ol tok blong Jehova, we oli save mekem “man we i no gat ekspiriens, i waes.”—Sam 19:7.

9. ?Olsem wanem ol man blong “jikim man” oli soemaot se oli sakemaot trufala waes?

⁹ Narafala man we i sakemaot waes blong God, hemia man blong “jikim man.” Samtaem yumi mitim ol man olsem long wok blong prij. Oli harem gud blong jikim narafala. (Sam 123:4) Baebol i givim woning se long ol las dei bambae i gat plante man blong jikim man. (2 Pita 3:3, 4) Be sam man tede oli no lesin long ol woning blong God, olsem ol hasban blong tufala gel blong stret man ya Lot. (Jen. 19:14) Plante man tede oli laf long olgeta we oli folem samting we Baebol i talem. “Ol samting nogud we olgeta nomo oli wantem,” oli pulum ol man ya blong jikim ol narafala. (Jud 7, 17, 18) !Ol samting we Baebol i talem long saed blong ol man blong jikim man, i stret nomo long ol man blong apostasi mo ol narafala we oli tanem baksaed long Jehova!

10. Folem Ol Sam 1:1, ?olsem wanem blong meksua se yumi no kam ol man blong jikim man?

¹⁰ ?Olsem wanem blong meksua se yumi no kam ol man blong jikim man? Wan rod se, yumi no joen oltaem wetem ol man we oli stap komplen from evri samting. (Ridim Ol Sam 1:1.) Hemia i min se yumi no lesin long ol man blong apostasi mo yumi no ridim eni samting we oli raetem. Sipos yumi no lukaot gud, yumi save stat blong komplen from evri samting, mo gat tu tingting long saed blong samting we Jehova mo oganaesesen blong hem i talem. Taswe i gud yumi wanwan i ansarem ol kwestin ya: ‘?Mi mi stap komplen taem yumi kasem sam niufala save o advaes? ?Mi stap traem blong faenem poen long olgeta we oli lidim yumi?’ Sipos yumi kwik blong stretem ol slak fasin ya, Jehova bambae i glad tumas.—Prov. 3:34, 35.

11. ?Wanem tingting blong man we i “no gat hed” long ol gudfala fasin we Jehova i laekem?

¹¹ Sam narafala we oli sakemaot trufala waes, hemia olgeta we oli “no gat hed.” Oli no gat hed from we oli no wantem folem ol loa blong God long laef blong olgeta. Oli mekem samting we olgeta nomo oli ting se i stret. (Prov. 12:15) Olgeta ya oli tanem baksaed long Jehova, we i Stamba blong waes. (Sam 53:1) Taem yumi mitim olgeta long wok blong prij, oli tok strong long yumi from we yumi respektem ol gudfala fasin we Baebol i tokbaot. Be oli no save givim advaes we i moa gud. Baebol i talem se: “Man we i no gat hed, i strong tumas blong hem i kasem trufala waestok, hem i no gat wan samting blong talem taem oli stap long get blong taon.” (Prov. 24:7) Man we i no gat hed i no save givim waes advaes. !Taswe Jehova i talem se yumi mas “stap longwe long man we i no gat hed”!—Prov. 14:7.

12. ?Wanem bambae i halpem yumi blong blokem fasin blong man we i no gat hed?

¹² Yumi no olsem olgeta we oli sakemaot advaes blong God, be yumi lanem blong laekem tumas ol tingting blong God mo ol loa blong hem long saed blong gudfala fasin. Yumi laekem moa ol loa blong God, taem yumi luk frut we i kamaot long laef blong man we i obei mo man we i no obei long olgeta. Yumi luk ol trabol we ol man oli pulum i kam long olgeta bakegen, taem oli sakemaot ol waes advaes blong Jehova. I gud blong tingbaot olsem wanem laef blong yu i kam gud moa from we yu stap obei long God.—Sam 32:8, 10.

13. ?Jehova i fosem yumi blong obei long waes advaes blong hem?

¹³ Jehova i singaot olgeta man blong oli lesin long waestok blong hem, be hem i no fosem eni man. Hem i tokbaot rabis frut we i kamaot taem man i no lesin long waestok. (Prov. 1:29-32) Olgeta we oli no wantem obei long Jehova, bambae “oli kasem panis from fasin blong olgeta.” Afta we sam taem i pas, fasin blong laef blong olgeta i pulum trabol mo wari i kam long olgeta, mo tu long fiuja, bambae oli lus olgeta. Be Jehova i promes long olgeta we oli lesin mo folem waes advaes blong hem, se: “Man we i stap lesin long mi, bambae hem i stap gud oltaem, mo nating se trabol i kasem hem, be hem i no save fraet.”—Prov. 1:33.

TRUFALA WAES I GIVHAN LONG YUMI

14-15. ?Yumi lanem wanem long Ol Proveb 4:23?

¹⁴ Waes blong God i givhan long yumi taem yumi folem. Olsem yumi tokbaot finis, i isi blong kasem ol waestok blong Jehova. Long buk blong Ol Proveb, i gat plante gudfala advaes we i wok gud long laef blong yumi tede. Bambae yumi tokbaot fo long ol waestok ya.

¹⁵ Protektem hat blong yu. Baebol i talem se: “Yu mas lukaot gud moa long hat blong yu i bitim eni narafala samting, from hem nao i stamba blong laef.” (Prov. 4:23) Tingbaot samting we yumi mas mekem blong protektem prapa hat blong yumi. Yumi mas kakae gud, mekem eksasaes, mo blokem ol fasin we oli spolem bodi. Yumi mas mekem samting ya tu blong protektem hat we Ol Proveb i tokbaot. Evri dei yumi mas ridim Tok blong God we i olsem kakae. Yumi rerem ol miting, joen long olgeta, mo givim ansa. Yumi stap bisi oltaem long wok blong prij. Mo yumi stap longwe long eni samting we i save spolem tingting blong yumi, olsem ol nogud pleplei mo ol rabis fren.

16. ?Olsem wanem Ol Proveb 23:4, 5 i save givhan long yumi tede?

¹⁶ Harem gud long smol samting we yu yu gat. Baebol i givim advaes ya se: “Yu no mas flatem paoa blong yu blong kasem ol sas samting. . . . Taem yu tanem yu kwiktaem blong lukluk ol samting ya, oli no moa stap, from we ol samting ya bambae oli openem wing blong olgeta olsem wan igel mo oli flae i go long skae.” (Prov. 23:4, 5) Mane mo olting blong yumi oli save lus isi nomo. Nating se i olsem, ol rijman mo ol puaman tu oli stap traehad blong kasem moa mane. Hemia nao from wanem plante taem oli spolem gudnem blong olgeta, ol fren blong olgeta, mo helt blong olgeta tu. (Prov. 28:20; 1 Tim. 6:9, 10) Be sipos yumi waes, yumi no wari bitim mak long saed blong mane. Tingting olsem i protektem yumi blong yumi no kam griri, mo yumi harem gud mo glad long smol samting nomo we yumi gat.—Pri. 7:12.

17. ?Olsem wanem yumi save gat “tang blong man we i waes,” olsem Ol Proveb 12:18 i tokbaot?

¹⁷ Tingting fastaem bifo we yu toktok. Sipos yumi no lukaotgud, ol tok blong yumi i save spolem narafala. Baebol i talem se: “Toktok blong man we i no tingting gud, i stikim man olsem naef blong faet, be tang blong man we i waes, i save hilim man.” (Prov. 12:18) Yumi givhan blong mekem se pis i stap, taem yumi no tokbaot man mo yumi no tokbaot rong we ol narafala oli mekem. (Prov. 20:19) Blong mekem se tok blong yumi i hilim man be i no stikim man, yumi mas ridim Tok blong God mo tingbaot evri dei. (Luk 6:45) Taem yumi tingting dip long samting we Baebol i talem, yumi save kam olsem wan “wel blong waestok,” we ol tok blong yumi i mekem ol narafala oli harem gud.—Prov. 18:4.

18. ?Olsem wanem advaes blong Ol Proveb 24:6 i save givhan long yumi long wok blong prij?

¹⁸ Folem ol tok we oganaesesen i talem. Baebol i givim gudfala advaes ya se: “Taem yu kasem waes advaes blong lidim yu, bambae yu save go faet, mo taem i gat plante man blong givim advaes, man i save win.” (Prov. 24:6) Tingbaot olsem wanem vas ya i save givhan long yumi taem yumi stap prij mo tijim ol narafala. Yumi no prij mo tij long fasin we yumi ting se i stret, be yumi traem folem ol advaes we yumi kasem. Yumi kasem ol waes advaes long ol miting, taem olgeta we oli gat ekspiriens oli givim ol tok blong Baebol mo trenem yumi long wok blong prij. Antap long hemia, oganaesesen blong Jehova i givim ol gudfala tul, ol buk mo ol video, we oli save givhan long ol man blong kasemsave long Baebol. ?Yu yu stap lanem blong yusum gud ol tul ya?

19. ?Wanem tingting blong yu long ol waestok blong Jehova? (Ol Proveb 3:13-18)

¹⁹ Ridim Ol Proveb 3:13-18. !Yumi glad tumas blong kasem ol gudfala advaes long Baebol! Sipos yumi nogat, yumi no save gat wan hapi laef. Long stadi ya, yumi bin tokbaot sam waes advaes we buk blong Ol Proveb i givim. Be i tru se long ol narafala haf blong Baebol tu, Jehova i givim plante gudfala advaes. I gud yumi gat strong tingting blong folem ol waestok ya long laef blong yumi. Bighaf blong ol man long wol oli no tinghevi long waes blong God, be yumi bilif strong se “olgeta we oli gohed blong holemtaet waestok, bambae ol man oli singaotem olgeta se, ol hapi man.”