STADI 7
Kasem Sam Moa Gudfala Samting Taem Yu Ridim Baebol
“Taem yu ridim ?yu kasem save wanem?”—LUK 10:26.
SINGSING 97 Ol Tok Blong God i Givim Laef
BIGFALA TINGTINGa
1. ?Wanem i soemaot se Jisas i tinghae long Baebol?
I NAES tumas blong lesin long ol tijing blong Jisas. !Taem hem i toktok, plante taem hem i yusum Baebol mo i talem ol stret tok we i stap insaed long hem! Long ol faswan tok blong Jisas afta we hem i baptaes, mo long laswan tok blong hem bifo we hem i ded, hem i talem ol tok we i kamaot long Baebol.b (Dut. 8:3; Sam 31:5; Luk 4:4; 23:46) Mo bitwin long tufala taem ya, hemia long ol tri yia haf blong Jisas long wol, plante taem hem i ridim o i tokbaot sam vas blong Baebol, mo i eksplenem olgeta.—Mat. 5:17, 18, 21, 22, 27, 28; Luk 4:16-20.
Long ful laef blong Jisas, hem i soemaot se hem i laekem Baebol, mo i letem ol tok blong hem i gat paoa long ol aksen blong hem (Haf 2)
2. ?Wanem i halpem Jisas blong i save gud Baebol taem hem i stap gruap? (Yu luk pija long fran pej.)
2 Plante yia bifo we Jisas i stat blong prij, hem i ridim mo i harem Tok blong God plante taem. I sua se long haos, hem i harem we Meri mo Josef i tokbaot ol vas blong Baebol evri dei taem oli stap storian.c (Dut. 6:6, 7) Mo yumi sua se evri Sabat dei, Jisas i go long sinagog wetem famle blong hem. (Luk 4:16) Long ples ya, hem i lesin gud taem oli stap ridim Baebol. Sam taem biaen, Jisas i lanem blong ridim ol Tabu Tok ya hem wan. From samting ya, Jisas i save gud Baebol, be i no hemia nomo, hem i lavem ol tok blong hem mo i letem oli gat paoa long ol aksen blong hem. Eksampol, tingbaot samting we i hapen long tempol taem Jisas i gat 12 yia. Ol tija we oli save gud Loa Blong Moses, oli “sapraes tumas long save blong [Jisas] mo long ol ansa blong hem.”—Luk 2:46, 47, 52.
3. ?Bambae yumi tokbaot wanem long stadi ya?
3 Yumi tu yumi naf blong save mo lavem Tok blong God taem yumi ridim evri dei. ?Olsem wanem yumi save kasem sam moa gudfala samting taem yumi ridim Baebol? Yumi save lanem samting long wanem we Jisas i talem long olgeta we oli save gud Loa, inkludum ol skraeb, ol Farisi, mo ol Sadusi. Ol lida blong skul ya oli ridim Baebol evritaem, be oli no kasem gudfala samting taem oli rid. Jisas i tokbaot tri rod we ol man ya oli no bin folem taem oli ridim Baebol. Ol tok we Jisas i talem long olgeta bambae i halpem yumi blong kam gud moa long fasin blong yumi (1) blong kasemsave samting we yumi ridim, (2) faenem ol sas samting, mo (3) letem Tok blong God i jenisim yumi.
KASEMSAVE SAMTING WE YU RIDIM
4. ?Yumi lanem wanem folem stori ya we i stap long Luk 10:25-29?
4 Yumi wantem kasemsave mining blong ol tok we yumi ridim long Baebol. Sipos no, ridim ya i no save givhan long yumi. Eksampol, traem tingbaot storian blong Jisas wetem “wan man we i save gud Loa.” (Ridim Luk 10:25-29.) Taem man ya i askem long Jisas se hem i mas mekem wanem blong kasem laef we i no save finis, Jisas i lidim hem i go long Baebol, taem i askem long hem se: “?Loa i talem wanem? Taem yu ridim ?yu kasem save wanem?” Man ya i givim stret ansa taem i yusum ol tok blong Baebol we i se yu mas lavem God mo lavem neba blong yu. (Lev. 19:18; Dut. 6:5) Be makem nekiswan samting we hem i talem: “?Be hu ya neba blong mi?” Man ya i soemaot se hem i no kasemsave stret mining blong samting we hem i ridim. From samting ya, hem i no save olsem wanem blong folem ol tok ya long laef blong hem.
Yumi save lanem blong kasemsave samting we yumi ridim
5. Taem yu prea mo yu rid slo, ?olsem wanem hemia i halpem yu blong kasemsave samting we yu ridim?
5 Blong kasemsave long Tok blong God, yumi mas gat gudfala fasin blong rid. Hemia sam tingting we i save givhan long yu. Prea bifo we yu stat blong rid. Jehova nao i save halpem yu blong kasemsave long Baebol, taswe yu mas askem hem blong i givim tabu spirit blong yu save tingting gud long samting we yu ridim. Biaen, yu rid slo. Hemia bambae i halpem yu blong kasemsave. Sipos yu rid long bigfala voes o yu rid folem odio rikoding blong Baebol, hemia i save halpem yu blong kasemsave, tingbaot, mo lanem plante moa samting long Baebol. (Jos. 1:8) Taem yu finis blong rid, prea bakegen blong talem tangkiu long Jehova from presen ya Baebol, mo askem hem blong i halpem yu blong folem wanem we yu ridim.
Taem yu tekem ol smol not, ?olsem wanem hemia i save halpem yu blong kasemsave mo tingbaot samting we yu ridim? (Haf 6)
6. Taem yu askem ol kwestin mo yu tekem ol smol not, ?olsem wanem hemia i halpem yu? (Yu luk pija.)
6 I gat tu moa rod we i save halpem yu blong kasemsave gud moa long Baebol. Askem ol kwestin long saed blong samting we yu ridim. Taem yu stap ridim wan stori, askem se: ‘?Stori ya i stap tokbaot hu? ?Hu i stap toktok? ?Hem i stap toktok long hu mo from wanem? ?Stori ya i hapen wetaem mo weples?’ Ol kwestin olsem bambae oli halpem yu blong tingbaot bigfala tingting long stori ya, mo folem long laef blong yu. Mo tu, i gud blong tekem ol smol not taem yu rid. Hemia bambae i mekem yu tingbaot ol men tingting long stori ya, mo i halpem yu blong kasemsave moa. Mo tu, bambae i halpem yu blong tingbaot samting we yu ridim. Yu save raetemdaon ol kwestin, ol samting we yu faenem taem yu mekem risej, ol men poen, raetemdaon olsem wanem yu save folem samting we yu ridim, o raetemdaon ol filing blong yu. Sipos yu mekem olsem, hemia bambae i halpem yu blong luk Tok blong God olsem wan mesej we i kam stret long yu.
7. ?Wanem fasin we yumi nidim taem yumi ridim Baebol, mo from wanem? (Matiu 24:15)
7 Jisas i tokbaot wan impoten fasin we yumi nidim blong yumi naf blong kasemsave samting we yumi ridim long Baebol, hemia fasin blong luksave. (Ridim Matiu 24:15.) ?Wanem ya fasin blong luksave? Hemia wan fasin we i givhan long man blong luksave olsem wanem wan tingting i joen wetem narafala tingting, mo olsem wanem i defren long wan narafala tingting, mo blong kasemsave samting we Baebol i no talem stret. Antap long hemia, olsem we Jisas i talem, yumi nidim fasin blong luksave, blong luk olsem wanem ol samting we oli stap hapen oli mekem profet tok blong Baebol i kamtru. Mo tu, yumi nidim fasin ya blong yumi save kasem ol gudfala samting taem yumi ridim Baebol.
8. ?Olsem wanem yumi save rid wetem fasin ya blong luksave?
8 Jehova i givim fasin blong luksave long ol man blong hem. Taswe i gud yu prea, mo yu askem hem blong i halpem yu blong wokem fasin ya. (Prov. 2:6) ?Olsem wanem yu save wok folem prea blong yu? Stadi gud long samting we yu ridim mo makem olsem wanem i joen wetem ol narafala samting we yu save finis. Blong halpem yu, yu save yusum ol buk blong yumi, olsem Buk Blong Mekem Risej. Ol buk olsem bambae oli halpem yu blong kasemsave mining blong ol tok blong Baebol, mo blong luk ol defren rod we yu save folem samting ya long laef blong yu. (Hib. 5:14) Taem yu rid wetem fasin ya blong luksave, bambae yu kam gud moa long fasin blong kasemsave moa long Baebol.
FAENEM OL SAS SAMTING TAEM YU RID
9. ?Wanem impoten trutok blong Baebol we ol Sadusi oli no akseptem?
9 Ol Sadusi oli save gud ol faswan faef buk blong Hibru haf blong Baebol, be oli no akseptem ol impoten trutok we i stap long ol buk ya. Eksampol, tingbaot olsem wanem Jisas i ansa long ol Sadusi taem oli kwestinim hem long saed blong laef bakegen. Jisas i askem long olgeta se: “?Yufala i no ridim stori ya long buk blong Moses, we i tokbaot smol tri we faea i laet long hem? God . . . i talem long Moses se: ‘Mi mi God blong Ebraham, mo mi mi God blong Aesak, mo mi mi God blong Jekob.’” (Mak 12:18, 26) Nating se ol Sadusi ya oli ridim stori ya plante taem, be kwestin blong Jisas i soemaot se oli no akseptem impoten tijing ya blong laef bakegen.—Mak 12:27; Luk 20:38.d
10. ?Yumi mas luksave wanem taem yumi rid?
10 ?Yumi lanem wanem? Taem yumi rid, yumi wantem luksave lesen we yumi save lanem long wan vas o wan stori long Baebol. Yumi wantem luksave ol stamba tijing, be tu ol dip trutok we oli haed.
11. Folem 2 Timoti 3:16, 17, ?olsem wanem yu save faenem ol sas samting long Baebol?
11 ?Olsem wanem yu save faenem ol sas samting taem yu ridim Baebol? Traem luk ol tok we i stap long 2 Timoti 3:16, 17. (Ridim.) Hem i talem se: “Olgeta tok blong Baebol oli . . . stret gud” blong (1) tijim man, (2) stretem man, (3) stretem olgeta samting, mo (4) stretem man folem stret fasin. Ol buk we yu no stap ridim oltaem, oli save mekem ol fofala samting ya tu long yu. Traem luksave olsem wanem samting we yu ridim i tijim yu long saed blong Jehova, stamba tingting blong hem, o ol rul blong God. Tingbaot olsem wanem i givhan blong stretem yu. Blong mekem olsem, i gud yu luk olsem wanem ol vas oli halpem yu blong luksave mo sakemaot ol rong tingting o fasin, mo i halpem yu blong holemstrong long Jehova. Luksave olsem wanem yu save yusum wan vas blong stretem ol samting o wan rong tingting we maet wan man i askem long yu long wok blong prij. Mo luk ol vas we oli save stretem tingting blong yu blong i laenap wetem tingting blong Jehova. Sipos yu tingbaot ol fofala samting ya, bambae yu save faenem ol sas samting we oli save halpem yu taem yu ridim Baebol.
LETEM TOK BLONG GOD I JENISIM YU
12. ?From wanem Jisas i askem long ol Farisi se “Yufala i no ridim”?
12 Jisas i askem kwestin ya tu se “?Yufala i no ridim?” blong soemaot se ol Farisi oli gat rong tingting long saed blong Baebol. (Mat. 12:1-7)e Long taem ya, ol Farisi oli talem se ol disaepol blong Jisas oli brekem loa blong Sabat. Nao Jisas i yusum tu eksampol long Baebol mo i tokbaot wan vas long Hosea, blong soemaot se ol Farisi oli no kasemsave from wanem i gat loa blong Sabat, mo se oli no gat sore. ?From wanem ol man ya oli no letem ol samting we oli ridim long Baebol i jenisim olgeta? Hemia from we oli praod mo oli rid wetem tingting ya blong jajem narafala. Taswe, fasin ya i blokem olgeta blong oli no kasemsave long samting we oli ridim.—Mat. 23:23; Jon 5:39, 40.
13. ?Yumi mas gat wanem fasin taem yumi ridim Baebol, mo from wanem?
13 Yumi lanem long ol tok ya blong Jisas se yumi mas ridim Baebol wetem wan tingting we i stret. Yumi no wantem mekem olsem ol Farisi, be yumi mas gat tingting daon mo rere blong lanem samting. Yumi mas ‘stap daon blong letem God i planem tok blong hem insaed long yumi.’ (Jem. 1:21) Sipos yumi gat tingting daon, bambae yumi letem Tok blong God i gru long hat blong yumi. Sipos yumi no praod mo yumi blokem fasin ya blong jajem narafala, ol lesen long Baebol long saed blong sore mo lav bambae oli gat paoa blong jenisim yumi.
?Olsem wanem blong luksave sipos yumi stap letem Tok blong God i jenisim yumi? (Haf 14)f
14. ?Olsem wanem blong save sipos yumi stap letem Baebol i jenisim yumi? (Yu luk pija.)
14 Fasin we yumi mekem long ol narafala, bambae i soemaot sipos yumi stap letem Tok blong God i lidim yumi. Ol Farisi oli no letem Tok blong God i kasem hat blong olgeta, mo from samting ya oli stap “jajem olgeta ya we oli stret nomo.” (Mat. 12:7) Long sem fasin, tingting we yumi gat long ol narafala mo fasin we yumi mekem long olgeta i save soemaot sipos yumi letem Tok blong God i jenisim yumi. Eksampol, ?oltaem yumi talem ol gudfala samting we yumi luk long ol narafala, o yumi kwik blong tokbaot ol mastik blong olgeta? ?Yumi gat sore mo yumi rere blong fogif, o yumi jajem narafala mo yumi holemtaet kros? Ansa blong yumi i save soemaot sipos yumi letem ol samting we yumi ridim i jenisim ol tingting, filing, mo aksen blong yumi, o nogat.—1 Tim. 4:12, 15; Hib. 4:12.
YUMI GLAD TAEM YUMI RIDIM TOK BLONG GOD
15. ?Wanem filing blong Jisas long saed blong Baebol?
15 Jisas i laekem Baebol, mo ol tok blong Ol Sam 40:8 i soemaot gud filing we hem i gat long Tok blong God. Vas ya i se: “O God blong mi, mi mi glad tumas blong mekem wil blong yu, mo loa blong yu i stap dip insaed long mi.” From samting ya, hem i glad mo i gohed blong wosipim Jehova. Yumi tu yumi save glad mo gohed blong mekem wok blong Jehova, sipos yumi ridim Baebol mo lanem blong laekem Tok blong God.—Sam 1:1-3.
16. ?Yu save mekem wanem blong kasem moa samting taem yu ridim Baebol? (Yu luk bokis ya “Ol Tok Blong Jisas i Save Halpem Yu Blong Kasemsave Samting We Yu Ridim.”)
16 Sipos yumi folem ol tok mo eksampol blong Jisas, fasin blong yumi blong ridim Baebol bambae i kam gud moa. Yumi save kam gud moa long fasin blong yumi blong kasemsave moa long Baebol taem yumi prea, rid slo, askem ol kwestin, mo tekem ol smol not. Yumi save yusum fasin blong luksave, taem yumi mekem risej long ol buk blong yumi we oli stanap long Baebol. Yumi save yusum gud Baebol mo ol vas we yumi no save gud, sipos yumi lukaot ol sas samting long Baebol we i had blong faenemaot. Mo yumi save letem Tok blong God i jenisim yumi, sipos yumi ridim wetem wan tingting we i stret. Sipos yumi mekem ol samting ya, bambae yumi kasem plante moa samting taem yumi ridim Baebol, mo yumi kam klosap moa long Jehova.—Sam 119:17, 18; Jem. 4:8.
SINGSING 95 Laet i Stap Saenaot Moa
a Yumi evriwan we i wosipim Jehova, yumi faenem i had blong ridim Baebol evri dei. Sam narafala tu oli ridim Baebol be oli no rili kasemsave long wanem we oli ridim. Sam man long taem blong Jisas tu oli olsem. Sipos yumi tingting gud long ol tok we Jisas i talem long olgeta we oli ridim Tok blong God, bambae yumi lanem sam lesen we i save halpem yumi blong kasem sam moa gudfala samting taem yumi ridim Baebol.
b Long taem we Jisas i baptaes mo long taem we tabu spirit i makemaot hem, Jisas i tingbaot bakegen laef ya we hem i bin gat taem hem i stap long heven.—Mat. 3:16.
c Meri i save gud Baebol mo i yusum taem i toktok. (Luk 1:46-55) Nating se Josef mo Meri i no gat wan kopi blong Baebol long taem ya, be taem tufala i go long sinagog, i sua se tufala i lesin gud taem oli ridim Tok blong God. Taswe tufala i save talem bakegen ol tok ya blong Baebol.
d Yu luk haf ya “Yu Save Kam Klosap Long God—‘God Ya i God Blong Man We i Laef’” long Wajtaoa blong 1 Eprel 2013.
e Yu luk tu Matiu 19:4-6, we Jisas i askem sem kwestin ya long ol Farisi se: “?Yufala i no ridim?” Nating se oli ridim stori blong kriesen, be oli no wantem akseptem tingting we God i gat long saed blong mared.
f PIJA: Long wan miting long Haos Kingdom, wan brata we i givhan blong mekem saon mo serem video, i mekem sam mastik. Be afta long miting ol brata oli talem ol gudfala tok long hem from traehad blong hem, be oli no tingbaot mastik blong hem.