?Yu Yu Rimemba?

?Yu bin ridimgud ol Wajtaoa blong ol yia ya? Traem luk sipos yu save ansarem ol kwestin ya:

?Bambae yumi kasem wanem gudfala samting sipos yumi tekem taem blong toktok, lesin, mo tingbaot Jehova?

Bambae yumi mekem ol gudfala desisen, yumi kam ol gudfala tija, bilif blong yumi i kam strong moa, mo yumi lavem Jehova moa.—w22.01, pej 30-31.

?Sipos yumi lanem blong trastem Jehova mo ol man we hem i putumap, hemia bambae i halpem yumi olsem wanem?

Naoia yumi mas lanem blong trastem moa fasin blong Jehova blong mekem samting. Yumi mekem olsem taem yumi no gat tu tingting long ol daereksen mo desisen we ol elda oli mekem. Long taem blong bigfala trabol, bambae yumi rere blong obei nating sipos yumi kasem ol instraksen we maet i luk olsem se i narakaen, mo i had blong kasemsave.—w22.02, pej 4-6.

?Enjel i wantem makem wanem poen long Sekaraea taem i tokbaot “ledlaen we i stap long han blong [hed gavman ya] Serubabel”? (Sek. 4:8-10)

Vison ya i mekem ol man blong God oli sua se, nating sipos niufala tempol ya i defren, be bambae i mas finis mo bambae i stret olsem we Jehova i wantem.—w22.03, pej 16-17.

?Olsem wanem yumi save soem “gudfala eksampol long ol toktok blong” yumi? (1 Tim. 4:12)

Yumi toktok kaen mo soem respek long wok blong prij, singsing wetem fulhat, ansa oltaem long ol miting, mo tok tru mo talem ol tok we i mekem narafala i kam strong moa, yumi no mas talem “ol rabis tok.”—w22.04, pej 6-9.

?From wanem Daniel japta 7 i tokbaot fo wael animol, be Revelesen 13:1, 2 i tokbaot wan animol nomo we i gat evri samting ya long hem?

Wael animol long Revelesen 13 i no representem wan kingdom nomo, olsem Rom. Wael animol ya i representem evri politik paoa we oli bin rul long wol.—w22.05, pej 9.

?Olsem wanem yumi soemaot se yumi trastem se Jehova bambae i mekem se i gat jastis?

Sipos wan man i tok nogud, spolem, o i mekem sin agensem yumi, i gud yumi no holemtaet kros, be yumi lego samting ya i stap long han blong Jehova. Bambae hem i naf blong finisim olgeta nogud samting we i kamaot from sin.—w22.06, pej 10-11.

?Wan brata we i mekem prea long taem blong miting i mas tingbaot wanem?

Prea i no wan taem blong givim advaes long kongregesen o blong mekem anaonsmen. Speseli sipos wan brata i mekem faswan prea blong statem, hem i no mas talem “plante toktok.” (Mat. 6:7)—w22.07, pej 24-25.

?I minim wanem se “olgeta we oli mekem ol rabis samting,” bambae “oli girap blong kasem jajmen”? (Jon 5:29)

Bambae oli no kasem jajmen o panis folem laef blong olgeta bifo. Be bambae oli jekem ol fasin mo aksen we oli mekem afta we oli laef bakegen.—w22.09, pej 18.

?Long bigfala asembli blong Septemba 1922, J. F. Rutherford i pulum ol man blong mekem wanem?

Long bigfala asembli long Cedar Point, Ohio, U.S.A., hem i talemaot se: “!King i rul finis! Yufala i mas talemaot samting ya long evri man. !Talemaot, talemaot, talemaot, King ya mo Kingdom blong hem!”—w22.10, pej 3-5.

?Wanem tri samting we Jehova i mekem blong halpem ol man blong hem blong oli stanap strong, we Aesea japta 30 i tokbaot?

Japta ya i soem se (1) hem i lesin mo i ansa long ol prea blong yumi, (2) hem i lidim yumi, mo (3) hem i blesem yumi naoia mo bambae i mekem tu long fiuja.—w22.11, pej 9.

?From wanem i stret blong talem se ol tok blong Ol Sam 37:10, 11, 29 oli bin kamtru bifo mo bambae oli kamtru tu long fiuja?

Ol tok blong Deved oli soemaot gudfala laef we ol man Isrel oli gat long taem we Solomon i rul. Be Jisas i tokbaot wan paradaes long fiuja mo i yusum ol tok blong vas 11. (Mat. 5:5; Luk 23:43)—w22.12, pej 8-10, 14.